Ovakulu vevali Pahe Navo Vakala Ononkhalamutwe mbo Nombangi.
MUTATU 18 ya Kupupu yo 2023, mo jw.org, mwapopilwe okuti, ovakulu vevali oo Gage Fleegle, na Jeffrey Winder, vakala Ononkhalamutwe mbo Nombangi mba Siovaa. Ovakulu ovo aveho vevali, vena ovipuka oviwa valinga-linga movilinga vya Siovaa.
O Gage Fleegle nomukai wae Nadia
Omukulu Fleegle wekulila mepunda-umbo lyo Pensilvânia ko Estados Unidos, ovo tate yae ononbangi. Pweetyi omukwendye ovohe availukila oku kwesukisa ovaivisi. Wambatisalwa monthiki 20 ya Kuhuhu yo 1988.
Omukulu Fleegle vomeumbo liavo, ovo vemupele ondundo elipake movilinga viomuvo auho. Ngwe meumbo liavo ankho omo muhikila ovatalelipo womawaneno, no vokuundapa mo Mbetele, wamwene ehambu ovanthu ovo vena-lio. Etyi ambatisalwa, kapakalele-ale vali ehimbwe, akala omukokoli-ndyila womuvo auho, monthiki 1 ya Tungonkhe yo 1989. Etyi pakala omanima evali afwisapo etyi apangele pweetyi ena omanina 12 tyokukaundapa mo Mbetele. Mu Kulindi yo 1991, aihanwa opo akaundape mo Mbetele yoko Brooklyn.
Omukulu Fleegle, waundapele kotyilinga Tyokunyika Omikanda omanina etyinana, etyi pakala, akaundapa Moseketa Yovilinga. Omanima oo aeho, ankho uli mewaneno lyo Rússia. Wanepa mo 2006, omukai wae Nadia anyingila mo Mbetele. Vakalele omanima amwe mewaneno lyo Putu availukila mewaneno lyo Espanhol avakala-mo omanima 10. Etyi akala omanima amwe Moseketa Yovilinga, atumwa akaundape Moseketa Yokulongesa, pahe akala umwe povo Komisau Yovilinga. Mu Tyitalale yo 2022, akala Omukwatesiko w’Okomisau Yovilinga, y’Ononkhalamutwe mbo Nombangi mba Siovaa.
O Jeffrey Winder nomukai wae Angela
Omukulu Winder, wekulila mepunda-umbo lyo Murrieta ko Califórnia, mo Estados Unidos, ovo tate yae ononbangi. Wambatisalwa monthiki 29 ya Tyitalale yo 1986. Mohanyi yalandula-ko, akala omukokoli-ndyila wapola-pokati. Atyimuhambukiswa unene etyi akala omukokoli-ndyila Wapola-pokati. Monthiki 1 ya Kulindi yo 1986, akala omukokoli-ndyila womuvo auho.
Pweetyi omukulu Winder omukwendye, akatalelapo ovakulu vevali vaundapale ehimbwe mo Mbetele. Pahe nae apange okukaundapa mo Mbetele. Mohanyi ya Kapepo yo 1990, aihanwa okukaundapa mo Mbetele yoko Wallkill.
Mo Mbetele, omukulu Winder, waundapa movilinga ovinyingi. Waundapele Kokukoha, Nokomapia, Novilinga ovikwavo vali. Avelinepe na Angela mo 1997, aveho avatwalako notyilinga tyavo mo Mbetele. Mo 2014 avatumwa ko Warwick, omukulu Winder nae waundapele motyilinga tyokutunga ombala yonombangi. Mo 2016, avatumwa ko Patterson, akaundapa komikanda, no konovindiu. Etyi pakala omanima ekwana, avakondoka vali ko Warwick, akaundapa m’Okomisau Yokwonganeka ono Mbetele. Mu Tyitalale yo 2022, akala Omukwatesiko w’Okomisau Yokwonganeka ono Mbetele, y’Ononkhalamutwe mbo Nombangi mba Siovaa.
Onthwe tulikwambela opo Siovaa emwavele oviwa ovinyingi onwe ‘ovalume votyali,’ opo mutwaleko okundapa movilinga viae viokukwatesako Ouhamba. — Efe. 4:8.