Siovaa Upameka Iliya

Etyi Sesambele eiva okuti, Iliya waipa ovauli va Mbaale, anumana unene. Atumu ondaka ku Iliya ati: ‘Muhuka mankhwipaa ngeetyi waipaa ovauuli va Mbaale.’ Iliya atili unene owoma akahateka nomoluhandya. Elikwambela ati: ‘Siovaa ame himetyivili vali okukoleleya. Mphole omwenyo wange.’ Iliya ankho waponwa unene, alangala-po mombwelo yomuti.

Oandyu aimupahula-po aimupopila okuti: ‘Pinduka-po ulie.’ Iliya amono ombolo yatokota nokatenda komaande. Ali, anu alangala-po vali. Oandyu aipahula-po vali Iliya aiti: ‘Lia ukale nononkhono utyivile okwenda.’ Iliya ali vali. Waendele ovitenya 40 novinthiki 40, ehiki Komphunda Holembe. Etyi ehika Komphunda, anyingila meleva alangala-po. Mahi Siovaa emupopila okuti: ‘Oityi ukahi nokulinga omu Iliya?’ Iliya ati: ‘Ova Isilayeli kavalingile ngeetyi vekupopila. Vahanya-po omitala viove tupu vaipaa ovauli vove. Pahe naame vahanda okundyipaa.’

Siovaa emupopila okuti: ‘Lupuka talama komphunda.’ Tete, akuya omphepo onene aikwate meleva eli. Akulandula otyinimawe notupia. Konyima, Iliya eivi ondaka imwe yapopila pombwelo. Iliya elihiki motyipala notyikutu tyae, akala pombundi yeleva. Siovaa emupulu okuti omokonda yatyi weila okuholama. Iliya ati: ‘Mokonda ame vala andyike ndyikahi nokukufenda.’ Mahi Siovaa emutolela okuti: ‘Ove kukahi awike. Nkhele kuna ova Isilayeli 7.000 vafenda ame. Enda kalembule Eliseu opo akale omuuli mapingi pwoove.’ Iliya aende alingi etyi Siovaa emutuma. Okuti noove una onthumbi yokuti Siovaa mekukwatesako ulinge etyi ekutuma? Yoo, mekukwatesako. Tutalei etyi tyaendele-po.