Siovaa Uyunga Ovanthu Vae

1. Omokonda yatyi Sesusi aitilile Siovaa ayunge ovalanduli vae?

MOTYINTHIKI tyahulililako opo Sesusi aipawe waitile otyipuka tyimwe tyesukisa unene ku Tate yae. Waitile Siovaa ayunge ovalanduli vae. (Suau 17:15, 20) Tyotyili, Siovaa apeho uyunga ovanthu vae, uvetekula nokuveyakulila. Sesusi ankho utyii okuti Satanasi mamonesa ononkhumbi ovalanduli vae. Tupu ankho utyii okuti opo ovalanduli vae vetyivile okuliyakulila komaliva a Satanasi vesukisa okukuatesuako na Siovaa.

2. Ngetyi tyipopia o Salmo 33:18-20, Omokonda yatyi tuehesukisile okutila owoma ovitateka vitumonekela hono?

² Ouye uno utuminwa na Satanasi weyula ovipuka ovinyingi vimonesa ononkhumbi ovakilisitau. Onthue tulambela movipuka vimwe vipondola okutusoyesa tupu vilola oukuatyili wetu mu Siovaa. Mahi ngetyi matulilongesa monthele ei onthue katuesukisile okutila owoma. Mokonda Siovaa ukahi nokutuyunga, weete ononkhumbi tumona iya wafuapo opo etukuateseko okulambela mononkhumbi ombo. Matulilongesa onongeleka onombali Mbombimbiliya mambulekesa oñgeni Siovaa “ayunga vana vena onthilo nae.” — Tanga Salmo 33:18-20.

TYINA TULITEHELELA OKUTI TUVALIKE

3. Onalupi pamwe tulitehela okuti tuvalike?

³ Namphila tuli mombunga imwe onene ya vana tufenda navo, mahi pamwe tupondola okulitehelela okuti tuvalike. Mongeleka, omukuendye umwe upondola okulitehelela okuti omulike, tyina ekahi nokupopila ava alongeswa navo kosikola ovipuka etavela, na tyina amailukila mewaneno ekuavo. Vamwe ponthue mokonda yokulwisa omalusoke omavi pamwe tulitehela okuti tuvalike, mokonda tusoka okuti tuna nokulwa vala nomalusoke oo atuike. Onthue pamwe tupondola okukala notyinkhe tyokupopila vakuetu oñgeni tulitehelela, mokonda yokusoka okuti kamavetunoñgonoka-le. Pamwe atee umwe tupondola okulipula okuti, pena umwe ou wesuka naame? Inkha tulitehelela vala okuti tuvalike mu kese tyipuka, matusukalala atusoko okuti petupu ou utuyakulila. Siovaa kahande tulitehelele ngotyo. Omokonda yatyi?

4. Omokonda yatyi Eliya apopilile okuti: “Ame vala nahupa-po”?

⁴ Tutalei etyi tyaendele nomulume omukuatyili Eliya. Onkhai-hamba Sesambele wapopile okuti memuipaa, pahe akala umwe ononthiki 40 tyihataika vala. (1 Reis 19:1-9) Puetyi pahe eli meleva aike, apopila Siovaa okuti: “Ame vala [omuuli] nahupapo.” (1 Reis 19:10) Mahi ngwe mwene ankho motyilongo muna vali ovauuli ovakuavo. Ombandiya wetyivilile okuyovola ovauuli vena 100 pomaoko a Sesambele. (1 Reis 18:7, 13) Opo naina omokonda yatyi Eliya ankho ulitehelela okuti omulike? Okuti ankho usoka okuti ovauuli vana Ombandiya ayovolele vankhia? Okuti wasokele ngotyo mokonda etyi Siovaa elilekesa okuti oe o Huku yotyili Komphunda Kalumelu petupu omuumbili nawike wa Huku wakalele kumwe nae? Okuti hamwe wasokele okuti nawike wii etyi tyikahi nokumumonekela aa hamwe welipulile inkha pena umwe wesuka umwe nae? Ombimbiliya kayapopile nawa omokonda yatyi Eliya ankho asokela ngotyo. Mahi etyi onthue twii, okuti Siovaa wanoñgonokele umwe nawa omokonda yatyi Eliya ankho elitehelela okuti omulike, iya mwene ankho utyii oñgeni memukuatesako.

