OMUENYO WETU WOUKRISTAU
Uhalimbueko Okuitilako Ovakuatate Vekahi Nokumoneswa Ononkhumbi
Ombimbiliya yapopile-ale okuti Satanasi metumonesa ononkhumbi opo tuyekepo ovilinga vietu viokuivisa. (João 15:20; Apo. 12:17) Oñgeni matukuatesako ovakuatate vetu Ovakristau vakala kovilongo ovikuavo vekahi nokumoneswa ononkhumbi? Tupondola okuveitilako melikuambelo. “Elikuambelo liomuviuki, tyina liamalingwa nomutima auho, lina ononkhono ononene.”—Tia. 5:16.
Oityi matupopi melikuambelo? Tupondola okuita ku Jeova opo aavele ononkhono ovakuatate vetu no nomphange, nokuvekuatesako opo vahatile owoma. (Isa. 41:10-13) Tupu, tupondola okuitilako ovatumini vetavele ovilinga vietu viokuivisa “opo vatualeko nomuenyo ukahi nawa nokuapoleya.”—1 Tim. 2:1, 2.
Puetyi Paulu na Petulu ankho vekahi nokumoneswa ononkhumbi, Ovakristau vo potyita tyo tete veveitilileko melikuambelo avatumbulapo umwe omanyina avo. (Atos 12:5; Rom. 15:30, 31) Namphila pamwe tuehei omanyina ovakuatate vekahi nokumoneswa ononkhumbi hono, mahi okuti tupondola okutumbula omawaneno avo ine ovilongo vakala?