Sombe
11 Sofale+ omu Naamaa apopi ati:
2 “Okuti onondaka ombo ambuho kamambukumbululwa?
Okuti okupopia unene, omunthu opo pahe utiwa waviukisa?*
3 Wati hamwe ovanthu mavati vala filuu ngwe ove wapopia evi viahasilivila?
Wati hamwe petupu ou mekuviyula omukwele ou una-o?+
5 Mahi nahandele ñgeno Huku upopia,
Ñgeno ukwiikulila omulungu wae!+
6 Ñgeno wekupimphululila apa patuka ounongo,
Mokonda ounongo una ononthetelo ononyingi.
Noove mwene ñgeno wetyimona okuti ovivi vimwe ulinga una Huku kesuku-ale navio, uvilimbwa.
7 Okuti ove utyivila okunoñgonoka ovipuka ovinene vya Huku,
Utyivila okunoñgonoka nawa* Omunene?
8 Ounongo waya peulu, walamba-po eulu. Ove ñgaa oityi-vo upondola okulinga?
Waya kohi, waya vali tyipona Kondyembo.* Ove pahe ñgaa monoñgonoka-tyi?
9 Ounongo omunene, walamba-po ohi,
Ounongo wekelitaha-taha, walambapo elunga.
10 Huku okukwata omunthu emutwala momphela,
Olie umuti etyi ulinga otyityi?
11 Huku utyimona tyina ovanthu vakemba.
Okuti okumona ovivi, kesuku uvitala vala?
12 Mahi omuhima ketyimono-ale,
Pala etyimone umwe, opo nkhwali otyimbulu tyohika tyatyita omunthu.
13 Nahandele vala ñgeno ove uviukisa omutima wove,
Oyelula omavoko ove, ulikwambele kwe!
14 Peke liove sukula-po ovivi ulinga,
Monohinge mbove wahayekele-mo ovivi.
15 Ine otyo ulinga otyo, opo mokatula omutwe, ohakundu,
Opo mokala tyitai, kumatili owoma.
16 Ine ulinga ngootyo, kononkhumbi mbove molimbwa-ko,
Kumbuhinangela vali, mambulingi vala ngomaande ondongi yaetele apitale.
17 Ononthiki mbomwenyo wove mambuvialuka nawa ngo komutenya.
Nenthiki umwe, malikakala ngo komuhuka kwatya.
18 Ove mopame omutima mokonda una apa wapamena,
Mokati otale oku, otale oku, okalangala-po vala nawa.
19 Ove mokalala otumphoki, petupu ou mekekuhonga,
Ovanthu ovanyingi mavekwoovola, mavahande ove uvehambukilwe.