Okuti Kombanda Yohi Makukakala Ombembwa?

Ekumbululo Lyo Mbimbiliya

Mouye mamukala Ombembwa, kamayeetwa nomunthu nawike, mahi mayeetwa Nouhamba wa Huku, outumini wokeulu ukahi nokutuminwa na Kilisitu Sesusi. Tala etyi Ombimbiliya itulongesa konthele yekevelelo olio ewa unene.

1. Huku “makanyimako ovilwa mouye auho,” opo afuisepo omulao wae wokweta “ombembwa kombanda yohi kovanthu vana apanda!” — Salmo 46:9; Luka 2:14, Nova Versão Internacional.

2. Ouhamba wa Huku, ukala keulu maukatumina ohi aiho. (Daniel 7:14) Mokonda Huku omutimini ukahi nawa, makamanako okapungulula, kekahi nokueta unene ovilwa mouye.

3. Sesusi, Omutumini wouhamba wa Huku, wihanwa okuti “Ohamba Yombembwa” makalinga atyiho iya “ombembwa yae kamaikapwa.” — Isaías 9:6, 7.

4. Ovanthu vokutualako okuluisa vakuavo kavakakala vali Mouhamba wa Huku, mokonda [Huku] “uyele vana vehole oungangala.” — Salmo 11:5; Provérbios 2:22.

5. Huku utulongesa okuti ovanthu mavakatuminwa Nouhamba mavakakala nombembwa. Okupopia konthele yondongeso oyo, Ombimbiliya yati: “Mavakanthila omitunga viavo omatemo, iya omaonga avo avekeenthila onofoso. Kamavekeliluisa vali, tupu kavekelilongesa vali ovita.” — Isaías 2:3, 4.

Onombangi mba Siovaa mouye auho vekahi nokulongeswa na Huku okukala ovana-mbembwa. (Mateusi 5:9) Namphila tuatunda momihoko vielikalaila nokukala movilongo vilamba po 230, onthue katutavela okukuata omauta opo tuipae vakuetu.