Omapulo Akumbululwa

◼ Okuti Tuesukisa Okulikuambela Tyina Tulongesa Omunthu Ombimbiliya Pombundi?

Tyina ouwa omunyingi okuhimbika nokumanuhula nelikuambelo tyina tulilongesa nomunthu Ombimbiliya. Tyina tulikuambela, tuita ku Jeova ospilitu sandu itukuateseko melilongeso lietu. (Luc. 11:13) Tupu, okulikuambela tyilekesa komulongwa wetu okuti okulilongesa Ombimbiliya tyakolela unene nokumulongesa oñgeni tyilikuambelwa. (Luc. 6:40) Moluotyo, otyiwa okulikuambela liwa nomunthu ulilongesa nae Ombimbiliya. Mahi, mokonda ononkhalelo mbelikalela, omuivisi una okupunga nawa pokutokola inkha tyitavela okulikuambela tyina alongesa omunthu Ombimbiliya pombundi.

Otyipuka tyimwe tyakolela okutala omphangu apa elilongeso likahi nokulingilwa. Inkha mulilongesila pomphangu pakuata ovanthu ovanyingi, upondola okulinga elikuambelo lihasete monkhalelo yahamoneka kovanthu pala okuhimbika nokumanuhula okulilongesa nomunthu welilongesale nae ovikando vimwe. Mahi, inkha vana valamba vemutala unene ine tyilingisa omulongwa okulitehelela omapita, otyiwa okukevelela alo muvasa omphangu ongwa mupondola okulikuambela. Kese omphangu apa tukahi nokulilongesa Ombimbiliya nomunthu, tuesukisa okupunga nawa pokutokola onalupi matuhimbika nelikuambelo.—Tala mo Nosso Ministério do Reino ya Março yo 2005, pefo 4.