Omapulo Akumbululwa

◼ Okuti omuivisi omphange wesukisa okukuta komutwe inkha vekahi movilinga viokuivisa nomukuatate opo alongese Ombimbiliya omunthu vavasa?

Tyina omuivisi omphange alongesa omunthu umwe apeho Ombimbiliya, iya omuivisi Wouhamba omukuatate opo ekahi una okukuta komutwe. (1 Cor. 11:3-10) Omutala Womulavi 15 ya Julho yo 2002, pefo 27 wahangununa okuti: “Oputyina omunthu omphange alongaisale Ombimbiliya. Onkhalelo oyo yokulongesa ongatyina vekahi mewaneno. Inkha omphange wambatisalua ulongesa otyo pena omukuatate wambatisalua, omphange wesukisa okukuta komutwe.” Tupu utyilinga alo mwe tyina vatunda nomuivisi wehenembatisalwe. Otyo utyilinga tyilinge vekahi mondyuo, ine opepata ine omphangu onkhuavo.

Mahi inkha ulongesa omunthu ankho vehelilaele nae, omphange kesukisa okukuta komutwe tyina pena omukuatate, alo umwe inkha ukatalelapo omunthu opo emulongese Ombimbiliya ine okumulongesa onthele imwe momikanda viapopiwa pala okulongesa ovanthu Ombimbiliya. Mokonda okulongesa ovanthu Ombimbiliya apeho tyituka kokutalailapo vana tuvasa, inkha omphange ulongesa omunthu ovikando ovinyingi, wesukisa okutala nokusoka nawa onalupi mahimbika okukuta komutwe.