Selemiya
19 Etyi otyo tyapopia Siovaa wati: “Enda komuhongi wonombiya kalande omulindi.*+ Endei noove novakulu vamwe votyilongo, novakulu vamwe povanakwa, 2 enda okehika Kelola Liomona omukwendye wo Hinoo,+ Kombundi Yovimphemu. Oko, oko ukapopila onondaka mandyikupopila. 3 Ove mokapopia okuti: ‘Tehelelei ondaka ya Siovaa, onwe nohamba mbo Sundaa, noonwe vokukala mo Selusalei. Etyi otyo tyapopia Siovaa womambamba ovita, Huku ya Isilayeli, wati:
“‘“Ame ndyili nokweeta ovihuna mohika muno, momakutwi a ava vekeviiva mamukaluluma. 4 Otyo mandyityilingi umwe mokonda vandyeka-po,+ ohika ei aveityitula, ailingi ngoti kaiiwe.+ Omu omo valingila ovilikutila ono huku ononkhwavo ombu vehei-ale, navo nonombwale mbavo, nonohamba mbo Sundaa, ngwe veyulisa ohika ei ohonde yovanthu vehena etyi valinga.+ 5 Vatungila Mbaale onomphangu mbukola mbaya peulu opo vayokele-ko ovana vavo, okuvelingila Mbaale ovilikutila,+ otyipuka nahatumine, nii nahapopile, tyeheile-ale komutima wange.”’*+
6 “‘“Tala! ononthiki omboo mbuya,” o Siovaa wetyipopia, “ononthiki ohika ei yahamakatiwa vali o Tofete, nii kaikatiwa vali Elola Liomona omukwendye wo Hinoo, mahi maikatiwa Elola Liokwiipaa.+ 7 Ame mandyityopola etyi o Sundaa, no Selusalei vapangela ohika ei, andyivetokesisa nomutunga konondyale mbavo, peke lya ava vesuka nomwenyo wavo.* Ovivimbi viavo mavikalinga okulia kwoviila, kwovinyama vyo pohi.+ 8 Epunda-umbo eli mandyikelityitula epunda-umbo limwe litilisa owoma, ovanthu avekelihikila omwelwa.* Aveho vakakwata-po mavekelitala avatili owoma, avelihikila omwelwa mokonda yovihuna vialio.+ 9 Mandyivelisisa ohitu yovana vavo ovakwendye novakainthu, munthu na munthu makalia ohitu ya mukwavo mokonda yokwahitikinywa, yokwehulilwa putyina vamapakwa pokati nonondyale mbavo, naava vesuka nokuvepola omwenyo.”’*+
10 “Pahe tyatyulila umwe omulindi momaiho ovalume mamweende navo, 11 ovepopila oti: ‘Etyi otyo tyapopia Siovaa womambamba ovita wati: “Ongeetyi ame mandyityatyaula ovanthu ava nepunda-umbo eli, mandyivelingi ngomunthu utyatyaula ombiya, ayehetavela vali okwiiviukisa; mavakapaka ovivimbi ko Tofete atee vahamono vali apa vevepaka.”’+
12 “‘Otyo, otyo mandyikalinga ohika ei,’ o Siovaa wetyipopia, ‘novanthu vakala-mo, opo epunda-umbo eli lilinge ngo Tofete. 13 Omaumbo o Selusalei nomaumbo onohamba mbo Sundaa maakasila ngohika ei yo Tofete,+ yoo, onondywo ambuho keulu valingila ovilikutila omambamba aeho ovita o keulu,+ oku vanengulila oviawa viovikunwa ono huku ononkhwavo.’”+
14 Etyi Selemiya atunda ko Tofete, oku Siovaa emutumine akapopie, atalama pepata liondywo ya Siovaa, apopila ovanthu aveho ati: 15 “Etyi otyo tyapopia Siovaa womambamba ovita, Huku ya Isilayeli wati: ‘Ame ndyili nokweetela epunda-umbo eli novanthu aveho vakala kononthele mbalio, ovihuna aviho napopile natile mandyivieeta-mo, mokonda vatesa onkhango,* kavetavelele onondaka mbange.’”+