Omapulo Ovatangi
Olie “omukai” wapopiwa mu Isaiya 60:1, oñgeni “akatuka aliaimisa otyimimi tyae?”
Isaiya 60:1 yati: “Katuka ove mukai, liaimisa otyimimi tyove, mokonda otyimimi tyove tyehika-le, omunkhima wa Siovaa ukahi nokumimikila kwoove.” Onovelesikulu ononkhwavo mbulekesa okuti “omukai” oo, ankho o Siyau, o Selusalei, yali ombala yotyilongo tyo Sundaa pomuvo opo.a (Isa. 60:14; 62:1, 2) Epunda-umbo lyo Selusalei ankho lilekesa ova Isilayeli vatyo aveho. Otyo tyitutwala kokulilinga omapulo aa evali: Lyo tete, oñgeni o Selusalei “yakatuka” ailiamisa otyimimi tyayo? Lya vali, okuti pena etyi tyalingwa hono tyifwisapo onondaka mba Isaiya mononthiki mbuno?
Oñgeni o Selusalei “yakatuka” ailiamisa otyimimi tyayo tyopaspilitu, ya yetyilinga nalupi? O Selusalei nondywo ya Huku ankho yatoka-po etyi ova Sundaa vaya koupika ko Mbambilonia avakala-ko omanima 70. Etyi o Mbambilonia yatambulwa nova Pelesa nova Mendia, ova Isilayeli aveho ankho veli koupika avakondoka kotyilongo tyavo avakapindula-po efendelo liotyotyili. (Esit. 1:1-4) Okuhimbikila menima 537 P.K.E. vomihoko 12 ankho vahupapo nkhele vafenda Huku, avalingi otyilinga otyo. (Isa. 60:4) Avahimbika okulingila Siovaa ovilikutila, avalingi ovipito viomakaka, avapindula-po ondywo ya Huku. (Esit. 3:1-4, 7-11; 6:16-22) Pahe omunkhima wa Huku aupaleka vali okuliaimina mo Selusalei, otyo okuti, Huku apindula-po ovanthu vae. Ovanthu va Huku pahe avakala otyimimi tyomuhoko auho wova Isilayeli ankho veli menthiki, liokwehei Huku.
Mahi eulo liapopia Isaiya opo nkhele ankho liafwiswapo vala otyinthimbu mo Selusalei. Ova Isilayeli ovanyingi kavatwaileko okutavela Huku. (Nee. 13:27; Mal. 1:6-8; 2:13, 14; Mat. 15:7-9) Tupu vaanyene umwe na Mesiya, Sesusi Kilisitu. (Mat. 27:1, 2) Menima 70 P.K. o Selusalei nondywo ya Huku aihanywa-po vali.
Otyipuka otyo tyokuti o Selusalei maihanywa-po vali Siovaa wetyipopile-ale. (Ndan. 9:24-27) Otyo tyilekesa okuti Siovaa ankho kapangele o Selusalei ifwisepo ovipuka aviho viapopiwa mu Isaiya 60.
Okuti pena etyi tyalingwa hono tyifwisapo onondaka mbeulo aliho lya Isaiya mononthiki mbuno? Yoo, mahi otyo tyiyemba komukai omukwavo “o Selusalei yo keulu.” Omutumwa Paulu wapopia omukai oo wati, “o mee yetu.” (Ngal. 4:26) O Selusalei yo keulu, eongano lya Huku, mahi o keulu vala kwati nonoandyu mbokwahayekele-po Huku. “Ovana” vatyo vomukai oo, tyati umwe o Sesusi, ovo 144.000 valembulwa nomphepo ikola, umwe pwoovo yatyo o Paulu nae ankho ukevelela okukakala keulu. Ovalembulwa ovo, ovo vatiwa ‘ovanthu vakola’ — “ova Huku ova Isilayeli.” — 1 Pet. 2:9; Ngal. 6:16.
Oñgeni o Selusalei “yakatuka” “ailiamisa otyimimi” tyayo? Yakatuka pweetyi pano pohi pakala ovana vayo ovalembulwa. Tala oityi tutila etyi tyaenda-enda ovalembulwa, ongeetyi umwe tyapopilwe meulo lya Isaiya 60.
