Onongeleya Novilwa mo Ucrânia — Oityi Ombimbiliya Yapopia?

Tala onondaka mbumwe mbulekesa etyi omalombe nonkhalamutwe mbumwe mbongeleya vapopia mo Ucrânia:

• “Elombe liongeleya Ortodoxa mo Rússia, Elombe Cirilo, kaliapopile natyike tyiilika etyi vo Rússia vekahi nokulinga okukaluisa o Ucrânia . . . . Etyi ovanthu vongeleya yavo vehole okupopia tyayemba ko Ucrânia, tyilekesa okuti Putin walinga nawa etyi vekahi nokulwisa o Ucrânia.” — EUobserver, 7 ya Março yo 2022.

• “Elombe Cirilo . . . lietyilekesa unwe nawa-nawa okuti ovanthu vo Ucrânia vena okuluiswa no Rússia, lipopia okuti ovilwa ovio okuluisa onkhali.” — AP News, 8 ya Março yo 2022.

• “Motyasikunda elombe Epifânio I de Kiev lyo Ngeleya Ortodoxa mo Ucrânia lialembula ovanthu vomo Ucrânia, opo valwise ovanthu voko Rússia . . . Tupu liapopia okuti okuipaa etolopa lyo Russia hankhaliko.” — Jerusalem Post, 16 ya Março ya 2022.

• “Onthwe [omalombe okupakaila-mo omakapela nonongeleya mo Ucrânia twahula komatolopa o Ucrânia na vana vekahi nokutukwatesako movilwa tulikwambela opo vatwaleko okulwa vaamene otyilongo konondyale mbetu.” — Omalombe o Ucrâniaa, 24 ya Fevereiro yo 2022.

Oityi ove usoka? Okuti onongeleya mbuliti mbulandula Sesusi Kilisitu mbuhongiliya ovanthu opo vaye kovilwa? Oityi Ombimbiliya yapopia konthele yotyo?

Onongeleya novilwa tyilikwata

Onongeleya ononyingi mbuhole okuhongiliya ovanthu okulipaka movilwa, mahi tupu otyo mbupopia okuti mbuovola ombembwa. Momanima ovanyingi Onombangi mba Siovaa vehole okupopia okuti otyo omatutu. Tala etyi omikanda vietu viapopia.

• Onthele yati: “Okulityitukilapo: Ovilwa ‘Vimwe Ovinene’” ipopia ongeleya yo Katolika yo Loma velipaka movilwa viaipale ovanthu ovanyingi otyo vati tutyilingila menyina lya Huku na Kilisitu.

• Onthele yati: “Ongeleya yo Katolika mo Afilika” yapopia oñgeni ongeleya yo Katolika yehetyivilile okumanako ovilwa ankho vikahi pokati kovanthu veliyele.

• Onthele yokwati: “Onongeleya Ombo Mbuvelwa Onombei?” no yokwati: “Otyilinga Tyonongeleya Movilwa Viovanthu” no yokwati: “Onongeleya Mbelityitukilapo” mbupopia oñgeni omalombe o Katolika no Ortodoxa no Protestante, aveho velipakele movilwa ovio.

Okuti Ovakilisitau velipaka movilwa?

Tala etyi Sesusi alongesa: “Una okukala nohole na munthele yove ngetyi ulihole ove muene.” (Mateusi 22:39) “Tualeiko okukala nohole nonondyale mbenyi” — Mateusi 5:44-47.

Tala etyi Sesusi alongesa: “Ouhamba wange kaulingi onthele youye uno. Inkha Ouhamba wange walingile onthele youye uno, ñgeno ovalanduli vange valwa opo nahapakulwe.” (Suau 18:36) “Aveho vakuatela vakuavo omutunga navo mavakaipawa nomutunga.” — Mateusi 26:47-52.

Nkhele soka kwetyi: Ovakilisitau ankho kavesukisa okulwa, atee umwe etyi tyesukisa ñgeno ankho opo vaamene Sesusi, ngotyo oityi vali tyiveluisa? Tanga onthele yati: “Ovakilisitau Velipaka Movilwa?” na utale oñgeni Ovakristau vo potyita tyotete valandula etyi Sesusi alinga netyi alongesa.

Oityi matyilingwa onongeleya mbuhongiliya ovilwa?

Ombimbiliya ilongesa okuti Huku uyele onongeleya mbupopia okuti mbulandula Sesusi, mahi kambulingi ngetyi alongesile. — Mateusi 7:21-23; Titu 1:16.

• Omukanda Eholololo upopia okuti onongeleya ombo mbuvelwa onombei na Huku, mokonda “yovanthu aveho vaipawa kombanda yohi.” (Eholololo 18:21, 24) Opo utyinoñgonoke omokonda yatyi, tanga onthele yati: “Ombambilonia Onene Oityi?”

• Sesusi walongesa okuti onongeleya ambuho mbuyelwe na Huku mokonda yokulinga ovivi mambuya okuhanyuako, ngetyi omuti wavola, wiima ovinyango viavola “utyokwa-po auyumbwa motupia.” (Mateusi 7:15-20) Tanga onthele yati: “Onthyulilo Yonongeleya Ikahi Popepi!” na utale oñgeni matyikaenda.

Olutalatu lwawa, okupolela kokumbili okutwala no kokulio: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images