Selemiya
41 Mohanyi ya pandu-vali, Isimayeli+ omona wa Netaniya, Netaniya omona wa Elisama, womuhoko wonohamba,* umwe povaundapi ovanene vatyo vohamba, avaende novalume 10 ku Sendaliya omona wa Aikau, ko Misipaa.+ Pokuli opo nokulia aveho ko Misipaa, 2 Isimayeli omona wa Netaniya, novalume 10 ena-vo, avakatuka, avaipaa Sendaliya omona wa Aikau, Aikau omona wa Safaa, nomutunga. Aipaa umwe ou ohamba yo Mbambilonia yapakele kovipundi atumine otyilongo. 3 Isimayeli aipaa nova Sundaa aveho vali na Sendaliya ko Misipaa, novita aviho ova Kalindeya vali-ko.
4 Etyi Sendaliya aipawa, tyina tyiti muhuka lya mukwavo, nkhele nawike-ale utyii okuti waipwa, 5 akuya ovalume 80 vatunda ko Sikei,+ no ko Silo,+ no ko Samaliya.+ Ankho vakulula onondyeli, ovikutu viavo viatandauka, veliteta molutu,+ vatyinda oviawa viovilia, nolimbanu+ vaeta kondywo ya Siovaa. 6 Isimayeli omona wa Netaniya atundu ko Misipaa vakahonyene navo, otyo aenda nokulila. Etyi velivasa navo, evepopila okuti: “Twendei ku Sendaliya omona wa Aikau.” 7 Mahi etyi vehika mepunda-umbo, Isimayeli omona wa Netaniya novita viae aveveipaa, aveveyumbu monyombo.
8 Mahi, povalume opo, pali ovalume 10 vapopilile Isimayeli avati: “Wehetwiipae, onthwe tuna otiliku, nosevata, nomulela, nowiki twaholeka momapia etu.” Eheveipaa ngeetyi aipaa ava velilandula navo. 9 Isimayeli ayumbu monyombo imwe onene ovalume aveho aipaele, monyombo ohamba Asa aheyele mokonda ya Mbaasa ohamba yo Isilayeli.+ Monyombo omo Isimayeli omona wa Netaniya ayulisa-mo ovivimbi viovalume vokwankhia.
10 Isimayeli atwala koukonde aveho vokwahupile ko Misipaa,+ aveho novana vohamba ovakainthu novanthu aveho vesalele ko Misipaa, ava Nembusalandaa omunene wovayungi asilile Sendaliya+ omona wa Aikau, akale navo. Isimayeli omona wa Netaniya evetwala koukonde, aende no kotyilongo tyova Amoo.+
11 Etyi Soanaa+ omona wa Kaleyaa, novanene vovita vena-e veviiva ovivi aviho Isimayeli omona wa Netaniya alinga, 12 avakongolola ovalume aveho vakalwise Isimayeli omona wa Netaniya, avekemuvasa ponthele pomaande omanene* ko Simbeau.
13 Ovanthu aveho vokwali na Isimayeli avahambukwa etyi vamona Soanaa omona wa Kaleyaa novanene vovita ena-vo. 14 Pahe ovanthu aveho Isimayeli apolele ko Misipaa+ evetwala koupika, avaanguluka-ko, avakondoka na Soanaa omona wa Kaleyaa. 15 Mahi Isimayeli omona wa Netaniya, novalume etyinana ena-vo, Soanaa avekemuhomboka, avaende no kotyilongo tyova Amoo.
16 Soanaa omona wa Kaleyaa novanene aveho vovita ali navo, avaende novanthu vahupa-po vo ko Misipaa, ava vahukululwa ku Isimayeli omona wa Netaniya, etyi aipaa Sendaliya+ omona wa Aikau. Avapolo ovalume ko Simbeau, novakwa-vita, novakai, novana, novanene vombonge. 17 Avaende, avalalela mondywo yonongendi ko Kimaa, ponthele po Mbelei,+ nomphango yokwenda no ko Isitu+ 18 mokonda yova Kalindeya. Ankho vevetila owoma mokonda Isimayeli omona wa Netaniya waipaa Sendaliya omona wa Aikau, ou ohamba yo Mbambilonia apakele kovipundi atumine otyilongo.+