Hetekela Ongeleka Yovauli—Sofonia
1. Opi Sofonia aundapele ngomuuli, ongeleka patyi ongwa etuhila hono?
1 Ankho o pokati kotyita epandu vali P.K.E. iya ovanthu mo Judaa vahimbika okufenda Mbaale. Amom ohamba ondingavivi waipawa, iya omukuendye ohamba Josia wahimbika okutumina. (2 Crô. 33:21–34:1) Mokueenda kuomuvo oo, Jeova atumu Sofonia akaivise onondaka mbae mbekoyeso. Namphila Sofonia hamwe wali mombunga yankhimana mo Judaa, kayekelepo okupopia onondaka mba Jeova, mbokuhitisa ononkhalamutwe mbo Judaa. (Sof. 1:1; 3:1-4) Tyelifwa notyo, nonthue tuhetekela Sofonia okukola omutima nokuhayeke onombunga mbetu vetusoyese okufenda Jeova. (Mat. 10:34-37) Onondaka patyi Sofonia aivisile iya oityi mbaeta?
2. Oityi tuna okulinga opo tuholekwe monthiki yonyengo ya Jeova?
2 Okuovola Jeova: Jeova oe vala upondola okuyovola ovanthu monthiki yonyengo yae. Ngotyo, Sofonia walondola ovanthu mo Judaa vaovole Jeova, vaovole ouviuki, vaovole oundalawa tyina onthiki oyo ihenehikepo. (Sof. 2:2, 3) Otyo tyelifwa no nonthiki mbetu. Nga Sofonia, nonthue tulunda vakuetu vaovole Jeova, mahi nonthue tuna okulinga atyiho, opo tuhayeke natyike “tyituyapule okulandula Jeova.” (Sof. 1:6) Anthi, tuovola Jeova mokutanga Ondaka yae nokulikuambela okuita etuhongolele. Tuovola ouviuki mokukala novituwa viasukuka. Tuovola oundalawa mokukala notyituwa tyokutavela atyiho tupopilwa nokulandula ehongolelo tupewa neongano lia Jeova.
3. Omokonda yatyi tuesukisila okuundapa nonthumbi movilinga viokuivisa?
3 Ouwa Utundako: Onondaka mbekoyeso Sofonia aivisa mo Juda, kavehi vembutavelele mahi ovanyingi vamuene omukuendye Josia, wahimbika okuovola Jeova etyi nkhele omukuendye. Josia konyima alingi ovilinga ovinene okunyima efendelo liomatutu motyilongo. (2 Crô. 34:2-5) Hono, namphila ombuto Youhamba imwe itokela konthele yetapalo, no pomamanya ine pokati komankhondo, mahi imwe itokela peheke likahi nawa aiyaave ovinyango. (Mat. 13:18-23) Tuna onthumbi yokuti Jeova mayambe ononkhono tulinga mbokuundapa unene okukuna ombuto Youhamba.—Sal. 126:6.
4. Omokonda yatyi tuesukisila ‘okukevelela Jeova’?
4 Vamwe mo Judaa vasokele okuti hamwe Jeova nalumwe maeta ehanyauno. Mahi, Jeova apopi okuti onthiki yae onene ikahi popepi. (Sof. 1:12, 14) Mavahupu ovo vana vala vaovola okuholama mwe. (Sof. 3:12, 17) Putyina tukahi ‘nokukevelela Jeova,’ tupondola okukala nehambu liokuumbila kumwe novafendi vakuetu Huku yetu omunene!—Sof. 3:8, 9.