“Ava Oumbangi Nombili”
1. Ongeleka patyi ongwa apostolu Paulu aava movilinga viokuivisa?
1 “Fuisapo nawa-nawa ovilinga viove.” (2 Tim. 4:5) Apostolu Paulu wavelele Timoteo ondundo onondaka ombo. Ngotyo, momanima 47 alo 56 P.K., Paulu ankho walingale oungendi wae watatu woumisionaliu. Omukanda wa Atos upopia okuwana-wana okuti Paulu “wava oumbangi.” (Atos 23:11; 28:23) Oñgeni onthue hono tupondola okulinga ngotyo?
2. Oñgeni tupondola okuava nawa oumbangi tyina tuivisa umbo-na-umbo?
2 Umbo-na-Umbo: Opo tuvase ovanthu veheneive onondaka ongwa, tuesukisa okutalelapo ovanthu mo novola mbelikalalila. Ovanthu hamwe vakala meumbo kokawiwi ine konthyulilo yosimano. Onthue pamwe tupondola okupopia nomunthu wike meumbo limwe, ononthiki ononkhuavo atuhemuvahipo vali. Iya inkha tulinga ononkhono mbokutalelapo omunthu umwe atuhemuvasi? Okuhoneka omukanda ine okumutelefonalela tyipondola okumukuatesako.
3. Omphitilo patyi tuna yokuava oumbangi mounyingi na tyina tuhekahi movilinga viokuivisa?
3 Mounyingi na Tyina Uhekahi Movilinga Viokuivisa: Ovaumbili va Jeova hono vahanda ovanthu aveho veive “ounongo wotyotyili”. Pamwe otyo vetyilinga tyina “vekahi momatapalo” ine “pana pavasiwa ovanthu ovanyingi.” (Prov. 1:20, 21) Okuti tyina tukahi movilinga vietu via kese nthiki, tulinga atyiho opo tuave oumbangi? Tupondola okupopia okuti tukahi “nokuundapa unene okuivisa ondaka”? (Atos 18:5) Inkha ongotyo tusoka, matulingi ononkhono mbokufuisapo otyilinga “tyetu tyokuava oumbangi.”—Atos 10:42; 17:17; 20:20, 21, 24.
4. Oñgeni elikuambelo nokusokolola vipondola okutukuatesako okuava oumbangi nombili?
4 Mokonda pamwe tuna ovitateka viekongoko ine owoma, hamwe tulityilika okuava oumbangi. Mahi, Jeova utyii okuti katufuisapo ovipuka aviho. (Sal. 103:14) Anthi, tyina tuamamono omphitilo tupondola okulikuambela opo etukolese omutima atupopi. (Atos 4:29, 31) Tupu, tyina tulinga elilongeso lietu nokusokolola Monondaka ya Huku, tupondola okupameka olupandu luetu mesilivilo liokuivisa onondaka onongwa. (Fil. 3:8) Otyo tyitulunda okuivisa nombili!
5. Oityi tuna okulinga mokufuisapo kueulo lia Joele?
5 Eulo lia Joele lipopia okuti tyina onthiki onene nokutilisa owoma ya Jeova iheneye, ovanthu va Huku “mavatualako” okuivisa nokuhayeke natyike tyivetyilike. (Joel 2:2, 7-9) Tuna okulinga ononkhono mbokuava oumbangi movilinga viokuivisa vihakawanua vali!