Isekiyele
5 “Ove mona womulume, kwata omutunga watwa nawa olikulula nao. Likulula onohuki mbove momutwe nonondyeli, pahe haa ombupeyala, ombutepaula ounthumbo. 2 Okanthumbo kamwe okepake motupia akapila mokati kepunda-umbo tyina ononthiki mbokwelihondya mbamapu.+ Opolo vali okakwavo, okevange nomutunga otyo uliseta nepunda-umbo* aliho.+ Pahe okwate okanthumbo ka tatu okekuvu momphepo, ame mandyipolo-mo omutunga andyimbutaata.+
3 “Nkhele opolo vali onohuki mbumwe, ombupake potyikutu tyove.* 4 Opolo-po vali onohuki, ombuyumbu motupia, ombuyoko. Otupia oto, matuhanduka neumbo aliho lya Isilayeli.+
5 “Wetyitola o Tatekulu Ohamba Onene Siovaa, wati: ‘Ei o Selusalei. Neipaka pokati kovanthu vovilongo, novilongo vieliseta nayo. 6 Mahi ngwe kayetavelele ovitumino viange vionomphela, ovitumino viange, yalinga vali ovivi unene tyipona ovanthu vovilongo ovikwavo, novilongo aviho vieliseta nayo.+ Mokonda kavetavelele ovitumino viange vionomphela, kavalandulile movitumino viange.’
7 “Pahe Tatekulu Ohamba Onene Siovaa, wati: ‘Mokonda mwalinga vali onomphuki tyipona vovilongo ovikwavo vieliseta noonwe kamwalandulile ovitumino viange, nii kamwakwamene movitumino viange vionomphela, mwalandula ovitumino vionomphela viovanthu vovilongo ovikwavo vieliseta noonwe,+ 8 tyapopia Tatekulu Ohamba Onene Siovaa, otyetyi: “Ame nekunkhila onyengo, ove punda-umbo,+ mandyikwoongela omphela mokati omo mwoove, otyo ovanthu vovilongo aviho vatala.+ 9 Etyi mandyilingi omo mwoove hinetyilinge, himeketyilinga vali, motyimono mokonda welipaka movipuka aviho vitoyesa.+
10 “‘“Mokati omo mwoove, ovanthu mavakalia ovana vavo,+ ovana mavakalia o vohe, mandyikaonga omphela mokati omo mwoove, matyihupu mwoove mandyiketyiyandyanesa nonohika* ambuho.”’+
11 “‘Ndyitukaila umwe omwenyo wange,’ wetyitola o Tatekulu Ohamba Onene Siovaa, ‘mokonda wasilisa omphangu yange ikola weipa ovilolo viove ovivi, novituwa viove vitoyesa,+ naame mandyikwaanye.* Eiho liange kamalilingi onkhenda, nii himekulingi okankhenda.+ 12 Povinkhunkha vitatu viovanthu tyimwe matyikankhila mwoove, ine kavankhi komukihi* mavakankhia kondyala. Otyinkhunkha otyikwavo, matyikankhila kondye mavakankhia komutunga.+ Etyi otyikwavo mandyiketyihandaula nonohika* ambuho, andyinane-mo omutunga andyivelandula.+ 13 Opo pahe, onyengo yange maitulu, onyengo ndyina-yo maipu himevenumanena vali, pahe mandyikululuka.+ Ngwe mavakankhola umwe okuti ame ame Siovaa, napopia mokwahanda ndyifendwe vala andyike,+ tyina nameveuyulila onyengo yange.
14 “‘Mandyikekusa tyahanyauka, mokakwelwa novanthu vovilongo vieliseta noove, no vomaiho aeho alamba ondyila.+ 15 Mokalinga wokukwelwa, wokupenywa,+ ovanthu avalondokela kwoove, mokatilisa owoma ovanthu vovilongo vyo popepi, apa haa ndyikatula omphela yove nononyengo, nokwanumana, utyimone etyi mankhulingi. Ame Siovaa ame netyipopia.
16 “‘Mandyikevetuma onohevo mbondyala mbwipaa, ndyivehanye-ko. Onohevo mandyiyahe, mambumuhanye-ko.+ Mandyikateta kokulia kwenyi* ondyala yove ivilepo.+ 17 Mandyimutumu ondyala novinyama ovikalavi,+ avimusi tyehena ovana. Matyiti nomukihi neetyi tyokumomesa ohonde matyikemulemena, ame mandyimutumu omutunga.+ Ame Siovaa, ame netyipopia.’”