Selemiya
34 Ondaka ya Siovaa ayeendela Selemiya pweetyi Nambukondonosole* ohamba yo Mbambilonia, nae novita viae aviho, nomauhamba o kombanda yohi aeho atumina, novanthu aveho veli nokulwisa o Selusalei nomapunda-umbo atyo aeho o popepi, aiti:+
2 “Etyi otyo tyapopia Siovaa Huku ya Isilayeli wati: ‘Enda kapopile Sendekiya,+ ohamba yo Sundaa, mutolela uti: “Etyi otyo tyapopia Siovaa wati: ‘Ame ndyili nokupakula epunda-umbo eli peke liohamba yo Mbambilonia, maikelipaka otupia, alipi.+ 3 Ove kumakahupa peke liae, ove mokatyindwa-po umwe, okapakulwa peke liae.+ Mokatala momaiho ohamba yo Mbambilonia, ngwe aikapopia noove tyipala na tyipala; oende no ko Mbambilonia.’+ 4 Pahe, tehelela ondaka ya Siovaa, ove Sendekiya hamba yo Sundaa: ‘Pokwekupopia ove Siovaa wati: “Ove kumakankhia komutunga. 5 Mokankhia umwe nawa,+ avekekulingila oviso viokunthiakana ovikakava tyina ukapakwa ngeetyi valingailile onombwale mbenyi, onohamba mbali-ko etyi ove weheneye, ovanthu mavekekulila, avati: ‘Tatiei! Tatekulu yange!’ mwene ‘ame neipopia ondaka oyo,’ o Siovaa wetyipopia.”’”’”
6 Omuuli Selemiya apopila onondaka ombo ambuho Sendekiya ohamba yo Sundaa ko Selusalei, 7 pweetyi ovita viohamba yo Mbambilonia vili nokulwisa o Selusalei nomapunda-umbo aeho o Sundaa okwahupa-po,+ o Lakisi+ no Aseka,+ mokonda omapunda-umbo oo okwapama, oo vala ahupile-po pomapunda-umbo o Sundaa.
8 Ondaka ya Siovaa ayeendela Selemiya konyima yeetyi ohamba Sendekiya alinga omphango novanthu aveho mo Selusalei opo vapopie eyovo motyilongo,+ 9 aveho vayeke ovapika vavo ova Hembeleu vaye, tyilinge ovalume tyilinge ovakai, nawike usala no ou velilandula nae omu Sundaa emulingi omupika. 10 Ovanene vatyo aveho avetavela, novanthu aveho avetavela. Aveho avalingi omphango yokuti vena okuyeka ovapika vaye, novalume novakai, nawike usala nomupika. Avetavela otyo, aveveyeke. 11 Mahi etyi pakala, avakapola-po ovanthu ovo vayekele novalume vatyo novakai vatyo, avevepake vali moupika. 12 Ondaka ya Siovaa itunda ku Siovaa ayeendela Selemiya aiti:
13 “Etyi otyo tyapopia Siovaa Huku ya Isilayeli wati: ‘Ame nalinga omphango nonombwale mbenyi+ monthiki nevepola kotyilongo tyo Isitu, otyilongo tyoupika,*+ ipopia okuti: 14 “Tyina pamakala omanima epandu-vali, amuho muna va Hembeleu vakwenyi muna okuveyeka, ava mwalanda veli-ale nokumuundapela momanima epandu; onwe muna okuveyeka vayovoke.”+ Mahi onombwale mbenyi kavetyitavelele nii avehetyiyendelekela okutwi. 15 O pononthiki apa* mwelivela, amulingi umwe etyi tyaviuka komaiho ange okwapopila umwe vakwenyi eyovo. Onwe mwalingila umwe omphango kotyipala tyange mondywo yatyinda enyina liange. 16 Mahi pahe mweiyeka-po vali, mwasilisa enyina liange+ okukapolako vali ovapika, novalume novakai vatyo mwalingile etyi mwene vahanda,* mwayovolele, mwevepaka vali moupika.’
17 “Etyi otyo tyapopia Siovaa wati: ‘Onwe kamwetavelele okutolela ovanthu vayovoke, okutyitolela ovakulu venyi nonondenge, naava mwelitungaila navo.+ Pahe ame mandyimupopila eyovo eli,’ o Siovaa wetyipopia, ‘onwe mamunkhi komutunga, no kondyala,+ no komukihi,* mandyimulingi otyipuka tyitilisa owoma onohamba ambuho kombanda yohi.+ 18 Etyi otyo matyilingwa omulume waliatela komphango yange, wahalingile etyi tyapopia onondaka mbomphango valingila kotyipala tyange etyi vateta pokati ondume-tane, avakwata pokati kovinthimbu viatyo,+ 19 tyati umwe, ovanene vatyo vomo Sundaa, ovanene vatyo vomo Selusalei, ovanene vombonge, ovanakwa, novanthu aveho votyilongo, ava vakwatele pokati kovinthimbu vivali vionthane: 20 ame mandyivepakula konondyale mbavo, ava vahanda okuvepola omwenyo,* ovivimbi viatyo mavikalinga okulia kwoviila meulu, kwovinyama kombanda yeheke.+ 21 Mandyikapakula Sendekiya ohamba yo Sundaa, novanene vatyo peke lionondyale mbavo, peke lya ava vahanda okuvepola omwenyo,* peke liovita viohamba yo Mbambilonia,+ ava vemuhitikinyine pahe veli nokwenda.’+
22 “‘Ame mandyipe otyitumino,’ o Siovaa wetyipopia, ‘mandyivekondola mepunda-umbo eli, avekelilwisa, avanyingila-mo, avelipake otupia, alipi;+ epunda-umbo lyo Sundaa mandyilityitula ekongola, kamalikala na munthu.’”+