Tyaviuka Ine Tyapenga? Atuho Tulipula-tyo

Ine uhanda okwenda kotyilongo tyimwe mahi ove kukwii, molingi ñgeni?

1. 1. Okuti mopolesa-po vala ondyila usoka okuti oko maikutwala nako?

2. 2. Okuti molandula vala movanyingi, oti mwene ngootyo navo oku nahanda vekwii-ale?

3. 3. Ine motale umwe nawa momapa, hamwe okupula kepanga liove uyumba onthumbi wii nawa ondyila?

Ine ulinga otyipuka tyotete hamwe o tya vali, moende umwe, mahi kumehiki oku wesuka nako. Mahi ine ulinga tya tatu, mohiki umwe oku uhanda okwenda.

Onthwe tukahi ngatyina tuli moungendi. Tuhanda oungendi oo ututwale kokukamona oviwa komutwe. Mahi opo tukamone oviwa ovio tyitei kwou tupula tyina tuna etyi tuhanda okulinga.

Ovipuka vimwe tusoka okulinga havineneko-ale, mahi vimwe ovinene umwe. Ya pokusoka okulinga ovipuka viatyo ovio ovinene, opo umwe tutyimonena oityi onthwe tuti otyo tyaviuka, neetyi tuti otyo tyapenga. Kovipuka tulinga pamwe kutuka oviwa, mahi pamwe kutuka ovivi. Ya evi vituka-ko, pamwe kaviviuku vala mwoonthwe, vikehika umwe no kovetu. Ovipuka vimwe tuna okusoka nawa ongeevi ñgaa:

• Otyinepo, ovalie vapondola okulala kumwe

• Okulinga omunthu wotyili, ovilinga, onombongo

• Okutekula ovana

• Okulitekula na vakwetu

Oityi tuna okulinga tuyumbe-ko onthumbi okuti etyi twakoya okulinga, matyiti umwe otyo tyikalesa nawa onthwe, otyo tyikalesa nawa vetu?

Munthu na munthu upondola okulipula ñgaa: Tyina ndyina etyi nahanda okulinga, oityi matyinkhwatesako okumona etyi tyaviuka neetyi tyapenga?

Omukanda ou maupopi oityi tutila Ombimbiliya oyo vala ina onondunge mbuyumbwa onthumbi, neetyi una okulinga ikukwateseko.