Selemiya
40 Ondaka ya Siovaa ayeendela Selemiya etyi Nembusalandaa+ omunene wovayungi emuyovola pahe ko Lamaa.+ Wemutwaile-ko tyakutwa, Selemiya nae wali povikonde viatundile ko Selusalei no ko Sundaa, viatwailwe no ko Mbambilonia. 2 Pahe omunene wovayungi akwata Selemiya ati: “Siovaa Huku yove, wapangele okweeta ovihuna mohika muno, 3 Siovaa aeta umwe ovihuna apopile, onwe umwe mwalinga onkhali ku Siovaa, mwehetavelele ondaka yae. Otyo hono mumonena ovihuna evi.+ 4 Ame pahe hono ame uno nkhukutulula momalienge ali komavoko ove. Ine wahanda twende atuho ko Mbambilonia, twende, ame mandyikuyungu nawa. Mahi ine kuhande okwenda ko Mbambilonia, opo sala. Weete! Otyilongo tyino atyiho otyove. Oku mwene wapanda oko wende nako.”+
5 Tyina Selemiya nkhele ehenemutyindamene aye, Nembusalandaa ati: “Kondoka ku Sendaliya+ omona wa Aikau,+ Aikau omona wa Safaa,+ ou ohamba yo Mbambilonia yanaka atumine epunda-umbo lyo Sundaa, ngae mukakala nae, amuho novanthu aveho; okuti hatyo, opo enda no oku mwene wapanda.”
Pahe omunene wovayungi, emupe okulia, novipuka ovikwavo vali, emuyeke aye. 6 Ou Selemiya aende no ku Sendaliya omona wa Aikau ko Misipaa,+ oe vakakalele nae novanthu aveho vahupile motyilongo.
7 Etyi pakala, ovanene vovita vali monthanda novita, avetyiivi okuti ohamba yo Mbambilonia yapaka Sendaliya omona wa Aikau kovipundi motyilongo, atumine ovalume, novakai, novana, vana vokwahepa, vokwahatwailwe ko Mbambilonia.+ 8 Avaende no ku Sendaliya ko Misipaa.+ Tyati o Isimayeli+ omona wa Netaniya, o Soanaa+ na Sonataa, ovana va Kaleyaa, o Selaya omona wa Tanumete, novana va Efai, omu Netofa, na Sesaniya+ omona wo mu Maakate, aveho avaende novita viavo. 9 Sendaliya omona wa Aikau, Aikau omona wa Safaa apopi navo aane, navo novita viavo, ati: “Mwahatilei owoma undapelei vala ova Kalindeya. Kalei vala motyilongo amuundapela ohamba yo Mbambilonia, atyiho matyimweende nawa.+ 10 Mahi ame, muno mo Misipaa himatundu, opo ndyimukalele-po tyina ova Kalindeya vameya. Mahi onwe kongololei ovinyu, novinyango vyo pombila, nomulela, amupake nawa ovipuka ovio movityuma, amukala momapunda-umbo aa mwaholovona.”+
11 Ova Sundaa aveho vali ko Moambe, no ko Amoo, no ko Endoo, no movilongo aviho ovikwavo, avetyiivi okuti, ohamba yo Mbambilonia yasa ovanthu vamwe ko Sundaa, yapaka kovipundi Sendaliya omona wa Aikau, Aikau omona wa Safaa evetumine. 12 Pahe ova Sundaa aveho avahimbika okutunda-ko kovilongo aviho vatyandyanesilwe nako, aveya avanyingila motyilongo tyo Sundaa, avaviuku ku Sendaliya ko Misipaa. Avakongolola ovinyu, novinyango vyo pombila ovinyingi-nyingi.
13 Soanaa omona wa Kaleyaa, novanene aveho vovita vali motyipembe, avaende no ku Sendaliya ko Misipaa. 14 Avemupulu okuti: “Ove kutyii okuti Mbaalisi, ohamba yova Amoo+ yatuma Isimayeli omona wa Netaniya, ekwiipae?”*+ Mahi Sendaliya omona wa Aikau, ehevetavela.
15 Soanaa omona wa Kaleyaa, apopila pokamphengi Sendaliya ko Misipaa, ati: “Nahanda okwiipaa Isimayeli omona wa Netaniya, petupu ou metyimono. Hapala ngwe aipae ove,* ovanthu aveho vomo Sundaa veli nokukongoloka veya no kwoove avekelityandyana, ava vesala-mo mo Sundaa avaipawa!” 16 Sendaliya+ omona wa Aikau, apopila Soanaa omona wa Kaleyaa ati: “Wahalinge ngootyo, otyo uli nokupopia Isimayeli ukemba, hatyili-ko.”