Tualako Okukala Nohole Mokonda Ipameka

1. Otyipuka patyi tyakolela Jesus apopile novalongwa vae motyinthiki tyahulilila?

MOTYINTHIKI tyahulililako novalongwa vae, Jesus wapopia ohole ovikando vihungi po 30. Walongesile ovalongwa vae okuti ankho vena “okukala nohole pokati kavo.” (João 15:12, 17) Ankho mavakala nohole pokati kavo iya ovanthu avaimbuka okuti ovalanduli votyotyili va Kristu. (João 13:34, 35) Ohole Jesus apopile, haupanga vala ukala pokati kovanthu iya ulamba. Mahi otyituwa tyilunda omunthu okulingilako vakuavo ovipuka oviwa. Jesus wati: “Nawike una ohole ipona yauna waava omuenyo wae mokonda yomapanga ae. Onwe mumapanga ange, inkha mulinga etyi ndyimutuma.”—João 15:13, 14.

2. (a) Oñgeni ovaumbili va Huku veiwe hono? (b) Omapulo patyi matukumbulula monthele ei?

² Ovaumbili va Jeova hono, veiwe okuti ovakuatyili, valingila-ko vakuavo ovipuka oviwa iya velikuata okapandi. (1 João 3:10, 11) Katyesukisile otyilongo patyi tuatyitilwa, nomuhoko wetu, nelaka tupopia ine onkhalelo tuatekulwa. Mouye auho, ovaumbili va Jeova veiwe okuti vena ohole pokati kavo. Omokonda yatyi ohole yesukisila unene? Oñgeni Jeova na Jesus vetupameka nohole? Iya oñgeni onthue tupondola okulekesa ohole oyo opo tuungumanese nokupameka vakuetu?—1 Coríntios 8:1.

OHOLE YESUKISA HAUNENE PAHETYINO

3. Oñgeni ‘omuvo uno wepuiya,’ ukalesa ovanthu?

³ Onthue tukahi “momuvo wepuiya” iya omuenyo wetu “weyula ononkhumbi, novitateka.” (2 Timóteo 3:1-5; Salmo 90:10) Mokonda ovanthu ovanyingi vekahi nokumona ononkhumbi, kavahande vali okutualako nomuenyo. Kese nima ovanthu valamba po 800.000 veliipaa, tyilekesa okuti mono segundu 40 omunthu wike ulipaa. Alo umwe vamwe povakuatate vetu, navo veliipaa mokonda yovitateka.

4. Ovanthu patyi vapopiwa mo Mbimbiliya ankho vahanda okunkhia?

⁴ Kohale, ovaumbili vamwe va Huku ovakuatyili velitehelele omapita mokonda yovitateka iya alo umwe avapeleya okunkhia. Mongeleka, mokonda Job weihamenenwe unene, wapopile okuti: “Ame ndyiyele omuenyo wange; hihande vali okukala nomuenyo.” (Jó 7:16; 14:13) Jona nae weihamenenwe unene iya ati: “Jeova, pahe mbambavo mphole omuenyo wange, mokonda hahe vali okunkhia tyipona okukala nomuenyo.” (Jonas 4:3) Tupu, omuuli Eliya nae welitehelele ngotyo iya ati: “Jeova, pahe tyapwa! Ndyipae.” (1 Reis 19:4) Mahi Jeova ankho uhole ovaumbili vae iya ankho uhanda vatualeko nomuenyo. Jeova kevekoyesile mokonda yonkhalelo ankho velitehelela. Mahi wevekuatesileko okukala nehando liokukala vali nomuenyo opo vatualeko okumuumbila noukuatyili.

