Isekiyele
35 Ondaka ya Siovaa aindyendela vali aiti: 2 “Mona womulume, pilukihila otyipala ko Seili,+ otyilongo tyonomphunda, popia etyi matyikalingwa.+ 3 Tyipopila uti: ‘Etyi otyo tyapopia Tatekulu Ohamba Onene Siovaa, wati: “Ame nekunumanena, ove Seili, tyilongo tyonomphunda, ame mandyikutandavekela okuvoko kwange, andyikutyitula ekongola.+ 4 Omapunda-umbo ove, mandyikeetyitula onohika mbahanyauka, okalinga ekongola;+ ove mokankhola umwe okuti ame, ame Siovaa. 5 Soka ove ova Isilayeli wevelinga onya imwe onene,+ ovepakula komutunga pomuvo vatumbukilwa novihuna, pomuvo omphela yavo yavituka.”’+
6 “‘Ndyitukaila umwe omwenyo wange,’ o Tatekulu Ohamba Onene Siovaa wetyipopia, ‘ame mankhupakula kokumomesa ohonde, okumomesa ohonde matyikuhukaisa.+ Mokonda ove ohonde wayala, ohonde oyo umwe maikekuhukaisa.+ 7 O Seili, otyilongo tyonomphunda, mandyiketyityitula ekongola,+ mandyikanyima-ko aveho vakwata-mo, ava vaya naava vakondoka. 8 Onomphunda mbatyo mandyikembuyulisa ovivimbi; vokwankhia komutunga, mavakatokela movipunda viove, no momalola ove, no monondongi mbove ambuho mbweenda. 9 Mandyikekutyitula ekongola ngatyo umwe ukakala-kala, omapunda-umbo ove kamaakakalwa vali;+ onwe mamukankhola umwe okuti ame, ame Siovaa.’
10 “Mokonda ove wati: ‘Ovanthu vovilongo evi vivali mavalingi vange, novilongo viatyo vivali mavilingi viange,+ onthwe matukala-mo,’ ngwe Siovaa yatyo omo eli, 11 ‘ndyitukaila umwe omwenyo wange,’ o Tatekulu Ohamba Onene Siovaa wetyipopia, ‘etyi mankhulingi mandyityilingi nononyengo nonkhwelume, ngeetyi noove weveyala;+ mavakankhola umwe ame ame-lie tyina namekwoongela omphela. 12 Ove noove moketyimona umwe okuti ame Siovaa, neiva aviho wapopia-popia vileva onomphunda mba Isilayeli, etyi wati: “Mbahanyaunwa-po, mbapakulwa kwoonthwe tumbunyine-po.”* 13 Onwe mwamphopia nomakamo, mwapopia onondaka ononyingi mbundeva.+ Atyiho ame netyiiva.’
14 “Etyi otyo tyapopia Tatekulu Ohamba Onene Siovaa, wati: ‘Ohi aiho maikahambukwa, tyina ame namekutyitula ekongola. 15 Ngeetyi ove wahambukilwe pweetyi epingo lieumbo lya Isilayeli lialinga ekongola, noove otyo mandyikekulinga.+ Ove mokalinga ekongola, ove Seili, tyilongo tyonomphunda, ove umwe, o Endoo aiho;+ mavakankhola umwe okuti ame, ame Siovaa.’”