‘Paulu Tyemupamekele iya Apandula ku Huku’

Etyi ovakuatate mo Loma vetyiiva okuti Paulu ukahi nokuya, avaende onokilometu 64 opo vahonyenene. Otyo tyakalesile ñgeni Paulu? “Etyi Paulu evemona atyimupameka iya apandula ku Huku.” (Ovil. 28:15) Paulu ankho apeho upameka omawaneno atalelapo, mahi etyi apakwa mokaleya, pahe ankho oe upamekwa. — 2 Kol. 13:10.

Hono ovatalelipo vomawaneno vapameka ovakuatate nonomphange. Navo vekahi vala ngonthue, pamwe vaponwa, vakala notyiho, alo umwe vasoya. Onthiki ewaneno lienyi litaleluapo, oityi upondola okulinga opo ukuateseko omutalelipo womawaneno nomukai wae opo “mulipameke pokati?” — Loma. 1:11, 12.

• Enda komaliongiyo okuenda movilinga viokuivisa. Omutalelipo womawaneno upama tyina atala ononkhono ovaivisi valinga opo vaye movilinga viokuivisa osimanu aiho. (1 Tes. 1:2, 3; 2:20) Upondola okukala omukokoli-ndyila wapola pokati ohanyi mutaleluapo. Okuti upondola okuliava opo uundape nae ine nomukai wae movilinga viokuivisa, na tyina ukalongesa omulongwa wove? Vahambukwa okuundapa novaivisi velikalaila, tyilinge ovape ine vana vehena ounongo wokuivisa.

• Vetambula nawa. Okuti upondola okuvelaleka meumbo liove ine okuveavela okulia? Otyo matyilekesa okuti uvehole, iya ngwe mavahambukwa. Kavakevelela uvelingile ovipuka ovinene. — Luka 10:38-42.

• Tyina upakelwa-mo navo tavela iya oendela-mo. Ovatalelipo vomawaneno vetukuatesako noluembia opo tulinge nawa ovilinga vya Siovaa. Pamwe mavetuviyula tyimwe. (1 Kol. 5:1-5) Tyina tutavela, tyivehambukiswa unene. — Heb. 13:17.

• Vepandula. Popila omutalelipo womauaneno nomukai wae ouwa wapola kononkhono valinga. Upondola okuvepopila ine okuvehonekela omukanda. — Kolo. 3:15.