5. Oñgeni Siovaa akuatesileko Eliya okunoñgonoka okuti kekahiko aike?

⁵ Siovaa wakuatesileko Eliya mononkhalelo ononyingi. Wayekele Eliya apopie oñgeni elitehelela. Wemupulile tuvali okuti: “Oityi ulinga muno?” (1 Reis 19:9, 13) Siovaa watehelelele umwe nawa tyina Eliya ankho ekahi nokupopia atyiho tyili momutima wae. Siovaa apopila Eliya okuti uli ponthele yae tupu una ononkhono ononene. Tupu apopila Eliya okuti nkhele una ovanthu ovanyingi vekahi nokumufenda. (1 Reis 19:11, 12, 18) Tyotyili, Eliya welitehelele umwe nawa etyi apopila Siovaa atyiho tyili momutima wae netyi Siovaa emukumbulula. Siovaa emuavela ovilinga vimwe viesukisa unene. Emupopila okuti lembula Asaeli akale ohamba yo Asilia, olembula Seuu akale ohamba yo Isilayeli, olembula Eliseu akale omuuli pomphangu yove. (1 Reis 19:15, 16) Etyi Siovaa aavela ovilinga ovio Eliya atyimukuatesako okusoka kovipuka vikahi nawa. Tupu Huku emuavela epanga Eliseu. Oñgeni noove upondola okukuatesuako na Siovaa tyina ulitehelela okuti umulike?

6. Oityi una okuita melikuambelo tyina ulitehelela okuti umulike? (Salmo 62:8)

⁶ Siovaa okukonga ulikuambele kwe. Wapopia okuti mekutehelela katyesukisile omuvo patyi ulikuambela. (1 Tes. 5:17) Siovaa uhambukwa unene okutehelela omalikuambelo ovaumbili vae. (Pro. 15:8) Oityi ove una okupopia melikuambelo tyina ulitehelela okuti umulike? Nga Eliya popila umwe Siovaa atyiho tyili momutima wove. (Tanga Salmo 62:8.) Popila Siovaa ovitateka ukahi nokulambela iya mupopila umwe oñgeni ulitehelela. Popila Siovaa ekukuatesako okufinda otyitateka tyove. Mongeleka, ine ulitehelela okuti omulike kumetyivili okuava oumbangi kosikola, popila Siovaa ekukuateseko okukola omutima, utyivile okupopila ava mulongeswa navo ovipuka utavela. Muiita ekuavele ounongo wokupopila vakuenyi evi utavela. (Luka 21:14, 15) Ine ukahi nokulwa nomalusoke apenga, ita Siovaa ekukuateseko utyivile okupopia nomukuatate wapama motyili ekukuateseko. Tupu upondola okupopila Siovaa akuateseko omunthu uhanda okupopila otyitateka tyove, opo ekutehelele nawa. Popila Siovaa atyiho tyili momutima wove, otale nawa oñgeni ekahi nokukumbulula omalikuambelo ove, iya tavela tyina vakuenyi vekukuatesako. Ine ulinga ngotyo kumelitehelela vali okuti umulike.

7. Oityi welilongesila ku Mauricio?

⁷ Onthue atuho tuapewa otyilinga tyimwe tyesukisa unene na Siovaa. Kala nonthumbi yokuti Siovaa weete ovilinga aviho ulinga mewaneno nomovilinga viokuivisa, tupu uvihambukilwa unene. (Sal. 110:3) Oñgeni okuundapa unene motyilinga otyo matyikukuatesako tyina ulitehelela okuti umulike? Tala etyi tyaendele nomukuatate umwe omukuendye utiwa o Mauricio.b Etyi Mauricio ambatisalwa, umwe ankho epanga liae enene katutu-katutu ayekepo okuumbila Siovaa. Mauricio wati: “Etyi namona okuti ukahi nokuyekapo otyili naame atyinthyoyesa umwe, ankho ndyilipula ine mandyityivili umwe okufuisapo omulao nalinga nokutualako okukala mombunga ya Siovaa. Ankho ndyilitehelela okuti ndyimulike tupu ankho ndyisoka okuti nawiki-ale upondola okunoñgonoka oñgeni ndyilitehelela.” Oityi tyakuatesileko Mauricio? Mauricio wati: “Andyihimbika okuundapa unene movilinga viokuivisa, otyo atyinkhuatesako okuhasoko vali kovipuka viehekahi nawa. Ankho ndyina ehambu tupu ankho hilitehelela vali okuti ndyimulike mokonda yavakuetu ankho ndyiundapa navo movilinga viokuivisa.” Tyotyili namphila tuahapondola okuenda navakuetu movilinga viokuivisa, mahi okuivisa mokuhonekela ovanthu omikanda nokuivisa nono telefone natyo tyitupameka unene. Oityi vali tyakuatesileko Mauricio? Ngwe wati: “Ankho ndyiundapa unene mewaneno, tupu ankho ndyilinga ononkhono mbokulilongesa nawa ononthele ankho ndyipewa meliongiyo. Tyina namapewa onthele meliongiyo ankho tyinkhuatesako okutala okuti naina Siovaa unthyole umwe, navakuetu navo venthyole.”

