Omukwa-vita Nokamukainthu

Kotyilongo tyo Silia kwali okamukainthu kamwe okamu Isilayeli, kali kokule notyilongo tyo Isilayeli. Kapolelwe kombunga yako novakwa-vita vyo Silia akatwalwa kotyilongo oko kokule, akakala okamupika komukai wonkhalamutwe yovakwa-vita utiwa o Naamaa. Okamukainthu oko ankho kafenda Siovaa, namphila ovanthu ovakwavo vehemufende.

Naamaa ankho una ouvela umwe umwihama unene. Okamukainthu ankho kahanda okumukwatesako. Akatolela omukai wa Naamaa okuti: ‘Ame ndyii omunthu umwe upondola okuhakula omulume wove. Ko Isilayeli, kuna omuuli wa Siovaa utiwa o Eliseu. Upondola okuhakula omulume wove.’

Omukai wa Naamaa akatolela Naamaa etyi apopilwa nokamukainthu. Mokonda Naamaa wahandele okuveluka, aende keumbo lya Eliseu ko Isilayeli. Naamaa wahandele Eliseu emuyakule tyomunthu omunene umwe. Mahi Eliseu eheya okupopia nae, atumu omuundapi wae akapopile Naamaa okuti: ‘Enda Kondongi Solondau olindambwika-mo epandu-vali. Ine ulinga ngootyo moveluka.’

Naamaa anumana unene. Apopi okuti: ‘Ame ankho nasoka okuti omuuli manthyakula putyina apopia na Huku yae otyo aviva omavoko. Pahe unthuma ndyende kondongi yomo Isilayeli. Ko Silia kuna onondongi mbukahi vali nawa. Omokonda yatyi ahanthuminine kondongi imwe yo Silia?’ Naamaa anumana unene, atundu meumbo lya Eliseu.

Ovaundapi va Naamaa avemukwatesako okusoka vali nawa. Avemupopila okuti: ‘Ove kuhande okuhakuka? Etyi omuuli ekupopila ulinge katyalemene. Omokonda yatyi wehetyilingila vala?’ Naamaa evetavela. Aende Kondongi Solondau anyingila momaande tyikehika pepandu-vali. Mo lya pandu-vali etyi Naamaa atunda momeva, etyimono okuti waveluka. Ahambukwa unene, akondoka opo akapandule Eliseu. Naamaa apopi okuti: ‘Pahe ndyityii okuti Siovaa o Huku yotyotyili.’ Soka oñgeni tyakalesile okamukainthu okamu Isilayeli okumona Naamaa waveluka?