WAHATALUKWE LUNGUKA!
Okutilila Kovilongo Ovikwavo — Ovanthu Ovanyingi Vekahi Nokutaula mo Ucrânia
Okuhimbikila mu 24 ya Fevereiro yo 2022 otyilongo tyo Rússia tyahimbika okulwisa otyilongo tyo Ucrânia. Mokonda yovilwa ovio ovanthu ovanyingi vekahi nokutilila kovilongo ovikwavo iya mokonda yotyo ovanthu ovanyingi vesukisa okukwateswako.a
“Motyilongo ankho muivala omatenda ekahi nokututana. Tyetutilisile unene owoma netyi vala ndyityipopia hityii-ale. Etyi twetyiiva okuti kuna omboyo ikahi nokutyinda ovanthu atulongela twende. Omunthu ankho una vala okutyinda ovipuka vifwa vala mosokala ike, oyo vala ankho apondola okutyinda. Twatyinda vala onondukumendu, novihemba, nomaande netyi tupondola okulila mondyila. Ovipuka vietu twevisapo atukahateka okueda no komboyo, konyima otyo tweivite onombomba mbututana.” — Nataliia, woko Kharkiv, Ucrânia.
“Nkhele ankho katutavela okuti motyilongo tyetu mamuhimbika ovilwa. Ankho ndyiivite onombomba mbukahi okutunga mepunda-umbo aliho otyo onondyanena mbuteketa. Andyitokola okutunda motyilongo tyatyinda vala ovipuka viehehi. Natunda meumbo 8:00 andyikavelama momboyo, konyima andyivelama mekalela lienda noko Polónia.” — Nadija, woko Kharkiv, Ucrânia.
Monthele ei vasa omakumbululo omapulo aa:
Omokonda yatyi ovanthu vekahi nokutilila kovilongo ovikwavo?
Namphila ovanthu vekahi nokulomboka mokonda yomafualali o Rússia atyitukilapo o Ucrânia, mahi Ombimbiliya ipopia ovipuka ovinene vali vikahi konyima yotyitateka otyo:
Ovatumini vouye kavetyivili okulingila ovanthu etyi vesukisa. Vana vekahi nokutumina vaundapesa outumini wavo opo vamonese ovanthu ononkhumbi. — Eclesiastes 4:1; 8:9.
Satanasi Eliapu, “omutimini wouye,” ukahi nokuhongiliya ovanthu okulinga ovivi, mokonda yotyo Ombimbiliya yati: “Ouye auho utuminwa nondingavivi.” — Suau 14:30; 1 Suau 5:19.
Namphila tukahi nokumona ovitateka vikahi nokumonesa ovanthu ononkhumbi momanima omanyingi, tukahi nokulambela momuwo umwe Ombimbiliya yaula okuti: “Kononthiki mbahulilila, makukeya omuvo wepuiya.” (2 Timotiu 3:1) Ngetyi tyipopia Ombimbiliya, mononthiki ombo ankho makukamoneka ovilwa, novinimawe nondyala nomauvela, otyo tyikahi nokutwala ovanthu okukahupila kovilongo ovikwavo. — Luka 21:10, 11.
Opi Ovanthu Vapondola Okuvasa Ekevelelo?
Ombimbiliya ipopia okuti Omutingi wetu Siovaa,b o Huku uhole ovanthu nokuna okankhenda novanthu aveho na vana vatunda momaumbo avo avatilila kovilongo ovikwavo. (Deuteronômio 10:18) Huku wati makamanako ovitateka viovanthu vatilila kovilongo ovikwavo, meketyilinga Nouhamba wae ukahi nokutuminina keulu Ouhamba oo maukapinga ovatumini aveho. (Daniel 2:44; Mateusi 6:10) Siovaa maundapesa Ouhamba wae opo ahanyeko Satanasi Eliapu. (Ova Loma 16:20) Ouhamba oo maukatumina ovanthu mouye, aukamanako etyi ovanthu valinga tyokulitetaila ovilongo. Ovanthu aveho mavakakala vala ombunga ike yelikwata-po. Nawike vali mekesukisa okutaulila kotyilongo otyikuavo, mokonda Ombimbiliya yati: “Kese umwe makapumphama mombuelo yomuvinyu wae no mombuelo yomukuyu wae, nawike mekevetilisa owoma. Mokonda omulungu wa Siovaa wo nongombo mbovita wetyipopia.” — Miquéias 4:4.
