Selemiya
42 Ovanene vatyo vovita, aveho na Soanaa+ omona wa Kaleyaa, na Sesaniya omona wa Osaiya, novanthu aveho, novana vatyo, novakulu vatyo, aveya 2 avatolela omuuli Selemiya avati: “Mbaa tavela-vo etyi matukwiiti, linga-vo elikwambelo ku Siovaa Huku yove, itila-ko ovanthu aveho tuhupe, mokonda pahe vahupa-po kavehi+ vali, mwene noove utyeete. 3 Siovaa Huku yove, etupopile ondyila tulandula, neetyi tuna okulinga.”
4 Omuuli Selemiya evekumbulula ati: “Nemwiiva etyi mwatola, mandyilikwambela ku Siovaa Huku yenyi ngeetyi mwaita; onondaka ambuho Siovaa amapopi mandyiya okumutolela-mbo. Himemuholeka ondaka naike.”
5 Avapopila Selemiya avati: “Siovaa alinge ombangi itukwata, ombangi yotyili, iyumbwa onthumbi ine hono onthwe katulingi etyi Siovaa Huku yove ekutuma utupopile. 6 Apopie-popie ondaka ongwa, apopie ondaka ombi, onthwe matutavela ondaka ya Siovaa, ou twati oko wende, opo onthwe tukala-vo nawa tyina tutavela ondaka ya Siovaa Huku yetu.”
7 Pahe apakala ononthiki 10, ondaka ya Siovaa ayeendela Selemiya. 8 Ngwe aihana Soanaa omona wa Kaleyaa, aihana novanene aveho vovita ali navo, novanthu aveho, novana novakulu,+ 9 evepopila ati: “Etyi otyo tyapopia Siovaa Huku yo Isilayeli, ou onwe mwanthuma mwati ndyikemwiitileko, una wati: 10 ‘Ine onwe mukala umwe vala motyilongo tyino, mandyimutungu mutalame, himemuteye-po, mandyimutwiki, himemutukula, mandyilikondola* kweetyi nalinga tyokumutuma ovihuna.+ 11 Mwahatilei owoma ohamba yo Mbambilonia, ei onwe mwalingila otyiho.’+
“‘Mwehemutilei owoma,’ o Siovaa wetyipopia, ‘mokonda ame ndyina onwe mandyimuyovola kokuvoko kwae, mandyimuyakulila. 12 Ame mandyimulingi okankhenda+ nae emulingi okankhenda, emukondola kotyilongo tyenyi.
13 “‘Mahi, onwe ine muti: “Au, kamatukala motyilongo tyino!” amwehetavela ondaka ya Siovaa Huku yenyi, 14 amuti: “Au, onthwe matwende vala no kotyilongo tyo Isitu,+ oko hahe kutupu ovilwa, oko kamatukeiva onkhwino ihika, kamatukakala nondyala; oko onthwe matweende,” 15 tehelelei ondaka ya Siovaa, onwe vokwahupa mo Sundaa. Etyi otyo tyapopia Siovaa womambamba ovita, Huku yo Isilayeli wati: “Ine onwe mwahanda okwenda ko Isitu, ngako mukakala,* 16 omutunga onwe mwatila owoma oo maukemuvasa kotyilongo tyo Isitu, nondyala onwe mwatila owoma oyo maikemulandula ko Isitu, ngako onwe mukankhila.+ 17 Ovalume aveho vahanda okwenda no ko Isitu, mavakankhia komutunga, no kondyala, no komukihi.* Nawike puvo makahupa kovihuna mandyikeveetela.”’
18 “Etyi otyo tyapopia Siovaa womambamba ovita Huku yo Isilayeli wati: ‘Ngeetyi nanengulilile onyengo yange, nolunuma lwange kovanthu vokukala mo Selusalei,+ otyo mandyimunengulila onyengo yange ine mwenda no ko Isitu, onwe mamukateyelwa onkhano, amulingwa etyi tyitilisa owoma, amukapenywa, amukalingwa omukwele,+ onwe kamamukamona vali otyilongo tyino.’
19 “Siovaa onwe apopia, vokwahupa-po mo Sundaa. Mwahayei no ko Isitu. Pakei monondunge mbenyi etyi ndyili nokumulondola hono, 20 okuti onkhali yenyi maimupesela komwenyo.* Mokonda onwe mwanthumine ku Siovaa Huku yenyi amuti: ‘Twitile-ko ku Siovaa Huku yetu, otupopila etyi Siovaa Huku yetu amekupopila, tyamapopiwa onthwe matutyilingi.’+ 21 Ame nemupopila umwe, mahi onwe kamamutavela ondaka ya Siovaa Huku yenyi, nii kamamulingi natyike anthuma nemupopila.+ 22 Kalei tyityii okuti onwe mamukankhia komutunga, no kondyala, no komukihi, kotyilongo oku mwahanda okwenda nako.”+