Vakuendye, Okuti Mukahi Nokuovola Ovilinga Meuaneno?
1. Onalupi omukuendye apondola okuhimbika okulinga etyi tyapopia 1 Timóteo 3:1?
1 “Inkha omulume umwe wovola okuvasa otyilinga . . . meuaneno, uhanda ovilinga oviwa.” (1 Tim. 3:1) Onondaka ombo Huku atuma okuhoneka, mbukuatesako ovakuendye okuovola ovilinga mewaneno. Okuti ukevela ukule opo utyilinge? Otyiwa, wovole okuvasa otyilinga tyina nkhele umukuendye. Okulinga ngotyo, ovakulu vewaneno mavekulongesa, otyivili okulinga nawa otyilinga wapewa opo ukale omukuatesiko wovakulu vewaneno tyina wamekulu. (1 Tim. 3:10) Inkha umukuendye wambatisalua, oñgeni upondola okuovola ovilinga?
2. Oñgeni tyiovolwa otyiwa tyokuhaundapela tyilekesa?
2 Okuhaundapela-ndyambi: Hinangela okuti ove wovola ovilinga oviwa, kuovola omunkhima. Mahi, kala nehando liokukuatesako ovakuatate nonomphange. Onkhalelo imwe yokulinga ngotyo, okusokolola kongeleka ongwa ya Jesus. (Mat. 20:28; João 4:6, 7; 13:4, 5) Ita ku Jeova ekukuateseko opo usuke navakuenyi. (1 Cor. 10:24) Okuti upondola okukuatesako mewaneno vana vakulupa ine vavela? Okuti uhole okuliava opo utete eholi, nokukomba, ine okulinga ovilinga ovikuavo viesukisa Mondyuo Yomaliongiyo? Okuti upondola okuliava opo ulinge onthele Mosikola Yovilinga via Huku tyina una waholovonwa eheile? Liava apeho opo ulinge etyi tyihambukiswa vakuenyi.—Atos 20:35.
3. Omokonda yatyi okukula mopamphepo tyakolela, iya oñgeni upondola okutyilinga?
3 Okupama mopamphepo: Tyakolela unene ovakuatesiko vovakulu vewaneno vakale ovanthu vapama mopamphepo tyipona ounongo vatyitwa nao. Ovanthu vokuapama mopamphepo vatala ovipuka ngetyi Jeova na Jesus vevitala. (1 Cor. 2:15, 16) Vakala “notyinyango tyononkhono mba Huku.” (Gál. 5:22, 23) Ovaivisi vombili vapaka komutwe omasuka Ouhamba. (Mat. 6:33) Mokala omunthu wovituwa oviwa mopamphepo inkha ulinga apeho elilongesa liove. Otyo tyakutikinya okutanga Ombimbiliya ononthiki ambuho, nokutanga kese Mutala Womulavi no Despertai! nokulifuiika nokuenda apeho komaliongiyo. (Sal. 1:1, 2; Heb. 10:24, 25) Etyi Paulu aavela ondundo omukuendye Timoteo opo ekulu mopamphepo, wahoneka okuti, “Tualako okulitala nawa . . . netyi ulongesa.” (1 Tim. 4:15, 16) Lifuiika nawa tyina wamapewa elongomona Mosikola Yovilinga via Huku. Lifuiika nawa tyina ukaivisa, nokutyilinga apeho. Ovola ovilinga meongano, ngetyi oukokoli-ndyila, nokukaundapa ko Mbetele, ine okupita Mosikola Yombimbiliya yo Vakuatate Vahanepele. Okupama momphepo matyikukuatesako “okutila omapeleyo oukuendye.”—2 Tim. 2:22.
4. Omokonda yatyi oukuatyili nokuyumbwa onthumbi viakolela?
4 Okuyumbwa Onthumbi Noukuatyili: Mokonda ovakuatate vapelwe otyilinga tyokutepaulila okulia Ovakristau kotyita tyotete ankho vena “otyilinga tyakolela”, ankho ovakuatyili nokuyumbwa onthumbi, ono apostolu ankho vena onthumbi yokuti mafuisapo nawa otyilinga tyavo. Otyo tyevekuatesako okulinga ovilinga ovikuavo viakolela. (Atos 6:1-4) Ngotyo, tyina wamapewa otyilinga mewaneno, tyilinga nawa-nawa. Hetekela Noe, walandulile nawa onondonga apewa pokutunga owato. (Gên. 6:22) Oukuatyili ku Jeova wakolela unene iya tyilekesa okuti wekula momphepo.—1 Cor. 4:2; tala okakasa “Ouwa Wokulongeswa.”
5. Omokonda yatyi ovakuendye vesukisa kuovola ovilinga?
5 Ngetyi tyaulilwe, Jeova ukahi nokuhongolela ovilinga viokuteya. (Isa. 60:22) Moluotyo, ovanthu ovanyingi hono vekahi nokumbatisalwa kese nima. Mokonda ovanthu ovanyingi vekahi nokuya motyili, kuesukisa ovalume vapama mopamphepo pala okuhongolela omawaneno. Ngotyo, kuna ovilinga ovinyingi movilinga via Jeova. (1 Cor. 15:58) Vakuendye, okuti mukahi nokuovola ovilinga mewaneno? Inkha otyo mukahi nokulinga, mukahi nokuovola ovilinga oviwa!
[Onondaka Mbavilapo pefo 2]
Mokonda ovanthu ovanyingi vekahi nokuya motyili, kuesukisa ovalume vapama mopamphepo paka okuhongolela omawaneno
[Okakasa pefo 3]
Ouwa Wokulongeswa
Ovakuendye vanoñgonoka ovipuka tyiveetela ouwa tyina ovakulu vewaneno vevepa ovilinga nokuvelongesa. Omutalelipo womawaneno wapumphama kopalku ukahi nokupameka omuivisi konyima yeliongiyo. Amono omukuendye omukuavo utai, emupulu inkha nae ukahi nokukevela opo atomphole nae. Omukuendye akumbulula okuti wapewa otyilinga tyokupola ombuma kotribuna tyina eliongiyo liamapu. Ovohe vahanda okuenda, mahi kahande okuenda tyihenelinge otyilinga tyae. Omutalelipo womawaneno nehambu atunduko. Omutalelipo womawaneno ati: “Ovakulu vewaneno valinga nawa okulongesa ovakuendye mokuveavela ovilinga mewaneno. Moluotyo, apeho ndyitalelapo ewaneno lino vaholovona omukuendye akale omukuatesiko wovakulu vewaneno.”