Ouhamba wa Huku oo vala maukatetulula ovitateka viovanthu vataulila kovilongo ovikwavo ngetyi tuete hono. Siovaa Nouhamba wae makamanako ovitateka vikahi nokutwala ovanthu okutaulila kovilongo ovikwavo. Tala onongeleka mbumwe:
Ovilwa. “[Siovaa] makamanako ovilwa.” (Salmo 46:9) Opo unoñgonoke vali oñgeni Huku makamanako ovilwa, tanga onthele yati: “Okuti Kombanda Yohi Makukakala Ombembwa?”
Oundyale Noungangala. “Siovaa makayovola ovanthu koundyale noungangala.” (Salmo 72:14) Opo unoñgonoke okuti ovanthu vena omitima omivi vapondola okupiluluka, tanga ononthele mbati: “Lityilika Okuyala Vakuenyi.”
Oluhepo. “[Siovaa] makayovola omuhepi uliyava opo akuatesweko.” (Salmo 72:12) Opo unoñgonoke oñgeni Huku mamaneko etyi tyieta oluhepo, tanga onthele yati: “Okuti Nthiki Imwe Ovanthu Aveho Mavakakala Umwe Nonombongo?”
Okulia Kuhamoneka. “Mouye mamukakala ovilinga ovinyingi.” (Salmo 72:16) Opo unoñgonoke etyi Huku malingi naamaneko ondyala, tanga onthele yati: “Ouye Umwe Muhena Vali Ondyala?”
Okuti Ombimbiliya Ipondola Okukwatesako Vena Vataulila Kovilongo Ovikwavo?
Enga. Kaivepopila vala okuti komutwe ovipuka mavikakala nawa, tupu Ombimbiliya ivekwatesako okulambela movitateka vena hono.
Etyi Ombimbiliya Ipopia: “Omunthu omuhima utavela kese ndaka ipopiwa, mahi una walunguka unoñgonoka nawa apa maliate.” — Provérbios 14:15.
Otyo Okutiwi: Soka kovitateka vipondola okukutumbukila otale etyi molingi opo uliamene. Lunguka komakongo-mbanda ahanda okulinga omapita vana vataulila kovilongo ovikwavo tyina vameya apa mukahi.
Etyi Ombimbiliya Ipopia: “Inkha tuna etyi tulia netyi tuvala, tuhambukwa novipuka ovio.” — 1 Timotiu 6:8.
Otyo Okutiwi: Lityilika okusuka unene nomalumono. Tavela okukula vala neevi wesukisa otyo matyikwetela vali ehambu.
Etyi Ombimbiliya Ipopia: “Ovipuka aviho muhanda ovanthu vemulinge, tupu nonwe ovio muvelinga.” — Mateusi 7:12.
Otyo Okutiwi: Kala omunthu wapwa elundo nouwa-tima. Ovituwa ovio mavikukwatesako okutyiliya motyilongo ukahi novanthu wavasa avakala liwa nonthilo noove.
Etyi Ombimbiliya Ipopia: “Muhakondolelei nawike otyivi notyivi.” — Ova Loma 12:17.
Otyo Okutiwi: Ankho omunthu umwe wekulinga tyimwe tyapenga ove wahanumane. Otyo tyipondola vala okuvilisapo ovipuka.
Etyi Ombimbiliya Ipopia: “Ame ndyina ononkhono movipuka aviho, mokonda ya una umpha epameko.” — Ova Filipu 4:13.
Otyo Okutiwi: Yeka Huku alinge onthele yomwenyo wove nokulikwambela kwe. Huku mekukwatesa otyivili okulambela movitateka una.
Etyi Ombimbiliya Ipopia: “Muhakalei notyiho notyipuka natyike, mahi, mu aviho, itei unene ku Huku nomalikuambelo kumwe nolupandu. Iya ombembwa ya Huku, ipona onondunge nomalusoke aeho, maiyungu omitima vienyi nomalusoke enyi.” — Ova Filipi 4:6, 7.
Otyo Okutiwi: Ita Huku ekwevele ombembwa yokomutima nomomalusoke omawa nautyivile okulambela mu kese tyitateka una. Tala onthele yati: “Ova Filipu 4:6, 7 — ‘Muhakalei notyiho notyipuka natyike.’”
a Monthiki o Rússia yautukila o Ucrânia, Omutimini Wotyilinga Tyokuyakula Ovanthu Vatilila Kovilongo Ovikwavo, wati tuna otyitateka otyinene. Mononthiki vala 12 ovanthu vakalamba po nomiliau onombali vataula mo Ucrânia okuenda nokovilongo ovikwavo ine ononthele ononkhuavo mo Ucrânia.
b Siovaa enyina lya Huku. (Salmo 83:18) Tala onthele yati: “Olie Siovaa?”