Uundapesa Nawa Onkhalelo Omukanda Ombimbiliya Ilongesa Walingwa
Tyina omulongwa atualako okunoñgonoka etyi Ombimbiliya tyili-tyili ilongesa iya aendela menoñgonoko olio, makala noupanga omuwa na Huku, ahimbika okuava ovinyango viospilitu. (Sal. 1:1-3) Onthue tupondola okukuatesako ovalongwa vetu okukula motyili tyina tuvelongesa nawa nomukanda Ombimbiliya Ilongesa.
Omapulo Okuhimbika: Ovikapitulu vihimbika nomapulo makumbululwa mokapitulu oko. Upondola okulinga omapulo oo, opo ukuatesako omulongwa okusuka netyi mamulilongesa. Tupu upondola okumuita apopie tyahasete konthele yomapulo oo. Ankho upopia etyi tyahaviuikile, muyeka vala nkhele. Etyi mapopi, matyikukuatesako okutala apa esukisa okukuatesako, iya ohangununapo nawa.—Pro. 16:23; 18:13.
O apendise: Ankho omulongwa wanoñgonokale nawa ovipuka viakolela iya uvitavela, upondola okumuavela ondundo opo elilongese aike o apendise ipopia konthele yokapitulu oko. Onthiki onkhuavo tyina wameya, momuvo wehehi upondola okutala ankho wetyinoñgonoka etyi elilongesa aike mo apendise. Mahi, pala apolepo ouwa, mokueenda kuelilongeso lienyi, mupondola okupopia konthele yo apendise, mokutanga onopalagrafu, omulingi omapulo omakuavo wafuiika.
Okakasa Kokupitulula: Pokakasa kokupitulula, pena omakumbululo omapulo aeho okuhimbika. Upondola okuundapesa okakasa oko opo utale inkha omulongwa wanoñgonoka nawa etyi muelilongesa nononthele mbakolela. Tanga omakumbululo oo aeho, no notestu mbatyo. Konyima oiti omulongwa apopie oñgeni ono testu mbelikuata nomakumbululo.—Atos 17:2, 3.