OMWENYO WETU WOUKILISITAU
Oityi Tulilongesila ku Samuele?
Tundee poututu Samuele walingilile Siovaa atee akanyima. Puetyi omututu, kalingile ovipuka ovivi ovana va Eli, ovo Ofini na Fineya, ankho valinga. (1 Sam. 2:22-26) Siovaa apeho ankho umukuatesako. (1 Sam. 3:19) Etyi pahe akulupa, ovana vae ankho kavesukile-ale novitumino vya Siovaa. Mahi no ngotyo Samuele ahayeke-ko Huku yae. — 1 Sam. 8:1-5.
Oityi tulilongesila ku Samuele? Ankho omukuendye, oo hamwe umuhikuena, hinangela apeho okuti Siovaa ukwii nawa, wii ovitateka viove, netyi vikukalesa. Mekukuatesako ohatili owoma ovitateka viove. (Isa. 41:10, 13) Iya ine una ovana vayekapo Siovaa, oityi upondola okulilongesila ku Samuele? Samuele kakuluminyine ovana vae ati: ‘Ngaliti pano muna okutavela ovitumino vya Siovaa.’ Otyitateka otyo wetyiyekele pomavoko a Siovaa, ngwe atualako vala okulinga etyi tyihambukiswa Tate yae wokeulu. No ove linga nga Samuele. Tualako vala okulingila Siovaa, Huku yove, hamwe ha kumbi ovana vove vatalela kuove, avakondoka motyili.
TALA OVIDIU YATI: LILONGESILA KUVO — SAMUELE, PAHE OKUMBULULA OMAPULO AA:
Oityi Samuele alingile puetyi omona, mahi okutyilinga ankho tyitilisa owoma?
Oityi Daniele alingile mahi ankho okutyilinga katyapepukile?
Etyi Samuele akulupa, oityi alingile tyikahi nawa?
Siovaa ukuatesako ovanthu vana vahula ku etyi tyaviuka
Oityi ovo tate ya Daniele valinga tupu tyikahi nawa?