Ovana Vekwana Vetavelele ku Siovaa

Etyi Nambukondonosole atwala ovanthu vamwe voko Sundaa koukonde mo Mbambilonia, atumu omutumini umwe utiwa o Asipenasi opo evelongese. Nambukondonosole apopila Asipenasi opo akoye-po ovana vamwe vakongoka nawa, vena omutwe. Ovana ovo ankho opala valongeswe omanima etatu. Ovipuka mavalongeswa, mavivekwatesako okuundapa nawa ovilinga mavapewa mo Mbambilonia. Ovana ovo ankho vena okulongeswa okutanga, nokuhoneka, nokupopia elaka litiwa Akandia ankho lipopiwa mo Mbambilonia. Tupu ankho vena okulia ovikulia vilia ohamba novanthu ovakwavo vakala mombala yohamba. Ovana ovo, vekwana vakoyelwe tyati o Ndaniyele o Hananiya o Misaeli o Asaliya. Asipenasi eveluku omanyina omo Mbambilonia, Mbeletesasale na Sandalake na Mesake na Abedeneku. Okuti evi valongesilwe vieveyapulile kokufenda Siovaa?

Ovana ovo vekwana ankho vahanda okutavela ku Siovaa. Ankho vetyii okuti kavapondola okulia ovikulia viohamba mokonda Ovitumino vya Siovaa vipopia okuti ovikulia vimwe viasila. Avapopila Asipenasi avati: ‘Onthwe katupondola okulia ovikulia viohamba.’ Asipenasi eveti: ‘Ine kamuli ohamba tyina imutala ngoti omalutu enyi kaekahi nawa, maindyipaa!’

Ndaniyele asoko otyipuka tyimwe. Akapopia nomulume ankho uveyunga ati: ‘Twavele-vo vala onombi nomaande mononthiki 10. Ha pahe otale omalutu etu nomalutu ovana vakwetu valia ovikulia viohamba.’ Omulume wokuveyunga etavela.

Etyi palamba ononthiki 10, Ndaniyele nomapanga ae ankho vanina vali tyipona ovana vakwavo aveho. Siovaa ahambukwa unene mokonda vemutavelele. Siovaa akwatesako Ndaniyele etyivili okuhangununa onondyoi.

Etyi vamana okulongeswa, Asipenasi evetwala ku Nambukondonosole. Ohamba aipopi navo, aityimono okuti o Ndaniyele na Hananiya na Misaeli na Asaliya valongoka vali ku vakwavo, vena omutwe. Evekoyo vaundape mombala yae. Ohamba apeho tyina ankho ina otyipuka otyinene yahanda okulinga iveihana. Siovaa evekalesa ovanongo tyipona ovanthu aveho vaundapela ohamba.

Namphila Ndaniyele na Hananiya na Misaeli na Asaliya ankho vakala motyilongo tyihe tyavo, mahi kavalimbwile-ko okuti ovanthu va Siovaa. Okuti noove apeho uhinangela Siovaa, tyina umwe ovo tete yove vehe-po?