Oñgeni Jeova Anthala?
1. Oñgeni Ombimbiliya ikahi ngotyivandyelo?
1 Ovikando viñgapi ove ulitalela motyilivandyelo? Tulitalela motyilivandyelo ononthiki ambuho mokonda tyitukuatesako okutala ovipuka vimwe kolutu luetu viesukisa okuviukiswa. Ombimbiliya ikahi ngotyilivandyelo. Okutanga Ondaka ya Huku tyitukuatesako okutala mokati ketu, muna Jeova atala. (1 Sam. 16:7; Tia. 1:22-24) Ondaka ya Huku ipondola “okupunga omalusoke nomahando omutima.” (Heb. 4:12) Oñgeni okutanga Ombimbiliya ononthiki ambuho nokusokolola kuetyi tuatanga tyitukuatesako okutala opi tuesukisa okupama opo tutyivile okuava nawa oumbangi?—Sal. 1:1-3.
2. Oñgeni Ombimbiliya itukuatesako okulitala nawa?
2 Undapesa Ombimbiliya Ngotyilivandyelo: Omahipululo Ombimbiliya ovaumbili vekolelo va Jeova etulongesa ovituwa oviwa, Huku etavela. Mongeleka, David wakalele nombili nenyina lia Huku. (1 Sam. 17:45, 46) Isaia nomutima wakola weliavele opo akaivise, motyilongo tyepuiya. (Isa. 6:8, 9) Ohole onene Jesus ena na Tate yae keulu yemukuatesako okutala ovilinga viokuivisa ngatyina ondyivindyivi yepameko nokuhambukiswa, tyipona okuvitala ngatyina vialema. (João 4:34) Ovakristau votete vaivisile nombili, nokuyumba onthumbi mu Jeova, avatokola okuhayekepo ovilinga ovio. (Atos 5:41, 42; 2 Cor. 4:1; 2 Tim. 4:17) Okusokolola konongeleka ombo tyitukuatesako okulitala etyi tuesukisa okulinga vali nawa opo tuundape nawa movilinga via Huku.
3. Omokonda yatyi katupondola okuti ha tulinga nawa omapiluluko tuesukisa?
3 Viukisa Etyi Tyapenga: Tyotyili, tyina tulitalela motyilivandyelo inkha tumona etyi tyapenga tutyiviukisa. Tupondola okuita ku Jeova etukuatesako okulitala nawa nokulinga omapiluluko esukisa. (Sal. 139:23, 24; Luc. 11:13) Mokonda omuvo wahupako kauhi iya muakutikinya omuenyo wetu, katupondola okuti ha tulinga nawa tyina pena etyi tuesukisa okuviukisa.—1 Cor. 7:29; 1 Tim. 4:16.
4. Oityi tyimoneka tyina omunthu anyingila mondaka ya Huku, alingi ngetyi avasamo?
4 Etyi tuatuwa mokati, etyi Jeova atala, otyo tyakolela vali tyipona olupe luetu. (1 Ped. 3:3, 4) Oityi tyimoneka tyina omunthu anyingila mondaka ya Huku, alingi ngetyi avasamo? Oe kakala “omuteheleli ulimbuako, mahi omulingi wovilinga, iya makala nehambu mokuvilinga.” (Tia. 1:25) Tyotyili, matukala ovaivisi ovanongo vena ehambu mokonda “tulekesa ngotyivandyelo omunkhima wa Jeova.”—2 Cor. 3:18.