Tavela Konkhalamutwe Yetu Sesusi

1. Hono, oityi Siovaa ahanda?

HONO, Huku uhanda onondaka onongwa Mbouhamba mbuiviswe kombanda yeheke aliho. (Malu. 13:10; 1 Tim. 2:3, 4) Otyilinga etyi otya Siovaa, otyo akoyela Omona wae ahongolele otyilinga etyi. Onthwe tuna onthumbi yokuti mokonda Sesusi oe ukahi nokuhongolela ovilinga ovio, ovilinga viokuivisa mavilingwa atee apa Siovaa ahanda tyina nkhele onthyulilo youye uno yeheneye. — Mat. 24:14.

2. Oityi matulilongesa monthele ei?

² Monthele ei, matulilongesa oñgeni Sesusi ekahi nokukuatesako “omupika omukuatyili nokualunguka” okuava okulia kuopaspilitu, nokuonganeka ovalanduli vae movilinga viokuivisa vikahi nokulingwa mouye auho. (Mat. 24:45) Tupu, matutale etyi onthwe tupondola okulinga opo tukuateseko Sesusi nomupika omukuatyili nokualunguka.

SESUSI OE UKAHI NOKUHONGOLELA OVILINGA VIOKUIVISA

3. Outumini patyi Sesusi apewa?

³ Sesusi oe ukahi nokuhongolela ovilinga viokuivisa. Oñgeni onthwe tutyii? Etyi eheneende keulu, Sesusi weliongiyile novalanduli vae ovakuatyili komphunda yo Galileia. Evepopila okuti: “Huku wampha outumini wovipuka viatyo aviho, keulu no pohi.” Tala vali otyipuka otyikuavo apopia. Wati: “Ngotyo, endei, kalongesei ovanthu vomalongo aeho opo vakale ovalongwa.” (Mat. 28:18, 19) Ngokuti, otyilinga otyinene vali Sesusi apewa, okuhongolela ovilinga viokuivisa.

4. Oityi tyitukalesa nonthumbi yokuti Sesusi ukahi nokuhongolela nawa ovilinga viokuivisa?

⁴ Sesusi wapopile okuti ovilinga viokuivisa nokulinga ovalongwa ankho mavihiki kovanthu ‘vomalongo aeho’ iya ankho makala novalanduli vae “ononthiki ambuho alo konthyulilo youye ou.” (Mat. 28:20) Onondaka ombo mbulekesa okuti ovilinga viokuivisa ankho mavilingwa tyihongolelwa na Sesusi atee mononthiki mbuno.

5. Oñgeni onthwe tukahi nokukuatesako okufuisapo eulo livasiwa mo Salmo 110:3?

⁵ Sesusi ankho utyii umwe nawa okuti ovanthu mavekeliava vaundape movilinga viokuivisa mokueenda kuomuvo wonthyulilo. Tupu ankho utyii okuti onondaka mbuvasiwa mo Salmo mbati: “Ovanthu vove mavekeliaava nomutima wavo auho monthiki yovilwa viove,” mambukafuiswapo. (Sal. 110:3) Ngotyo, ine noove ukahi nokuivisa onondaka onongwa, opo ukahi nokukuatesako Sesusi nomupika omukuatyili nokualunguka, opo eulo olio lifwisuepo. Otyilinga otyo tyikahi umwe nokulingwa nawa, mahi tupu katyapepukile.

