Yakulila Ovitumino via Jeova

Jeova Huku utupopila etyi tyaviuka netyi tyapenga konthele yovituwa vietu. Mongeleka, wapopia okuti omulume nomukai velinepa kavapondola okulihenga. (Mat. 19:4-6, 9) Jeova uyele ononkhalelo ambuho mboundalelapo. (1 Cor. 6:9, 10) Jeova utupopila oñgeni tuna okuholovona omuvalo nokulihiviswa. Tyina ovanthu vae valandula onondonga mbae, vakala tyelikalela.​—Deu. 22:5; 1 Tim. 2:9, 10.

Mouye uno, ovanthu ovanyingi kavetavela etyi Jeova apopia okuti otyo tyaviuka. (Rom. 1:18-32) Vaholovona okuvala nokukala novituwa ovivi viovanthu vahalandula ovitumino. Ovanyingi vahambukilwa ovivi iya vapopia omapita vana vaendela movitumino via Jeova.​—1 Ped. 4:3, 4.

Mokonda Tunombangi mba Jeova, tuna okuamena etyi Jeova apopia okuti otyo tyaviuka. (Rom. 12:9) Ñgeni? Nomutima wakola, tuna okuvepopila etyi Jeova apopia okuti otyo tyaviuka. Tupu tuesukisa okueendela muetyi Jeova etulongesa. Mongeleka, tyina tuholovona omuvalo nokulifuiwisua, tuna okulipula okuti: ‘Ovikutu viange vilekesa okuti ndyiendela movitumino via Jeova ine o movitumino viouye uno? Ovikutu viange nonkhalelo yokuvala vindyimbukisa okuti ndyi Mukristau una onthilo na Huku?’ Ine tyina tuholovona etyi matutale mo televisau tuna okulipula okuti: ‘Okuti Jeova upanda etyi ndyikahi nokutala? Okuti o programa ndyitala ipopia onkhalelo ovanthu vouye vasoka? Okuti mainyono etokolo liange liokukakatela muetyi tyaviuka? (Sal. 101:3) Okuti o programa oyo maipundukisa umwe mombunga yange ine omunthu omukuavo?’​—1Cor. 10:31-33.

Omokonda yatyi tyakolela okuamena etyi Jeova apopia okuti otyo tyaviuka? Mokonda Jesus Kristu apa katutu makahanyako ouye uno novivi vilinguamo. (Eze. 9:4-7) Mahi vana valinga ehando lia Huku ovo vala mavakahupa. (1 João 2:15-17) Tuhanda okulinga atyiho opo tuyakulile ovitumino via Jeova. Okulinga ngotyo, ovanthu mavamono ovituwa vietu oviwa iya avankhimaneka Huku.​—1 Ped. 2:11, 12.

TALA O VIDIU YATI KALA EPANGA LIA JEOVA​—OMULUME NOMUKAI IYA KONYIMA, AMUKUMBULULA OMAPULO MAALANDULA-KO:

• Omokonda yatyi ounongo okulinga etyi Jeova apopia okuti tyaviuka?

• Omokonda yatyi ovohe vena okulongesa ovana vavo ovitumino via Jeova tyina nkhele ovatutu?

• Oñgeni ovakuatate aveho, alo umwe ovana vena okukuatesako vakuavo okutambula ononkhano onongwa mba Jeova?