Olie Upondola Okusuka Netyi?
1. Tyina tutanga Omutala Womulavi ine o Despertai!, oityi tupondola okutala ya omokonda yatyi?
1 Omutala Womulavi no Despertai! vialingwa pala okukuatesako ovanthu mouye auho. Moluotyo, ononthele mbuna onosapi mbelikalaila. Tyina tutanga kese nthele, tupondola okutala olie upondola okusuka vali nambo, iya atupopi konthele yotyo tyina tuavela omunthu.
2. Ononthele patyi mbukahi momikanda vietu ovanthu vapondola okusuka nambo?
2 Momutala Womulavi tuna pahe tyino ononthele patyi, ove uhanda okutomphola na vana uundapa navo? Ononthele patyi mbupopia konthele yomuenyo wombunga mbupondola okukuatesako ombunga? Ove wii omunthu umwe uhanda okulinga oungendi nokotyilongo tyapopiwa mo Despertai!? Okuti muna onthele imwe ipopia konthele yovitanda ine onondyuo mbo vatumini mbukahi pomphangu muivisa? Mongeleka ononthele mbupopia konthele yovitateka viokukulupa ovanthu vapondola okusuka nambo ovo vana vekahi monondyuo mba vana vakulupa. Mbuna mbupopia konthele yovitumino viovatumini.
3. Popiapo onongeleka mbulekesa esilivilo liokuava omikanda tutala okuti ovanthu mavesuku navio?
3 Ouwa Tyieta: Etyi ovalinepi vamwe ko Afrika do Sul vatambula o Despertai! ya Outubro yo 2011 ina osapi yati: “Otyilinga Tyokutekula Ovana” avatelefonalela ko nosikola 25 potyilongo vaivisa. Onosikola 22 avetavela omikanda ovio nokuviavela ovalongwa vavo. Ovalinepi ovakuavo motyilongo otyo, navo vasoka ngotyo nokutuala omikanda mono sikola potyilongo vaivisa. Ovalongesi vamwe vosikola avatokola okulongesa kese simano o Despertai!. Ovalinepi avapopila onongeleka ombo omutalelipo womawaneno. Omutalelipo womawaneno avela ondundo omawaneno aeho opo aivise monosikola mbukahi motyilongo vaivisa. O Filiyale aitambula omikanda ominyingi viokuita vali omikanda ovio!
4. Oityi tuhandela okuviavela ovanthu ovanyingi mouye auho?
4 Omutala Womulavi no Despertai! vipopia ovipuka vikahi nokumoneka mouye uno nokukuatesako ovanthu vanoñgonoke Ombimbiliya Nouhamba wa Huku. Ovio vala omikanda mouye auho vikahi nokupopia “eyovo.” (Isa. 52:7) Moluotyo, tuhanda okuviavela ovanthu ovanyingi mouye auho. Onkhalelo yaviuka yokulinga ngotyo, okulipula okuti, ‘olie upondola okusuka netyi?’