Ovalembulwa ankho vena “okukatuka” mokonda ankho valala mopaspilitu etyi ombuto yeevu yakuninwe, (ovanthu vokwatyitukila-po otyili) yankhinkha Ovakwa-Kilisitu votyotyili etyi ovatumwa vapwa-po okunkhia. (Mat. 13:37-43) Pahe Ovakwa-Kilisitu avalingi ovapika mo Mbambilonia Onene, onongeleya ambuho mbomatutu. Vakala ovapika okuhimbikila pomuvo opo atee “onthyulilo youye uno,” yahimbika menima lyo 1914. (Mat. 13:39, 40) Kapakalele-ale ehimbwe, mo 1919, avayovoka avahimbika okuliaimisa otyimimi tya Huku, etyi velipaka movilinga viokwivisa.b Mokweenda kwomanima, ovanthu ovanyingi vekahi nokutunda momihoko aviho veya motyimimi, pati umwe novo Isilayeli ya Huku, “onohamba” mbapopiwa momukanda wa Isaiya 60:3. — Ehol. 5:9, 10.
Komutwe wandyila ovalembulwa vo 144.000, mavakaliaimisa vali unene otyimimi tya Huku. Otyo maveketyilinga ñgeni? Maveketyilinga putyina vamankhi avai keulu vakalinge vo “Selusalei Omphe,” omphunga ya Kilisitu, navo mavakati umwe ovo onohamba ovo ovanakwa. — Ehol. 14:1; 21:1, 2, 24; 22:3-5.
O Selusalei Omphe mailingi otyilinga otyinene mokufwisapo eulo livasiwa mu Isaiya 60:1. (Tala Isaiya 60:1, 1, 3, 5, 11, 19, 20 oyeeleka n’Eholololo 21:2, 9-11, 22-26) Ngeetyi motyilongo tyo Isilayeli omo mwali otyipundi tyovatumini vo Isilayeli onkhulu, no Selusalei Omphe na Kilisitu oyo maitumina ouye omupe. Oñgeni o Selusalei Omphe “ituluka ku Huku keulu”? Ituluka keulu mokuviukisa ovipuka pano pohi. Ovanthu vokuna owoma na Huku vatunda momihoko viatyo aviho “mavaendela motyimimi tyae.” Mavakayovoka umwe konkhali no kononkhia. (Ehol. 21:3, 4, 24) Opo pahe ‘ovipuka aviho mavikapindulwa-po’ ngeetyi Isaiya novauli ovakwavo vapopile. (Ovil. 3:21) Otyilinga otyo tyokupindula-po ovipuka aviho tyahimbika etyi Sesusi akala ohamba, matyikapwa vala tyina Omanima 1000 Outumini wa Kilisitu amapu.
a Ombimbiliya Ikola Yaava Ekevelelo Liouye Omupe mu Isaiya 60:1 mwapopiwa ondaka “omukai” kayatile “Siyau” hamwe “Selusalei,” mokonda mo Hembeleu ondaka yatiwa “katuka” no “yokwati liaimisa otyimimi” yapopia omukai, neei yokwati “kwoove.” Ondaka “omukai” iivala umwe okuti omukai oo wapopiwa vala tyotyimo tyatyo.
b Otyilinga otyo tyokupindula-po ovipuka aviho tyahimbika mo 1919, tupu tyapopiwa mu Isekiyele 37:1-14 no m’Eholololo 11:7-12. Isekiyele wapopile okuti Ovakwa-Kilisitu aveho ovalembulwa mavapindulwa-po vala tyina vakala-le ehimbwe moupika. Eulo lili m’Eholololo lipopia okutyitwa otyivali kwokankhuka okatutu kovalembulwa ankho valulika ovanthu va Huku etyi valingilwe vala okanthyinda ovapakwa mokaleya, avakala-mo vala omuvo uhehi. Mo 1919, avanakwa valinge “omupika omukwatyili, walunguka.” — Mat. 24:45; tala omukanda A Adoração Pura de Jeová É Restaurada! pefo.118.