SIOVAA UTUKUATESAKO TYINA TUASOYA

8. Oñgeni ovitateka vipondola okutukalesa?

⁸ Mokonda tuli mononthiki mbahulililako mapamoneka umwe ovipuka vitusoyesa. (2 Tim. 3:1) Mahi, pamwe ovitateka vimwe vituuhulukila vala. Pamwe tupondola okukala tyehena onombongo, okuti hatyo pamwe tutumbukilwa nouvela umwe omuvi ine okunyimisa umwe tuhole. Movipuka ngovio tupondola okulitehelela omapita, haunene umwe tyina tukala navio momuvo wike vala, natyina vilipinga-pingapo vala. Hinangela okuti Siovaa weete ovitateka vietu, metukuatesako okulambela movitateka aviho tukala navio.

9. Popia ovitateka Sombe akalele navio.

⁹ Tala oñgeni Siovaa akuatesileko omulume omukuatyili Sombe. Sombe wakalele novitateka ovinyingi momuvo wike vala. Monthiki ike vala kuamonekele otyipepe tyimwe otyinene atyiipaa onongombe mba Sombe novaundapi vae, novana vae (Jó 1:13-19) Iya tyina nkhele ankho ekahi nokulwisa oluihamo olo ankho ena-lo, atumbukilwa nouvela umwe omuvi. (Jó 2:7) Ovipuka ovio viaihamesile unene Sombe iya atee umwe apopi okuti: “Pahe nelilovola umwe; nomwenyo wange hiuhandiale vali.” — Jó 7:16.

10. Oñgeni Siovaa akuatesileko Sombe okulambela movitateka ankho enavio? (Tala olutalatu luokondye.)

¹⁰ Siovaa ankho ukahi nokutekula Sombe. Mokonda Siovaa ankho uhole unene Sombe emuavela ovipuka aviho ankho esukisa opo akoleleye mononkhumbi mbae. Siovaa watehelele nawa Sombe emupopila oñgeni atekula ovipuka atunga. Tupu omupopila ovinyama ovinyingi vihuvisa unene. (Jó 38:1, 2; 39:9, 13, 19, 27; 40:15; 41:1, 2) Siovaa wapamekele Sombe nokuungumanesa pokati komuumbili umwe omukuatyili utiwa o Eliuu. Eliuu wapopilile Sombe okuti Siovaa apeho uyamba ovaumbili vae ovakuatyili. Tupu Siovaa pokati ka Eliuu aviyula Sombe. Eliuu akuatesako Sombe okuimbuka okuti ngwe omututu unene ku Siovaa Watunga ovipuka aviho. (Jó 37:14) Tupu Siovaa avela otyilinga Sombe emupopila aitileko omapanga ae alinga onkhali. (Jó 42:8-10) Oñgeni Siovaa hono etukuatesako tyina tulambela movitateka?

11. Oñgeni Ombimbiliya itukuatesako tyina tuna ovitateka?

¹¹ Siovaa hono kapopi nonthue ngetyi apopile na Sombe, mahi upopia nonthue pokati Kondaka Yae Ombimbiliya. (Loma 15:4) Siovaa utupameka nokutuavela ekevelelo. Tala vala nkhele ovipuka vimwe Ombimbiliya ipopia vipondola okutupameka tyina tuna ovitateka. Mondaka Yae Ombimbiliya Siovaa utupopila okuti petupu otyipuka natyike, okukutikinyamo ovitateka, ‘Tyipondola okutuyapula mohole yae.’ (Loma 8:38, 39) Tupu Siovaa utupopila okuti ukahi popepi “novanthu aveho vemuihana” momalikuambelo. (Sal. 145:18) Siovaa wetupopila okuti ine tumuyumba onthumbi, tupondola okukoleleya movitateka aviho, atukala nehambu namphila tumona ononkhumbi. (1 Kol. 10:13; Tia. 1:2, 12) Ondaka ya Huku tupu utupopila okuti ovitateka kamavitualako apeho apa katutu maviya okunyimwa-ko. (2 Kol. 4: 16-18) Siovaa tupu wetupopila okuti apa katutu meya okunyima-ko una utuetela ononkhumbi, Satanasi Eliapu navana valinga ovipuka ovivi alinga. (Sal. 37:10) Okuti ove uhinangela onotesitu mbumwe Mbombimbiliya mbupondola okukuatesako tyina una ovitateka?