5. Omokonda yatyi ovakuatate vetu nonomphange vesukisila ohole yetu pahetyino?

⁵ Hono, ovanyingi povakuatate vetu nonomphange, vekahi nokulambela movitateka ovinene iya vesukisa ohole yetu. Vamwe vekahi nokulingwa omukuele ine okumoneswa ononkhumbi. Ovakuavo vapopiwa omapita kovilinga viavo. Ine hamwe vaponwa mokonda vena okuundapa onoola ononyingi. Tupu vamwe vena ovitateka mombunga. Hamwe velinepa nomunthu uhaumbila Jeova iya apeho umupopia omapita. Mokonda yovitateka ovio novikuavo, ovanyingi velitehelela okuti vetupu vali ononkhono mbokutualako iya avahimbika okulipula inkha vena umwe esilivilo. Olie upondola okuvekuatesako?

OHOLE YA JEOVA ITUPAMEKA

6. Oñgeni ohole ya Jeova ipameka ovaumbili vae?

⁶ Jeova upopila ovaumbili vae okuti uvehole iya apeho makala nohole navo. Soka oñgeni ova Isilayeli velitehelele etyi Jeova evepopila okuti: “Ove wakolela unene komaiho ange; ove wahilivikwa iya ame ndyikuhole” iya “uhakale nowoma mokonda ame ndyikahi nove”! (Isaías 43:4, 5) Tutyii okuti kese umwe puonthue wakolela unene ku Jeova.a (Tala onondaka pokatoi.) Ombimbiliya itupopila okuti: “Mokonda una epondolo aliho mekuyovola. Oe mekuhambukilwa.”—Sofonias 3:16, 17.

7. Oñgeni ohole ya Jeova yeelekwa no ya ina unyamisa omona wae? (Tala olutalatu pefo pahimbikila onthele.)

⁷ Jeova walaa okupameka nokuungumanesa ovaumbili vae katyesukisile otyitateka patyi vekahi nokulambela. Wati: “Onwe mamunyame iya amutyindwa ponkhondo; iya amusatwa konongolo. Ngetyi ina yomona alela omona wae, naame mandyitualako okumuungumanesa.” (Isaías 66:12, 13) Soka oñgeni omona elitehelela tyina ina emuyunga ine anyana nae! Jeova ukuhole unene iya uhanda ulitehelele okuti wapama. Uhakale nondima yokuti wakolela unene ku Jeova.—Jeremias 31:3.

8, 9. Oñgeni ohole ya Jesus itupameka?

⁸ Mo versikulu ei, tuvasamo ehunga ekuavo lilekesa omokonda yatyi tutyii nawa okuti Jeova utuhole. Yati: “Mokonda Huku una oluembia olunene novanthu, waava Omona wae wongunga, opo kese omunthu ukala nekolelo mwe ahakahanyueko, mahi akale nomuenyo uhapu.” (João 3:16) Otyilikutila tya Jesus tyilekesa nawa okuti Jeova utuhole iya ohole yae itupameka. Ombimbiliya yapopia okuti “ononkhumbi, ine emone,” kavipondola “okutuyapula kohole ya Kristu.”—Romanos 8:35, 38, 39.

⁹ Pamwe tukala novitateka vitupola ononkhono, tyilinge molutu, nomomalusoke ine vitupola ehambu liokuumbila Jeova. Mahi okuhinangela ohole Kristu ena nonthue, matyituavela ononkhono mbokukoleleya. (Tanga 2 Coríntios 5:14, 15.) Ohole ya Jesus itukalesa nehando liokutualako nomuenyo, nokuumbila Jeova. Ohole oyo itulunda okutualako, alo umwe tyina tumonekelwa noviponga, na tyina tumoneswa ononkhumbi ine tunumaneswa iya na tyina tuasukalala.

OVAKUATATE VESUKISA OHOLE YETU

10, 11. Olie una otyilinga tyokupameka nokuungumanesa ovakuatate? Hangununa.

