Otyituwa Tyakolela Unene Tyomulongesi Omuwa
1. Otyituwa patyi tyomulongesi omuwa tyakolela unene?
1 Oityi tyikuatesako omunthu okukala omulongesi omuwa wo Mbimbiliya? Okulongeswa unene mosikola? Okunoñgonoka ovipuka ovinyingi? Ounongo? Anthi, matyimukuatesako, otyituwa tyina tyifuisapo Ovitumino, tyiimbukisa ovalongwa va Jesus, otyituwa tyavilapo vali povituwa via Jeova. (João 13:35; Gál. 5:14; 1 João 4:8) Otyituwa otyo, oluembia. Ovalongesi ovawa vena ohole.
2. Okukala nohole novanthu tyakolela mokonda yatyi?
2 Kala Nohole Novanthu: Omulongesi omunene, Jesus wali nohole novanthu, iya otyo tyalundile ovanthu okumutehelela. (Luc. 5:12, 13; João 13:1; 15:13) Inkha tusuka novanthu, matuave oumbangi mo nomphitilo ambuho. Katusoyo mokonda yokumoneswa ononkhumbi ine o yovanthu vahasukile netyi tuvepopila. Matulekesa okuti tuasuka tyotyili novanthu tuivisila, iya atuovola okupopia konthele yetyi tyivesukalalesa. Tupu, matulingi ombili yokuovola omuwo wokulipongiya pala okulongesa kese mulongwa wo Mbimbiliya, no wokukala na kese umwe.
3. Oñgeni okukala nohole notyili Tyombimbiliya tyitukuatesako movilinga viokuivisa?
3 Kala Nohole Notyili Tyombimbiliya: Jesus ankho una ohole notyili Tyombimbiliya, ankho utyitala ngolumono. (Mat. 13:52) Inkha tukala nohole notyili, matupopi noundyandyi, iya otyo tyiavela ondundo ovateheleli. Ohole oyo, maitukuatesako okupanda vali onondaka tukahi nokuivisa, tyipona okusukalala netyi tuhevili okulinga, iya ngotyo kamatukala nowoma movilinga viokuivisa.
4. Oñgeni matukala nohole?
4 Kala Nohole: Oñgeni tupondola okukala nohole novanthu? Okusokolola nawa oluembia Jeova no Mona wae vena, nokutala ovanthu vehena oupanga na Huku motelitoliu yetu. (Mar. 6:34; 1 João 4:10, 11) Ohole yetu notyili Tyombimbiliya mailiyawisa tyina tulilongesa apeho nokusokolola nawa kuetyi tuelilongesa. Ohole onthele yotyinyango tyospilitu. (Gál. 5:22) Moluotyo, tupondola okuita ku Jeova ospilitu sandu, nokumuita etukuateseko okuyawisa ohole yetu. (Luc. 11:13; 1 João 5:14) Namphila tualongeswa unene mosikola, nokuna omanima omanyingi motyili, ine tuvanongo, matukala vala ovalongesi ovawa Vombimbiliya, inkha tuna ohole.