6. Ovitateka patyi ovaivisi Vouhamba wa Huku venavio mononthiki mbuno?

⁶ Otyitateka tyimwe ovaivisi Vouhamba venatyo, okuyelwe. Tyatyi umwe ovokuatyitukila-po otyili, ononkhalamutwe mbonongeleya, ovatumini, veyele ovilinga vietu viokuivisa. Tyina onombunga mbetu, novanthu ovakuavo, na vana tuundapa navo veiva ovipuka ovio, vetukuluminya tuyekepo okuumbila Siovaa nokuivisa. Iya kovilongo vimwe, ovaivisi vailikwa umwe okuivisa, valingwa onya vavetwa nokupakwa movikaleya. Otyipuka otyo, onthwe katyituhuvisa, mokonda Sesusi wapopile okuti: “Mamukayalwa novanthu aveho mokonda yenyina liange.” (Mat. 24:9) Naina, tyina ovanthu vetulinga onya, otyo tyilekesa okuti onthwe tuapandwa na Siovaa. (Mat. 5:11, 12) Eliapu olio likahi nokuhinda oundyale oo. Mahi Sesusi una vali ononkhono Keliapu! Onondaka onongwa mambuiviswa kovanthu vomalongo aeho, mokonda Sesusi oe ukahi nokuhongolela ovilinga ovio. Tutalei tyimwe tyityilekesa umwe nawa.

7. Oityi ove weete tyilekesa okuti omukanda Eholololo 14:6, 7 ukahi umwe nokufuisuapo?

⁷ Otyitateka otyikuavo onthwe vaivisi tuna, omokonda ovanthu tuivisa vapopia omalaka elikalaila. Memonekelo limwe Sesusi alekesile omu apositolu Suau, wapopile okuti onondaka onongwa mambukaiviswa momalaka omanyingi. (Tanga Eholololo 14:6, 7.) Ñgeni ngotyo? Onthwe tuavela ovanthu ovanyingi omphitilo yokutehela onondaka onongwa Mbouhamba. Hono, ovanthu ovanyingi mouye vapondola okutanga ovipuka ovinyingi vivasiwa mo jw.org momalaka alamba po 1.000. Tupu pahe tuna omukanda omupe utukuatesako okulinga ovalongwa wati Kalako Nomwenyo Apeho! wapitiyua momalaka alamba po 700! Okulia kuopasipilitu pahe okunyingi. Tyati vala onthwe tuna omikanda viangalavalwa, tupu kukahi nokulingwa omikanda momalaka onompholo. Tuete omaulo omanyingi Ombimbiliya ekahi nokulifuila-po. Ovanthu ‘vomalaka aeho ovilongo’ vekahi nokulilongesa okupopia “elaka liasukuka,” otyili tyo Mbimbiliya. (Zac. 8:23; Sof. 3:9) Ovipuka ovio aviho vikahi vala nokulingwa mokonda Sesusi Kilisitu oe ukahi nokuhongolela ovilinga viokuivisa.

8. Ovilinga viokuivisa, vikahi nokueeta ouwa patyi?

⁸ Hono, ovanthu valamba po 8.000.000, movilongo vina 240 veliwaneka neongano lya Siovaa iya omanima aeho ovanthu vena onomili ekwii, vambatisalwa! Tyesukisa hambalululo vala, mahi ovanthu vekahi nawa, ‘velivaleka ontheto omphe.’ (Kolo. 3:8-10) Ovanyingi vayekapo ovituwa ovivi, noungangala, nokapungulula. Eulo livasiwa mu Isaías 2:4, liokuati “kamavakalongeswa vali okulwa” likahi nokufuisuapo. Tyina tulinga ononkhono mbokulivaleka ontheto omphe, tukuatesako ovanthu okuya meongano lya Huku iya tulekesa okuti tulandula onkhalamutwe yetu, Sesusi. (Suau 13:35; 1 Petulu 2:12) Oñgeni tukahi nokutyivila okulinga ovipuka ovio aviho? O Sesusi ukahi nokutukuatesako.

SESUSI WAKOYA OMUPIKA

9. Ngetyi tyipopia Mateusi 24:45-47, oityi Sesusi apopile ankho matyilingwa momuvo wonthyulilo?

⁹ Tanga Mateusi 24:45-47. Sesusi waulile okuti momuvo wonthyulilo ankho makoyo “omupika omukuatyili nokualunguka,” opo aavele okulia kuopaspilitu ovanthu vae. Onthwe tutyii okuti omupika ukahi nokulinga nawa otyilinga tyae mononthiki mbuno. Iya otyilinga otyo kekahi vala nokutyilinga aike. Onkhalamutwe yetu Sesusi ukahi nokukuatesako otyikundyi otyitutu tyovalembulwa opo vaavele okulia kuopaspilitu ovanthu va Huku “momuvo wanakua.” Ovalembulwa ovo kavelitale ngatyina ovo vatumina ekolelo liavakuavo. (2 Kol. 1:24) Mahi vetyii okuti Sesusi Kilisitu oe “onkhalamutwe iya omutumini” wovanthu va Huku. — Isa. 55:4.