¹⁰ Jeova tupu uundapesa ewaneno opo etupameke. Matulekesa okuti tuhole Jeova tyina tukala nohole novakuatate nonomphange. Tulinga atyiho tuvila opo tukuateseko ovakuatate vetu okunoñgonoka okuti vakolela unene iya Jeova uvehole. (1 João 4:19-21) Apostolu Paulu wahoneka okuti: “Tualeiko okuliungumanesa nokulipameka, ngetyi mukahiale nokulinga.” (1 Tessalonicenses 5:11) Ngotyo, havakulu vewaneno vala vapondola okupameka vakuavo. Atuho tupondola okuhetekela Jeova na Jesus mokupameka vakuetu.—Tanga Romanos 15:1, 2.

¹¹ Vamwe mewaneno vesukisa okuhakulwa no nondotolo, nokunwa ovihemba mokonda yokukala tyaunga nokusukalala unene. (Lucas 5:31) Ovakulu vewaneno novanthu ovakuavo mewaneno vaimbuka okuti kavalongesilwe okuhakula, mahi ekuateso neungumaneso vaava viakolela unene. Atuho mewaneno tupondola ‘okupopia onondaka mbuungumanesa iya mbupameka vana vasoya, nokupwa-elundo novanthu aveho.’ (1 Tessalonicenses 5:14) Onthue tulinga ononkhono mbokunoñgonoka oñgeni ovakuatate vetu velitehelela. Tuesukisa okupwa elundo navo, nokupopia navo monkhalelo ivepameka tyina vasoya. Okuti ulinga ononkhono mbokupameka vakuenyi? Oityi vali ove upondola okulinga opo upameke vakuenyi nokuveungumanesa?

12. Popia ongeleka ya umwe wapamekelue mokualekeswa ohole mewaneno.

¹² Omphange umwe ko Europa wati: “Ame pamwe ndyisoka okuliipaa, mahi ndyina ekuateso. Ovakuatate mewaneno vahupisa omuenyo wange. Ovakuatate nonomphange apeho vamphameka iya valekesa okuti venthyole. Namphila haveho vetyii okuti ame ndyina omalusoke oo, ovakuatate apeho vafuapo opo vankhuateseko. Ovalinepi vamwe mewaneno vekahi ngatyina ovo tate. Apeho vankhuatesako iya vetyilinga onthiki aiho.” Tyotyili, onkhalelo ovanthu vetukuatesako yelikalela. Mahi atuho pena etyi tupondola okulinga opo tukuateseko ovakuatate vetu nonomphange.b (Tala onondaka pokatoi.)

OÑGENI MATUPAMEKA VAKUETU NOHOLE?

13. Oityi tuesukisa okulinga opo tuungumanese vakuetu?

¹³ Tehelela nawa. (Tiago 1:19) Tulekesa okuti tuhole vakuetu tyina tuvetehelela nokankhenda. Linga omapulo maekukuatesako okunoñgonoka oñgeni omukuatate vove elitehelela. Onkhalelo mokala maimukuatesako okuimbuka okuti usuka unene nae. Tyina ekupopila, pwa-elundo nae, mutehelela nawa iya uhemutete. Inkha umutehelela nawa, mo munoñgonoka nawa iya ngwe mekuyumbu onthumbi. Ngotyo, nae makala tyafuapo opo atehelele etyi momupopila. Inkha tyotyili usuka na vakuenyi, motyivili okuveungumanesa.

14. Omokonda yatyi tuhapondola okukoyesa vakuetu?

¹⁴ Uhapopie onondaka mbusoyesa. Omunthu wasoya mavilipo vali inkha elitehelela okuti tukahi nokumukoyesa. Ngotyo, matyitupuiya unene okumuungumanesa. “Onondaka mbupopiwa tyihasoko mbutoma ngo mutunga, mahi elaka liovana-ndunge lihakula.” (Provérbios 12:18) Namphila tuhahande okuihameka omunthu wasoya, mahi pamwe tupondola okutyilinga nonondaka mbetu inkha tupopia tyihasoko. Opo tupameke ovakuatate vetu, tuna okuvelekesa okuti tusuka navo iya tukahi nokulinga ononkhono mbokunoñgonoka ovitateka vekahi nokulambela.—Mateus 7:12.

