Selemiya
24 Pahe Siovaa andekesa onosesu onombali mbomakuyu mbapakwa komutwe wondywo ya Siovaa, etyi Nambukondonosole* ohamba yo Mbambilonia atwala-le koukonde Sekoniya*+ omona wa Seoyakii+ ohamba yo Sundaa, nae novakwatesiko vohamba yo Sundaa, no vokunthila, no vokuundapa novivela;* etyi evepola ko Selusalei evetwala ko Mbambilonia.+ 2 Osesu imwe ina omakuyu ekahi nawa, ekahi ngoo okuhimbika okupia, mahi osesu onkhwavo ina omakuyu ekahi omapita, ekahi unene omapita ehetavela okulia.
3 Pahe Siovaa amphulu ati: “Oityi weete Selemiya?” Andyikumbulula andyiti: “Omakuyu; amwe ekahi nawa, ekahi umwe nawa, mahi omakwavo ekahi omapita, ekahi umwe unene omapita kaetavela okulia.”+
4 Pahe ondaka ya Siovaa aindyendela aiti: 5 “Etyi otyo tyapopia Siovaa Huku yo Isilayeli wati: ‘Etyi mandyitale ngomakuyu oo ekahi nawa, ova Sundaa vatwailwe koukonde, mandyiveti vekahi nawa, ava nataatele motyilongo muno, avaende no kotyilongo tyova Kalindeya. 6 Mandyipake omaiho ange kuvo vamone otyiwa, mandyivekondola motyilongo tyino.+ Mandyivetungu vatalame, anehevehanye-ko; mandyivetwiki, anehevetukula-po.+ 7 Mandyiveavela omutima wokunoñgonoka ame, utyii okuti ame ame Siovaa.+ Mavakalinga ovanthu vange, ame andyikalinga Huku yavo,+ mokonda mavakakondoka kwaame nomutima auho.+
8 “‘Aa pahe omakuyu okukahi omapita, ekahi umwe omapita ehetavela okulia,+ etyi otyo tyapopia Siovaa wati: “Ongootyo mandyitale Sendekiya,+ ohamba yo Sundaa, nae novakwatesiko vae, no vokwesala mo Selusalei vahupa motyilongo tyino, na vana vakakala motyilongo tyo Isitu.+ 9 Mandyivelingi etyi tyitilisa owoma, otyipuka tyivekundisa komauhamba aeho o pohi.+ Mavakapenywa, avakapopilwa omihe, mavakakwelwa, avekekutumbula pononkhano vateyela+ ponohika ambuho mandyikevetyandyanesa napo.+ 10 Mandyikevetuma omutunga,+ nondyala, nomukihi,*+ atee motyilongo neveavela vapwa-mo, otyilongo nevepa, navo nonombwale mbavo.”’”