10. Omukanda patyi wekukuatesako okunoñgonoka Siovaa?

¹⁰ Okuhimbikila mo 1919, omupika omukuatyili nokualunguka, ukahi nokutuavela omikanda vihole okukuatesako ovanthu ovanyingi okunoñgonoka Ondaka ya Huku. Mo 1921, omupika walingile omukanda itiwa A Harpa de Deus ankho ukuatesako vana vesuka notyili okunoñgonoka otyili tyivasiwa mo Mbimbiliya. Etyi pakala, akulingwa vali omikanda omikuavo. Omukanda patyi wekukuatesako okunoñgonoka Siovaa nokumuhumba? Okuti omukanda “Seja Deus Verdadeiro,” Owokuati A Verdade Que Conduz à Vida Eterna, owokuati Poderá Viver Para Sempre no Paraíso na Terra, owokuati Conhecimento Que Conduz à Vida Eterna, owokuati Oityi Ombimbiliya Tyilityili Ilongesa, ine owokuati Oityi Ombimbiliya Itulongesa?, Ine omukanda omupe wokuti Kalako Nomwenyo Apeho!, Kese wike pomikanda ovio, walingilwe umwe momuvo ankho maukuatesako ovanthu ovanyingi movilinga viokuivisa.

11. Oityi tuesukila okulilongesa konthele ya Siovaa, Nondaka yae?

¹¹ Ovanthu vokuesuka notyili havoko vala vena okunoñgonoka Siovaa no Mbimbiliya. Otyo otyipuka atuho tuna okulinga. Omu apositolu Paulu wahoneka okuti: “Okulia kuakola o kuovanthu ovakulu.” Paulu wayawisako okupopia okuti okulia kuakola kutukuatesako “okuimbuka otyiwa notyivi.” (Heb. 5:14) Momuvo uno wokuepuiya tyina ovanthu valinga ngoti vetupu onondunge, pamwe tyipondola okutupuiya okueendela movitumino vya Siovaa. Mahi Sesusi utyii okuti opo tukale nekolelo liapama, tuesukisa okulia kuopaspilitu. Okulia oko kutunda Mondaka ya Huku, Ombimbiliya. Omupika omukuatyili oe ukahi nokuhongolelwa na Sesusi alinge okulia nokutuavela-ko.

12. Oñgeni onthwe tunkhimaneka enyina lya Huku, ngetyi ankho tyilinga Sesusi?

¹² Ngetyi ankho tyilinga Sesusi, (Suau 17:6, 26) Mongeleka, etyi tyati mo 1931, tualukwa enyina liapolwa umwe Mondaka ya Huku, okuti Onombangi mba Siovaa. Mokualinga ngotyo, tualekesa okuti enyina lya Huku lina esilivilo enene kuonthwe. (Isa. 43:10-12) Iya okuhimbikila mohanyi ya Outubro yenima olio, enyina lya Huku alihimbika okupakwa kefo lio kondye Liomutala Womulavi. Tupu, Ombimbiliya Tradução do Novo Mundo das Escrituras Sagradas yakondola enyina lya Huku ponomphangu ankho livasiwa. Otyo tyelikalela umwe unene netyi tyilinga ononkhalamutwe mbonongeleya, vapola enyina lya Huku mono Mbimbiliya mbavo.

