Sombe
5 “Hono ihana utale! Olie mekutavela pahe?
Oupi povakwa-ukola ove mohatekela?
2 Onkhongo maikaipaa omuhima,
Onkhi aiipaesa wokwahasoko nawa.
3 Ame namona omuhima uyumba omii,
Mahi pakala vala katutu, apa akala apateyelwa onkhano.
4 Ovana vae vetupu apa vapamena,
Vamiangulilwa umwe kombundi yepunda-umbo,+ avahamono nawike uveamena.
5 Vokwankhia ondyala valia etyi omuhima ateya,
Vetyipola umwe no momakete.
Olumono lwavo lunkhia meliva.
6 Ononkhumbi kambutundu vala meheke,
Eli emone kalimene vala pohi.
7 Omunthu utyitilwa vala ononkhumbi,
Wafwa onohahe* mbwenda vala no meulu.
8 Mahi ame omphela yange ñgeno yekehika ku Huku,
Ñgeno natwala ondaka yange ku Huku,
9 Una ulinga ovipuka ovinene vipwiya okuvinoñgonoka,
Una ulinga ovipuka vihuvisa viehelifwe pano.
10 Ulokesa ombila,
Utuma omeva aatalaleka ofika.
11 Ukulameka una weliola omutima,
Apake kounene una waetesa onkhenda emuyovola.
12 Uhanya onomphango mbo vokuyondya,
Opo evi valinga nomavoko avo viahaviuke.
13 Vokwatonkhoka mokuyondya kwavo omo umwe evekwatela,+
Onomphango mbo vokwalunguka ambuhanyauka.
14 No komutenya umwe vamona enthiki,
No komutenya-tenya tyina vaenda vahihita uti vala okounthiki.
15 Huku uveyovola ku vana vatyinda omitunga komilungu,
Uyovola omuhepi peke lyo wokwapama.
16 Wokwehena-tyo una apa apamena,
Mahi omulungu wovivi ukati umwe filuu.
17 Tala! Uhambukwa oyouna uviyulwa na Huku.
Tyina uviyulwa no Wokuvila Atyiho, wahaanye!
18 Ngwe wati okweeta olwihamo utyivila, okuhakula otyipute katyimupono.
Wati vala okuvanga omunthu utyivila, okuhakula otyipute nomavoko ae utyivila.
19 Mekuyovola kovihuna epandu,
Tyina tyiti mo lya pandu-vali ovihuna viya vitupu etyi mavikulingi.
20 Pondyala mekekuyovola kononkhia,
Apa povilwa mekekuyovola komutunga.*
21 Ove mokayakulilwa kolukava lwelaka,+
Ehanyauno okuya, ove kumakatila owoma.
22 Ehanyauno mokeliyola, ondyala mokeiyola,
Kumakatila owoma ovinyama viofika kombanda yohi.
23 Mepia liove kamukakala omamanya ekunyona,*
Ove novinyama viofika mamukakala nombembwa.
24 Ove moketyimona okuti apa watungila ohinge yove pakola,*
Tyina ukaya komalihilo ove kakukakamba natyike.
25 Ove mokamona ovana ovanyingi,
Vakatuka mwoove vakalinga ovanyingi ngeholi kombanda yohi.
26 Ove no meendo moimo tyakola,
Moi tyakola ngovipandi viovilia viti no pokuviteya nkhele vili komangenge akola.
27 Tala! Otyo onthwe twetyiovolola nawa, ovipuka ongootyo viakala.
Tehelela, otyilingi.”