Lunguka Putyina Ukahi Movilinga Viokuivisa
1 “Ngonongi pokati komahunyu,” ovaumbili va Huku vaivisa “kovanthu vonondingavivi nokuapenga.” (Mat. 10:16; Fil. 2:15) Molaliu no TV mupopiwa unene okuti ondyaya, noungangala, novanthu vatyindwa kononkhono, vikahi nokuliyawisa, tyilekesa okuti ovanthu vonondingavivi ‘vekahi nokuvilapo unene.’ (2 Tim. 3:13) Onondonga patyi mbo Vihonekwa mambutukuatesako ‘okukala tyalunguka’ movilinga viokuivisa?—Mat. 10:16.
2 Punga Nawa: Provérbios 22:3 itoneka okupopia ounongo ‘wokuholama’ ovivi. Kala tyipahi! Onkhalelo yapama yo potyilongo ipondola okupiluluka liwa-liwa. Upondola okumona omapulisa asukalala unene ine ovanthu ovanyingi vakongolokela pomphangu imwe. Ovikando vimwe munthele wokuna ohole upondola okukulondola. Otyiwa okutunda ponthele opo akaivisa konthele onkhuavo, ohakala nolumbwe luokuhanda okutala.—Pro. 17:14; João 8:59; 1 Tes. 4:11.
3 Undapa na Vakuenyi: Eclesiastes 4:9 yati: “Hahe vevali tyipona wike.” Namphila wetyiliya okuundapa awike movilinga viokuivisa, okuti tyaviuka hono okulinga ngotyo? Kononthele mbumwe, tyitavela. Mahi ko nonkhuavo, pahe katyapamene onomphange novakuendye ovatutu, okuundapa umbo na umbo aveke, haunene tyina ekumbi linyingila. Onongeleka mbulekesa okuti okueenda vevali tyakolela. (Ecl. 4:10, 12) Tualako okutala nawa vakuenyi mukahi nokuundapa navo. Kala notyituwa tyokulekela vakuenyi, tyina wamana.
4 Ovakulu vewaneno vena otyilinga tyokuava ehongolelo liatokala monkhalelo yo potyilongo, ‘tyetyi vekahi nokuyunga omienyo vietu.’ (Heb. 13:17) Jeova metukanena nawa inkha tukala Ovakristau veliola omutima, nokuundapela kumwe na vana veli komutwe mewaneno. (Miq. 6:8; 1 Cor. 10:12) Atuho ovaumbili va Huku tuavei oumbangi nounongo motelitoliu yetu, anthi tukalei apeho tyalunguka.
[Omapuko Elongeso]
1. Omokonda yatyi tyesukisila okukala tyalunguka tyina tukahi nokuivisa?
2. Oityi pamwe tuesukisila okutunda potelitoliu tuivisa atukaivisa konthele onkhuavo?
3. Oñgeni matuundapesa Eclesiastes 4:9 movilinga vietu viokuivisa?
4. Oñgeni tupondola okuundapa neameno liaveho mewaneno?