Oityi Matyikuhongolela Ukakale Nawa

Ngetyi tuamona mononthele mbokualamba, ovanthu vahanda okukala nomuenyo ukahi nawa. Mokonda yotyo vayumba onthumbi monombongo, mokulongeswa monosikola ononene nokukala omunthu wonondunge. Okuyumba onthumbi movipuka ovio tyikahi ngatyina wahanda okuenda kotyilongo tyimwe wehei mahi otalela komapa yotyilongo otyikuavo. Mahi okuti otyo tyilekesa okuti, petupu natyike tyituhongolela tyiyumbwa onthumbi? Au, pena umwe!

OKUHONGOLELWA NOMUNTHU OMUNONGO VALI

Tyina tuna etyi tuhanda okulinga tupula komukulu, omunongo vali ku onthue. Tupu opo tukakale nomuenyo omuwa komutwe wandyila, tuesukisa okuhongelelwa nomunthu omukulu, omunongo vali ku onthue. Onondongwa mbomunthu oo omukulu omunongo mbahonekwa omanima 3.500 konyima. Onondongwa ombo tumbuvasa momukanda utiwa Ombimbiliya.

Okuti upondola umwe okuyumba onthumbi muetyi Ombimbiliya ipopia? Eenga mokonda Hekulu omukulu, Omunthu omunongo vali ku aveho. Ombimbiliya imupopia okuti, “Omukulu Wononthiki” ‘uhena onthyimbi nii onthyulilo.’ (Daniel 7:9; Salmo 90:2) Ngwe “Omutungi weulu, o Huku yotyotyili, Una walinga ohi.” (Isaías 45:18) Tupu wetupopila okuti enyina liae litiwa, o Siovaa. — Salmo 83:18.

Ombimbiliya kaipopi okuti ovanthu vamwe vesukisa vali ku vakuavo, mokonda aveho vatungwa vala Nomutungi wike. Etyi Ombimbiliya ilongesa tyikuatesako ovanthu aveho movipuka ovinyingi, katyesukisile omo tyilongo patyi eli. Tupu Ombimbiliya ikahi nokupitiyua nokuavelwa ovanthu momalaka omanyingi tyipona omikanda omikuavo.a Otyo tyilekesa okuti ovanthu vatyo aveho, vapondola okunoñgonoka etyi ipopia, aivehongolela. Otyo, otyo umwe Ombimbiliya yatyo muene ipopia:

“Huku utupu okapungulula, mahi momalongo aeho omunthu una onthilo nae nokulinga etyi tyaviuka umutavela.” — OVILINGA 10:34, 35.

He yovana una oluembia uhongolela ovana vae. Na Siovaa Huku mokonda utuhole utuhongolela Nondaka yae Ombimbiliya. (2 Timotiu 3:16) Ove upondola okuyumba onthumbi muetyi tyipopia Ombimbiliya, mokonda Siovaa wii etyi tuesukisa tukale nehambu.

YUMBA ONTHUMBI MOMBIMBILIYA

Onthue tupondola umwe okuyumba onthumbi mu Mbimbiliya, mokonda ovipuka vikahi nokumoneka mononthiki mbetu, Ombimbiliya yevipopia-le omanima 2000 konyima. Ombimbiliya yapopia-le ovituwa viovanthu konthyulilo noviponga ovikuavo ankho mavimoneka.

OVIPONGA

“Otyilongo matyikalwisa otyilongo otyikuavo, ouhamba maukalwisa ouhamba omukuavo. Makukamoneka ovinimawe ovinene, ponomphangu ononyingi mapakakala ondyala nomikihi.” — LUKA 21:10, 11.