12. Oityi Siovaa ahanda tulinge inkha tuhanda okupola ouwa Kondaka yae?

¹² Siovaa uhanda tukale nomuvo wokutanga Ombimbiliya ononthiki ambuho nokusoka nawa kuetyi tuatanga. Tyina tulinga ononkhono mbokuendela muetyi tuelilongesa onthumbi yetu maipame vali tupu atufuene vali ku Tate yetu wokeulu. Iya otyo matyitupameka tyina tulambela movitateka. Siovaa wavela ononkhono mbae vana vayumba onthumbi muetyi apopia Mondaka yae. Iya ononkhono mba Huku mbutuavela “epondolo liavilapo” opo tutyivile okulambela movitateka. — 2 Kol. 4:7-10.

13. Oñgeni okulia tupewa “nomupika omukuatyili nokualunguka” kutukuatesako tyina tulambela movitateka?

¹³ Siovaa ukahi nokukuatesako “omupika omukuatyili nokualunguka” okulinga omikanda no novidiu noviimbo vitukuatesako okupameka ekolelo lietu nokufuena vali ku Siovaa. (Mat. 24:45) Tuesukisa okulilongesa nawa ovipuka ovio tupewa. Omphange umwe ukala ko Estadu Unidu wapopia okuti upanda unene okulia oko tupewa nomupika. Wati: “Mokueenda kuomanima 40 ndyikahi nokuumbila Siovaa, nalolelwe mononkhalelo ononyingi.” Wakalele novitateka ovinene, tyati umwe he mbuale aliatwa netukutuku ankho likahi nokutahua nomunthu wakolua, anyimi, ovohe avavele unene navo avankhi, ngwe avele tuvali ouvela umwe utiwa okasele. Oityi tyemukuatesileko? Ngwe wapopia okuti: “Siovaa apeho unthekula. Okulia kuopaspilitu Siovaa etuavela pokati komupika omukuatyili nokualunguka kuankhuatesako unene. Mokonda yotyo ndyilitehelela nga Sombe wapopile okuti: ‘Atee ndyinkhia himayekepo ekolelo liange!’” — Jó 27:5.

14. Oñgeni Siovaa etukuatesako pokati kovakuatate nonomphange tyina tulambela movitateka? (1 Ova Tesalonika 4:9)

¹⁴ Siovaa ulongesa ovanthu vae opo vetyivile okukuatesako vakuavo momuvo wovitateka. (2 Kol. 1:3, 4; tanga 1 Ova Tesalonika 4:9.) Nga Eliuu, ovakuatate nonomphange vetyihole tyokukuatesako vakuavo opo vetyivile okulambela movitateka vakala navio. (Ovil. 14:22) Tala oñgeni ovakuatate vomewaneno lia Diane vemukuatesileko etyi omulume wae avela. Wapopia okuti: “Tyetupuiyile unene mahi ankho tutyii okuti Siovaa ukahi nokutukuatesako okulambela motyitateka otyo. Ovakuatate vewaneno lietu vetukuatesileko unene. Ankho vetutalelapo nokutulikalela, ovipuka ovio vietupamekele unene. Mokonda ame ankho hityivili okutaha etukutuku ovakuatate apeho ankho tyina tyitavela veya okumphola tuende komaliongiyo nomovilinga viokuivisa.” Okukala mombunga ilihole ngei, elao limwe enene!

SIOVAA APEHO UTUTEKULA

15. Oityi tyitukalesa nonthumbi yokuti matutyivili okulambela movitateka?

¹⁵ Onthue atuho tulambela movitateka. Mahi ngetyi tuelilongesa onthue katulambela vala movitateka ovio atuike. Mokonda Siovaa Tate yetu una oluembia apeho ututekula, uli ponthele yetu. Ututehelela tyina tumuita etukuatesako, iya tyokutukuatesako nae mwene otyo umwe uhanda. (Isa. 43:2) Onthue tuna onthumbi yokuti matutyivili okulambela movitateka aviho tukala navio, mokonda tate yetu Siovaa utuavela ovipuka aviho tuesukisa, opo tutyivile okukoleleya ovitateka ovio. Tyati umwe wetuavela elao liokulikuambela, wetuavela Ombimbiliya novipuka ovinyingi vilingua nomupika, novakuatate vetuhole, vetukuatesako tyina tukahi nokulambela movitateka.

16. Oityi tuna okulinga opo tutualeko okukala momavava a Siovaa?

¹⁶ Onthue tupandula unene tate yetu Siovaa ututekula! “Omitima vietu vihambukwa mokonda yae.” (Sal. 33:21) Onthue tulekesa ku Siovaa okuti tupandula ovipuka etulingila, tyina tulilongesa nawa ovipuka aviho etuavela vitukuatesako. Tupu tuesukisa okulinga ononkhono opo tuahatunde momavava a Siovaa. Ngokuti inkha tutualako okulinga ononkhono mbokutavela ovitumino vya Siovaa nokulinga etyi tyaviuka komaiho ae, apeho metukuatesako! — 1 Pet. 3:12.