SESUSI WONGANEKA OVALANDULI VAE

13. Oityi tyikukalesa nonthumbi yokuti Sesusi ukahi nokutuhongolela pokati “komupika omukuatyili nokualunguka” mononthiki mbetu? (Suau 6:68)

¹³ Pokati “komupika omukuatyili nokualunguka”, Sesusi ukahi nokuonganeka eongano lya Huku opo ovanthu vemufende monkhalelo yasukuka. Oñgeni ove ukala tyina utala eonganeko olio? Hamwe tyikusokesa konondaka mbo mu apositolu Petulu wapopile Sesusi okuti: “Okulie matwii nako? Ove una onondaka mbomuenyo uhapu.” (Suau 6:68) Pahe ine katueile meongano lya Siovaa, ñgeno hono tuli-pi? Tyotyili, onthwe tuna umwe atyiho tuesukisa opo tutualeko okuumbila Siovaa. Tupu Siovaa utulongesa opo tulinge nawa otyilinga tyetu tyokuivisa. Utukuatesako okulivaleka “ontheto omphe,” imuhambukiswa. — Efe. 4:24.

14. Ouwa patyi wapolako etyi uli meongano lya Siovaa momuvo womuhiki wo Kolonavilu?

¹⁴ Sesusi ukahi umwe nokutuhongolela nawa momuvo uno wokuepuiya. Tuapola umwe ouwa kokuhongolelwa na Sesusi haunene etyi omukihi wo Kolonavilu wahimbika. Tyina ovanthu mouye ankho vehulilwa vala netyi valinga kavetyii, Sesusi etupopila ovipuka tuesukisa okulinga opo tuhupe. Povipuka tuapopililwe, tyimwe okuehelifuenaina unene novanthu. Ovakulu vewaneno avapopilwa apeho vatomphole novakuatate mewaneno opo vanoñgonoke oñgeni vekahi nokuvepameka. (Isa. 32:1, 2) Tupu, mono vidiu onomphe mbono Nkhalamutwe mbo Nombangi mba Siovaa, tuapamekwa nokupopilwa ovipuka ankho tuna okulinga opo tuahayambule omukihi.

15. Iya pahe konthele yovilinga viokuivisa, ehongolelo patyi tuapewa mokueenda kuomukihi iya ouwa patyi watundililako?

¹⁵ Mokueenda kuomukihi, tuapopilwa oñgeni tuna okulinga omaliongiyo novilinga viokuivisa. Omuhiki wati vala himbikee, liwa-liwa atupopilwa okuti matuhimbika okulinga omaliongiyo, novionge, monotelefone. Tupu atuhimbika okuivisa vala no notelefone, nokuhonekela ovanthu omikanda. Siovaa wetuyamba unene mokonda yononkhono tualinga. Onombetele ononyingi mbapopia okuti ovaivisi veliyawisa unene. Tyotyili, mokueenda kuomuvo ou tuamona ovipuka oviwa vietupameka unene. — Tala okakasa kati “Siovaa Wayamba Unene Ovilinga Vietu Viokuivisa.”

16. Onthwe tuna onthumbi yatyi?

¹⁶ Vamwe tyipondola ankho vasoka umwe okuti matukala novitateka ovinyingi meongano mokonda yomukihi. Mahi katutu-katutu atyimoneka umwe nawa okuti ovipuka ankho tukahi nokupopilwa neongano ovio vikahi nawa. (Mat. 11:19) Tyina tusoka umwe nawa oñgeni Sesusi ekahi nokuhongolela ovanthu vae, tyitukalesa nonthumbi yokuti nankho komutwe wandyila tukala vali novitateka, Siovaa Nomona wae Sesusi kamavetuyeke-po. — Tanga Ova Hebeleu 13:5, 6.

17. Oñgeni okuhongolelwa na Sesusi, tyikukalesa?

¹⁷ Onthwe tuna elao enene mokonda tukahi nokuhongolelwa na Sesusi! Tuli meongano lielikuata-po umwe nawa. Tyati vala omo muna ovanthu vovilongo ovinyingi iya vapopia omalaka omanyingi. Tuna umwe nokutekulwa nawa moupanga wetu na Siovaa, tupu tukahi nokulongeswa oñgeni matulingi nawa ovilinga vietu viokuivisa. Atuho tuakuateswako okulipola ontheto onkhulu, tupu tuelilongesa okukala noluembia navakuetu. Ovipuka ovio, tuevivila vala okuvilinga mokonda tuhongolelwa na Sesusi!