Vohe, Longesei Ovana Venyi Etyi Vesukisa Okunoñgonoka

Tuli mouye mulingwa ovipuka vituhongiliya okusoka okuti otyiwa otyivi iya otyivi otyiwa. (Isa. 5:20) Vamwe valinga ovipuka Siovaa eyele, ngetyi ovanthu valala poyavo. Kosikola ovana vahongiliyua okulinga ovipuka ovana ovakuavo valinga. Ñgeni upondola okulongesa ovana vove opo vahalinge ovipuka ovio vakuavo valinga?

Longesa ovana vove opo vetavele ovitumino vya Siovaa. (Lev. 18:3) Katutu-katutu longesa ovana vove etyi Ombimbiliya ipopia konthele yotyinepo tyopoula. Tyina uvelongesa una okutalela keti liavo nokovipuka veyale. (Deut. 6:7) Lipula okuti: ‘Okuti nalongesa-le ovana vange oityi vahapondola okulinga tyina vanyana na vakuavo? Okuti nevelongesa-le omokonda yatyi vesukisila okuvala ovikutu vikahi nawa? Okuti nevelongesa-le omokonda yatyi ovana ovakuavo vena okukala nonthilo navo? Okuti ovana vange vetyii oityi mavalingi tyina vamalekeswa ovanthu valinga ovinepo viasila, ine tyina vamahongilinyua okulinga etyi Siovaa apopia okuti tyapenga?’ Ounongo mauvekuatesako okulityika ovivi. (Pro. 27:12; Ecl. 7:12) Tyina ulongesa ovana vove ulekesa okuti uvehole mokonda ovana epingo lya Siovaa. — Sal. 127:3.

HIKISA OVIDIU YATI: TUNGA ONDYUO MAITUALAKO TYAPAMA — YAKULILA OVANA VOVE “KOVIPUKA OVIVI,” IYA KONYIMA AMUKUMBULULA OMAPULO AA:

• 

  Omokonda yatyi vamwe vena ohonyi yokupopia novana vavo otyinepo tyopoula?

• 

  Omokonda yatyi ovohe vesukisila okulongesa ovana vavo “etyi tyelikuata netyi Siovaa apopia?” — Efe. 6:4.

• 

  Ovipuka patyi tupewa neongano lya Siovaa vikuatesako ovohe okupopia novana vavo otyinepo tyopoula? — “Omutala Womulavi 05/2019 pokakasa keli pefo 12.

• Omokonda yatyi wesukisila okupopia novana vove apeho, tyina nkhele vehenekale novitateka ovinene?