15. Otyiti patyi tyakolela tupondola okuundapesa opo tuungumanese vakuetu?

¹⁵ Undapesa Ondaka ya Huku opo uungumanese vakuenyi. (Tanga Romanos 15:4, 5.) Ombimbiliya, Ondaka ya “Huku una waava ekoleleyo nepameko,” ngotyo katyituhuvisa okunoñgonoka okuti tuvasamo onondaka mbutukuatesako okuungumanesa vakuetu. Tupu, tuna o Índice das Publicações da Torre de Vigia, Nomukanda Wokuovolola wo Nombangi mba Jeova. Moviti ovio, tuvasamo ono testu nomikanda tupondola okuundapesa opo tuungumanese nokupameka ovakuatate vetu nonomphange.

16. Ovituwa patyi mavitukuatesako okupameka una wasoya?

¹⁶ Kala nokankhenda, noluembia. Jeova o “Tate wokankhenda okanene, tupu o Huku weungumaneso aliho,” una “okankhenda” novaumbili vae. (Tanga 2 Coríntios 1:3-6; Lucas 1:78; Romanos 15:13) Paulu waava ongeleka ongwa konthele yotyo mokonda ankho uhetekela Jeova. Wahoneka okuti: “Onthue tuakala nokankhenda nonwe, nga ina unyamisa iya utekula ovana vae noluembia. Mokonda yoluembia olunene tuna nonwe, tuakala nehambu liokumupopila onondaka onongwa mba Huku, nokulinga atyiho tuvila, mokonda tumuhole unene.” (1 Tessalonicenses 2:7, 8) Tyina tuna oluembia nga Jeova, matutyivili okuava eungumaneso omukuatate wetu ekahi nokuita ku Jeova!

17. Onkhalelo patyi yokutala ovakuatate vetu maitukuatesako okuvepameka?

¹⁷ Tala ovakuatate vove monkhalelo yapola pokati. Tala ovipuka ngetyi vikahi. Inkha ukevelela ovakuatate vove vafuisepo atyiho valinga, monumana navo. (Eclesiastes 7:21, 22) Hinangela okuti Jeova wapola pokati konthele yetyi akevelela ku onthue iya tuhanda okumuhetekela. Ngotyo, tuesukisa okupwa-elundo na vakuetu. (Efésios 4:2, 32) Onthue katuhande ovakuatate vetu velitehelele okuti kavekahi nokulinga ononkhono ine okuveeleka na vakuavo. Mahi, tuvepameka tupu tupandula ovipuka oviwa vekahi nokulinga. Otyo tyipondola okuvekuatesako okukala nehambu liokuumbila Jeova.—Gálatas 6:4.

18. Omokonda yatyi tuhandela okupameka vakuetu nohole?

¹⁸ Kese muumbili wa Jeova wakolela unene kwe no ku Jesus. (Gálatas 2:20) Mokonda tuhole unene ovakuatate vetu, tuna okuvetekula nokankhenda. Onthue “tuovola okulinga ovipuka vieta ombembwa, novipuka vitupameka pokati.” (Romanos 14:19) Tyakolela unene okulinga ngotyo mokonda tukahi nokukevelela Omphangu Yombembwa, omu nawike makakala vali tyasoya! Kamukakala vali omauvela novilwa. Ovanthu kamavakankhia vali mokonda youkuankhali, tupu katukamoneswa vali ononkhumbi, nokukala novitateka viombunga novikuavo vali. Konthyulilo yomanima ovityita ekwi, ovanthu mavakakala tyihena vali onkhali. Vana vatualako okukala ovakuatyili ku Jeova meheteko liahulililako, mavakakala ovana vae iya avakahambukwa “neyovo ewa liovana va Huku.” (Romanos 8:21) Ngotyo, atuho tukalei nohole ipameka iya atulikuatesako okuyovoka opo tukakale atuho mouye omupe wa Huku.