Oñgeni Matukwatesako Vokuna Ouvela Wokulinyengwa?

Oityi Otesitu Oyo Yahanda Okupopia

Noonthwe tyitwiihama unene tyina tuna epanga lietu una ouvela wokulinyengwa. Mahi tuna umwe etyi tupondola okulinga tyikwatesako mukwetu una ouvela watyo oo. Oityi tupondola okulinga?

Okulinga Ovipuka Evi Tyipondola Okukwatesako Wokulinyengwa

‘Kanyauka kokutehelela.’ — TIAKU 1:19.

Otyipuka tyimwe tyikahi nawa upondola okulinga ukwateseko epanga liove una ouvela watyo oo, okumutehelela tyina ena etyi ahanda okupopia. Mahi wahatie hamwe ovipuka viatyo aviho ekupopila, opala noove upopie. Tyina uti pokumutehelela, tyimoneke umwe okuti usuka nae, wahanda umwe okumwiiva. Wahatie tyina apopia, ove oku uli-ale nokusoka etyi momukumbulula, hamwe tupu omupolo-po vala omapita. Wahalimbwe-ko okuti, pamwe mapopi umwe otyipuka tyimwe nae ankho ahahandele-ale. — Jó 6:2, 3.

‘Popia onondaka mbuungumanesa.’ — 1 OVA TESALONIKA 5:14.

Epanga liove pamwe tyipondola mwene apa eli ulinga-le vala unene otyiho, na tyina elitala ñgaa ngoti kesilivila-le. Pahe ove, na tyina wehetyilwete etyi upondola okumupopila, linga vala ovipuka vilekesa okuti usuka nae. Otyo matyimupameka umwe omutima, atyimukalesa nawa.

“Epanga liotyotyili oyouna umwe ukuhole omuvo auho.” — PROVÉRBIOS 17:17.

Linga umwe ovipuka mavimukwatesako. Mahi wahatie vala etyi mandyimulingila mwene ndyityii-ale, mupula umwe etyi upondola okumulingila. Ine mukwenyi wokuna ouvela oo tyimupwiya okukupopila etyi esuka natyo, upondola okumupula ine tyitavela mukaende-ende amuho, hamwe okukemulandela ovipuka vimwe esuka navio, nokumukohela ovikutu viae, nokumukombela mondywo yae, nokumukunkhila-po, nokulinga vali ovipuka ovikwavo. — Ova Galata 6:2.

‘Pwa elundo.’ — 1 OVA TESALONIKA 5:14.

Pamwe epanga liove ha apeho mahande okutomphola noove. Mahi tyimoneke okuti ove wahanda okumutehelela tyina ena etyi ahanda okupopia. Kombanda youvela oo ena-o, pamwe malingi umwe ovipuka vimwe vikunumanesa. Tyipondola pamwe muna etyi mwapanga, pahe haa ati himalingi vali, pamwe hono kutya vala kapepele-ale. Pwa umwe elundo, omunoñgonoka umwe nawa utyivile okumukwatesako. — Provérbios 18:24.

Etyi Ulinga Tyipondola Umwe Okumukalesa Nawa

“Ame ndyipopila epanga liange okuti apeho tyina una etyi wahanda okupopia, uti vala mandyihande okupopia noove tutumphole. Tyina pamwe amapopi otyipuka tyimwe, ndyitala ñgaa ame ndyitupu-ale etyi mandyilingi, opo pahe ndyiyemba umwe vala kokumutehela. Ngwe naina pamwe, otyipuka esuka natyo, omunthu umwe vala umupa okutwi, nae na akale nawa.” — Tyapopiwa na Hilongwa,a una epanga liae una ouvela wokulinyengwa, pahe nokulia kali-ale nawa, pamwe tyimupa okulimbaililwa.

“Pomapanga ange, pena umwe una okankhenda, umphameka. Ngwe undyihana umwe keumbo liae, atukalia nae ovikulia vimwe viapepa. Tyina pahe tuli vala opo ñgaa, tyinkhalesa umwe nawa, andyityivili okupopia etyi tyili komutima. Otyipuka otyo, tyimphameka umwe omutima.” — Tyapopiwa na Heune, nae una ouvela wokulinyengwa.

“Okupwa elundo otyiwa. Tyina omukai wange amalingi otyipuka tyimwe tyinumanesa, otyipuka ndyisoka okuti, wetyilinga tupu okombanda youvela wae, hakuti otyo ekahi. Otyo tyinthulisa umwe omutima anahanumana, andyiyembe vali kokulinga ovipuka vilekesa okuti ndyisuka nae.” — Tyapopiwa na Jacob. Omukai wae una ouvela wokulinyengwa.

“Omukai wange umphameka umwe unene, nomutima wange aukala umwe nawa. Tyina pamwe namati vala ñgaa omutima watyo wakala vala omapita, ngwe kankhuluminya ndyilinge etyi nahahandele. Otyo pahe pamwe tyimutwala umwe vala kokulinga otyipuka nae ankho ahahandele. Ndyimuhole unene, mokonda una otyali, utyivila okulingila vakwavo ovipuka.” — Tyapopiwa na Enrico, una ouvela wokulinyengwa, umupa umwe okulimbaililwa.