Isekiyele
30 Ondaka ya Siovaa aindyendela vali aiti: 2 “Mona womulume popia, popia uti: ‘Etyi otyo tyapopia Tatekulu Ohamba Onene Siovaa, wati:
“Liyavei, muti: ‘Tatiei, onthiki oyoo iya!’
3 Mokonda onthiki ili popepi, yoo, onthiki ya Siovaa ili unene popepi.+
Maikalinga onthiki yomakaka,+ omuvo wanakwa wovanthu vovilongo.+
4 Omutunga maukakatukila o Isitu, o Etiopia maikapipililwa, tyina ovivimbi viamatokela mo Isitu;
Olumono lwatyo alutyindwa-mo, omalisesu atyo aahanywa-po.+
5 Etiopia,+ Pute,+ Lunde, novanthu velikalaila* vakala-mo,
No Kumbe, novana ovakwendye votyilongo tyomphango,*
Aveho ovo, mavakatoka komutunga.”’
6 Etyi otyo tyapopia Siovaa wati:
‘Vokwaama ko Isitu, navo mavakatoka,
Ononkhono mbayo mbokulityinda-tyinda, mambukapakwa pohi.’+
“‘Okuhimbikila ko Mingindole+ atee ko Siyene,+ mavakatoka komutunga motyilongo omo,’ o Tatekulu Ohamba Onene Siovaa wetyipopia. 7 ‘Ovilongo ovio, mavikahanyauka vali unene kovilongo ovikwavo, omapunda-umbo atyo maakalinga vali unene omakongola komapunda-umbo omakwavo.+ 8 Mavakankhola umwe okuti ame, ame Siovaa tyina namapake otupia mo Isitu, na tyina aveho vaama kuyo, vamamiangaulwa. 9 Monthiki oyo, mandyikatuma ovatumwa-ndaka nonombaluku opo vakateketese o Etiopia yokweliyumba onthumbi; mavakapipililwa monthiki ili nokuya, onthiki mayeendela o Isitu, mokonda maiya umwe tyili.’
10 “Etyi otyo tyapopia Tatekulu Ohamba Onene Siovaa, wati: ‘Otyiumbe-umbe tyili mo Isitu mankhetyimana-ko nokuvoko kwa Nambukondonosole* Ohamba yo Mbambilonia.+ 11 Nambukondonosole novita viae, ovakalavi vali kovanthu aveho vovilongo,+ mavakaetwa vahanye otyilongo. Mavakanana-mo omitunga viavo valwise o Isitu, otyilongo maveketyiyulisa ovivimbi.+ 12 Omilola vyo Nilu+ mandyivikukutisa, andyilandesa otyilongo andyityiyekela peke liovalume ovakalavi. Okuvoko kwonthunda-vilongo+ mandyihanye nako otyilongo, novipuka aviho vili-mo. Ame mwene Siovaa, netyipopia.’
13 “Etyi otyo tyapopia Tatekulu Ohamba Onene Siovaa, wati: ‘Mandyikahanya-ko novilolo vitoyesa,* andyikamana-ko novika-huku viahasilivila vyo Nofe.*+ Motyilongo tyo Isitu kamukatunda vali omunene nawike,* ame mandyikapaka owoma motyilongo tyo Isitu.+ 14 Mandyikahanya-ko o Patolo,+ andyipake otupia mo Sowaa, andyikaongela omphela o Noo.*+ 15 Mandyikauyulila onyengo yange ko Sine, omphangu yapama yo Isitu, andyihanye-ko ovanthu vomo Noo. 16 Mandyikapaka otupia mo Isitu; o Sine maikateketa tyowoma, o Noo maikateywa-po kononkhono, o Nofe,* maikalwiswa komutenya watokota! 17 Ovakwendye votyilongo tyo Ome,* no tyo Pi-Mbesete mavakatoka komutunga, vokukala momapunda-umbo mavakatwalwa koupika. 18 Onthiki mandyikateya okanga yo Isitu, mo Tafene mamukanthikovela.+ Ononkhono mbayo mbokulityinda-tyinda mambukapwa-ko,+ maikankhilimikwa nomakaka, vokukala momapunda-umbo atyo mavakatwalwa koupika.+ 19 Mandyikaongela omphela o Isitu, mavakankhola umwe okuti ame, ame Siovaa.’”
20 Menima 11, mohanyi yo tete, monthiki ya pandu-vali, ondaka ya Siovaa aindyendela aiti: 21 “Mona womulume, ame nateya okuvoko kwa Falaoo ohamba yo Isitu; kamakuhakulwa opo kwahaveluke, nokukutwa kamakukutwa novinyanga, opo kwahatwame, na ehetyivile okukwata omutunga.”
22 “Etyi otyo tyapopia Tatekulu Ohamba Onene Siovaa wati: ‘Ame nanumanena Falaoo ohamba yo Isitu,+ mandyimuteya-teya omavoko, no oku kokwakola, no kokwateka-le,+ peke liae omutunga mandyiutokesa-po.+ 23 Pahe ova Isitu andyivetyandyanesa movanthu vovilongo, andyivetwala-twala movilongo.+ 24 Mandyikapameka omavoko ohamba* yo Mbambilonia,+ andyipake omutunga wange peke liae,+ mandyikateya-teya omavoko a Falaoo, makakemena unene ponthele yae* ngomunthu uyeka omwenyo. 25 Mandyikapameka omavoko ohamba yo Mbambilonia, mahi omavoko a Falaoo maakawa; mavakankhola umwe okuti ame, ame Siovaa tyina namapake omutunga wange peke liohamba yo Mbambilonia, eukatulila otyilongo tyo Isitu.+ 26 Ova Isitu mandyikevetyandyanesa movanthu vovilongo, andyikevetwala-twala movilongo,+ ngwe mavakankhola umwe okuti ame, ame Siovaa.’”