Selemiya
37 Ohamba Sendekiya+ omona wa Sosiya ahimbika okutumina apingi pu Koniya*+ omona wa Seoyakii, mokonda Nambukondonosole* ohamba yo Mbambilonia wemuvialeka alingi ohamba motyilongo tyo Sundaa.+ 2 Mahi nae, novaundapi vae, novanthu votyilongo, kavetavelele onondaka mba Siovaa apopilile momuuli wae Selemiya.
3 Ohamba Sendekiya atumu Seukali+ omona wa Silemiya, na Sofoniya+ omona wa Maaseya omunakwa, komuuli Selemiya vekemupopile okuti: “Twiitileko-vo ku Siovaa Huku yetu.” 4 Selemiya opo wenda-enda vala nawa movanthu, opo nkhele kenepakwe mokalavoso.+ 5 Opo yatyo, ovita vya Falaoo mo Isitu avitundu-mo,+ ava ova Kalindeya vokwapaka pokati o Selusalei avetyiivi. Ngwe pahe o Selusalei aveihi-po, avaende.+ 6 Pahe, ondaka ya Siovaa ayeendela omuuli Selemiya aiti: 7 “Etyi otyo tyapopia Siovaa Huku ya Isilayeli wati: ‘Etyi otyo onwe mukapopila ohamba yo Sundaa, yokwemutuma kwaame, muti: “Tala! Ovita vya Falaoo vili nokuya vimwaamene, mavakondoka kotyilongo tyavo, ko Isitu.+ 8 Ova Kalindeya mavakondoka vali muno avalwisa epunda-umbo eli, avanyingila-mo, avelipake otupia, alipi.”+ 9 Etyi otyo tyapopia Siovaa wati: “Mwehelikembei* amuti: ‘Ova Kalindeya mavaende umwe, kamavetulwisa-le vali,’ mokonda kamavaende. 10 Mupondola umwe okwiipaa ovita aviho vyo va Kalindeya veli nokumulwisa, ava vahupa-po avesala novipute, no ngootyo mavakatunda umwe monohinge mbavo, avapake epunda-umbo eli otupia, alipi.”’”+
11 Etyi ovita vyo va Kalindeya viasapo o Selusalei mokonda yovita vya Falaoo,+ 12 Selemiya atundu mo Selusalei ende no kotyilongo tya Mbesamii,+ aye ko vavo akapewe tyae. 13 Etyi ehika Kombundi ya Mbesamii, omululiki watyo wovayungi utiwa o Seliya omona wa Silemia, Silemia omona wa Hananiya, akwata omuuli Selemiya, emuti: “Ove wahula kova Kalindeya!” 14 Mahi Selemiya ati: “Otyo hatyili-ko! Ame hahulile kova Kalindeya.” Seliya ehemutehela-le. Akwata Selemiya, emutwala kovanene vatyo. 15 Ovanene vatyo avanumanena Selemiya;+ avemuvete, avemukwata,*+ avemupake mondywo ya Seyonataa, omuhoneki, ei pahe yalingwa okalavoso. 16 Selemiya apakwa mondywo yokuna omatoto okalavoso,* akala-mo ononthiki ononyingi.
17 Ohamba Sendekiya aitumu vekemupole-mo, aimupulila pokamphengi mondywo* yayo.+ Aipulu aiti: “Ove una ondaka ya Siovaa?” Selemiya ati: “Yoo, ndyina!” Apopi vali ati: “Ove mopakulwa peke liohamba yo Mbambilonia!”+
18 Selemiya tupu apulu ohamba Sendekiya ati: “Onkhali patyi nalinga kwoove, no kovaundapi vove, no kovanthu ava, etyi mwamphaka mokalavoso? 19 Velipi, velipi ovauli venyi vokumupopila okuti: ‘Ohamba yo Mbambilonia kamaiya okumulwisa, kamaiya motyilongo muno’?+ 20 Pahe, tehelela-vo nkhele, tatekulu hamba. Tavela-vo mbaa etyi mandyikwiiti. Wahankhondole vali mondywo ya Seyonataa+ omuhoneki, muna mandyikankhila-mo.”+ 21 Ohamba Sendekiya aiti Selemiya akwatwe, akapakwa Mepata Liovayungi,+ apewa-pewa ombolo ike ononthiki ambuho yo komuvanda wovayoki vonombolo+ atee onombolo mepunda-umbo mbapwa-mo.+ Selemiya apangela vala Mepata Liovayungi.