Isekiyele
46 “Etyi, otyo tyapopia Tatekulu Ohamba Onene Siovaa, wati: ‘Ombundi yo mepata lyo mokati yokwahula koutundilo,+ ikale tyaikwa+ mononthiki epandu mbovilinga,+ mahi monthiki yotyasapalo, no monthiki ohanyi iviala, iikulwe. 2 Ohongoi oe manyingilila kondywo yo kombundi, atalama ponthele potyipamba tyombundi.+ Ovanakwa mavalingi otyiawa tyokuyokwa, novilikutila viombembwa maeta, ngwe elipetamena pepunduka liombundi, alupuka-mo. Mahi ombundi ikala tyaikuka atee kongulohi. 3 Ovanthu votyilongo, navo mavekelipetamena ku Siovaa pombundi oyo movityasapalo, na tyina ohanyi iviala.+
4 “‘Otyiawa tyokuyokwa ohongoi makapakula ku Siovaa monthiki yotyasapalo, ovingi epandu viakongoka nawa, nongi ike onthwei yakongoka nawa.+ 5 Kongi ike onthwei uvandeka-ko o efa* ike yotyiawa tyovilia, kondyona uvandeka-ko etyi ena-tyo. Ko efa ike una uvandeka-ko o him* ike yomulela.+ 6 Monthiki ohanyi iviala, maave ondume-tane yo motyunda, novingi epandu, nongi ike onthwei. Aviho vina okukala ovipako viakongoka nawa.+ 7 Ohongoi waava ondume-tane, avandeka-ko o efa ike yotyiawa tyovilia, no efa ike avandeka kongi onthwei, oku kovingi avandeka-ko etyi ena-tyo. Ko efa ike uvandeka-ko o him ike yomulela.
8 “‘Tyina ohongoi anyingila, unyingilila kondywo yo kombundi, ngako vali haa alupukila.+ 9 Tyina ovanthu votyilongo vanyingila mondywo ya Siovaa povipito,+ omunthu unyingilila kombundi yo kombanda eya okufenda, haa ulupukila kombundi+ yo kombwelo, ou unyingilila kombundi yo kombwelo, haa ulupukila kombundi+ yo kombanda. Petupu ou ulupukila kombundi anyingilila, aveho vena okulupukila kombundi onkhwavo. 10 Ohongoi uli pokati kavo, unyingila vala tyina vamanyingila, alupuka tyina vamalupuka. 11 Movipito, no pononthiki mbovipito, waava ondume-tane, avandeka-ko o efa ike yotyiawa tyovilia, kongi onthwei avandeka-ko o efa ike, kovingi, avandeka-ko etyi ena-tyo. No ko efa ike uvandeka-ko o him ike yomulela.+
12 “‘Ine ohongoi wahanda okupakula ku Siovaa otyilikutila tyokuyokwa,+ notyilikutila tyombembwa, ombundi yokwahula koutundilo iikulwe, akwate-po, oe malingi otyilikutila tyae atyiho tyokuyokwa, notyilikutila tyombembwa ngeetyi alinga monthiki yotyasapalo.+ Tyina amalupuka-mo, ombundi iikwa.+
13 “‘Ononthiki ambuho, ove pakula ongi ike onthwei ina enima like, ilinge otyilikutila tyayokelwa Siovaa.+ Una okutyilinga ononthiki ambuho komuhuka. 14 Una okwaava ongi ononthiki ambuho komuhuka, nomapati evali upola ko efa ike* yohinde, ko him ike yomulela wokunyanya-ko upola-ko tyilamba katutu politulu, ilinge otyiawa tyovilia tyilingilwa apeho Siovaa. Otyo, otyitumino tyitwala-twala-ko apeho. 15 Ongi onthwei mayaawa noviawa viovilia, nomulela ononthiki ambuho komuhuka, avikala ovilikutila viokuyokwa vilingwa apeho.’
16 “Etyi, otyo tyapopia Tatekulu Ohamba Onene Siovaa, wati: ‘Ine ohongoi upa ohika ovana vae ilinge yepingo liavo, ohika oyo maikakala umwe yovana vae. Maikakala yavo, ilinge epingo liavo. 17 Ine upa umwe povapika vae ohika ilinge epingo, maikala vala yae atee menima ayovoka.+ Tyina amayovoka, epingo likondoka ku hekulu. Mahi, epingo aavela ovana vae, olio, oliavo umwe apeho. 18 Ohongoi kaipondola okupola ohika yepingo nalike liovanthu votyilongo, okuvepomba onohika mbavo. Ohika mailingi yepingo liovana vae, itunda kohika yae mwene. Ovanthu vange nawike upolwa pohika yae.’”
19 Pahe anthwala kombundi yokunyingila+ monondywo mbukola mulila ovanakwa mbahula kombanda,+ ponthele pombundi onene. Andyimono-ko omphangu imwe yahula koutakelo. 20 Amphopila ati: “Apa opo ovanakwa mavakateleka otyiawa tyokuvelwa onombei, notyiawa tyonkhali, opo mavakayokela oviawa viovilia,+ na vahatwale natyike kepata lyo kondye, opo vahasukukisa ovanthu.” +
21 Anthwala kondye, kepata lyo kondye, ankhwatesa pomavindi ekwana epata,* komavindi epata lyo kondye, andyimono-po epata ekwavo. 22 Komavindi ekwana epata, kuna omapata omatutu, ena onokovandu* 40 moule, no 30 mounthanda. Omavindi aeho ekwana elifwe.* 23 Kuna omitala* vieliseta nomavindi aeho ekwana, mombwelo yomitala muna omaiko okuteleka oviawa. 24 Amphopila ati: “Apa, opo ava vokuundapa mondywo ya Huku vateleka ovilikutila viaawa novanthu+ votyilongo.”