Eliapu Lilola Sesusi

Etyi Sesusi ambatisalwa, ononkhono mba Huku ambumutwala moluhandya. Akala ononthiki 40 tyahali natyike, aliwa nondyala imwe onene. Eliapu alipopila Sesusi okuti: “Ine umona wa Huku, popila omamanya aa atyituke ovimbembu vionombolo.” Sesusi apopi etyi Ondaka ya Huku ipopia ati: “Hambolo vala ipa omunthu omwenyo, mahi tyipa omunthu omwenyo ondaka itunda momulungu wa Siovaa.”

Eliapu alipopila vali Sesusi aliti: “Ine umona wa Huku, lomboka, mokonda tyahonekwa okuti: Huku makatuma onoandyu mbae kwoove mbukuyakulile.” Sesusi apopila vali Eliapu, ati: “Tyahonekwa: Wahalole Siovaa.”

Satanasi alilekesa Sesusi omauhamba aeho omouye nomalumono nomunkhima watyo, alimupopila aliti: “Aviho evi mandyikupe-vio, ikila vala konongolo ofende kwaame like vala.” Mahi Sesusi akumbulula okuti: ‘Pita na kuna Satanasi! Tyahonekwa okuti: Fenda vala Siovaa.’

Eliapu aliende, akuya onoandyu ambwavela Sesusi okulia. Okutuka opo, Sesusi aivisa oviwa ovipe Viouhamba. Alingi otyilinga tyemwetele pano pohi. Ovanthu ankho vehole unene etyi Sesusi evelongesa, oku vala amai nako avemulandula.