OVITUWA VIOVANTHU

“Mahi noñgonoka okuti kononthiki mbahulilila makukakala omivo vialema unene, viepuiya okukala. Mokonda ovanthu mavakakala ovanthu velihole ovo muene, vehole onombongo, vokulihapa, vomalityindailo, vapopia omapita Huku, vokuhetavela kovohe, vokuhapandula, vehevakuatyili, vehena oluembia novanthu, vehetavela okulipakela-mo, vokutendeleya, ovakalavi, vehena ohole notyiwa, ovapakuli, vokuna onkhango, vokulipakako, vokuhole evi vivehambukiswa tyipona Huku.” — 2 TIMOTIU 3:1-4.

Oityi tusoka, tyina tutala okuti etyi Ombimbiliya yapopia kohale tyikahi nokufuisuapo hono? Tyipondola no ove utavela etyi tyapopia Leung, ukala ko Hong Kong, wati: “Apa omaulo Ombimbiliya ahonekwa, okohale. Petupu omunthu utyivila okupopia nawa-nawa ovipuka mavikamoneka komutwe. Ombimbiliya yatumwa okuhonekwa nomunthu omunongo vali ku aveho.”

Mombimbiliya muna ovipuka ovinyingi viapopilwe, pahe avimoneka umwe.b Otyo tyilekesa okuti Ombimbiliya naina Ondaka ya Huku umwe. Siovaa wati: “Ame Huku, kutupu ou welifwa na ame.” “Tunde konthyimbi ndyipopia etyi matyiya.” (Isaías 46:9, 10) Naina tupondola okuyumba onthumbi muetyi Ombimbiliya ipopia okuti matyimoneka komutwe wandyila.

TYIPOPIA OMBIMBILIYA TYITUKUATESAKO PEHEPANO NO KOMUTWE

Ine tuendela muetyi Ombimbiliya ipopia matyituetela ouwa. Tutalei vimwe Ombimbiliya ipopia.

WEHELIPAE NOVILINGA NOKUOVOLA ONOMBONGO

“Hahe vali okupululukua-po katutu, tyipona okuundapa unene olambesa, otyo okutaata omphepo.” — ECLESIASTES 4:6.

OMBUNGA MAIKALA NEHAMBU

“Kese wike pu onwe una okukala nohole nomukai wae ngetyi elihole; tupu, omukai una okukala nonthilo onene nomulume wae.” — OVA EFESU 5:33.

OVANTHU MAVEKELIVILA NA VAKUAVO

“Yekapo okunumana, saapo onyengo; Uhatokotelwe vala nonyengo pala okulinga ovivi.” — SALMO 37:8.

Okuendela muetyi tyipopia Ombimbiliya matyitukuatesako pahetyino, nokukakala nomuenyo omuwa komutwe wandyila. Tupu Mombimbiliya tuvasa-mo ovipuka oviwa Huku makalingila ovanthu.

OVANTHU MAVAKAKALA NOMBEMBWA

“Ovaviuki mavakapiñgana ohi, avakakala nombembwa onene.” — SALMO 37:11.

OVANTHU AVEHO MAVAKAKALA NOKULIA NOMAUMBO

“Mavakatunga onondyuo avakalamo, mavakatuika omiti avakalia ovinyango viavio.” — ISAÍAS 65:21.

PETUPU OU MAKAVELA NOKUNKHIA

‘Ononkhia kamambukakala-ko vali, nii okuliyava, nii okulila nii omaluihamo kavikakala-ko vali.’ — EHOLOLOLO 21:4.

Oityi wesukisa okulinga ukakale nomuenyo omuwa? Onthele mailandula-ko otyo maipopi.

a Opo unoñgonoke vali omalaka Ombimbiliya iya nokupitiyua nokuavelwa ovanthu nyingila mo internet mo site www.jw.org oende pati OMALONGESO OMBIMBILIYA > OMAHIPULULO & OMBIMBILIYA.

b Opo unoñgonoke vali tala okapitulu 9 komukanda A Bíblia — Palavra de Deus ou de Homem? walingua Nonombangi mba Siovaa. Upondola okuupola mo www.jw.org. Enda pana pati OMIKANDA > OMIKANDA & ONOMBULUSULA.