Ame Ankho Nahanda Vala Okulinga Etyi Nahanda

OMUENYO WANGE KOHALE:

Puetyi nkhele ndyimututu, ankho tukala ko Alemanha popepi Leipzig, Koutundilo wo Alemanha, ku hekokule unene nonondimbu mbo Czech no Polish. Etyi ndyina omanima epandu, mokonda yovilinga via tate atuilukila kotyilongo tyokondye—tete tuaya noko Brasil iya konyima atuende noko Equador.

Puetyi ndyina omanima 14, andyikalongeswa ko Alemanha. Mokonda ovotate ankho vakala kokule, ko America do Sul, ame ankho ndyikala andyike. Andyikala notyituwa tyokulitumina. Ame ankho hisoko etyi ndyilinga, oñgeni matyikalesa vakuetu.

Etyi natuukisa omanima 17, ovotate avakondoka ko Alemanha. Tete ankho ovo vanthekula. Mahi mokonda ankho netyiliya okulitumina, atyimphuiya unene okukala novotate. Etyi natuula omanima 18 andyitundu meumbo.

Ame anehesuku vali nokuovola esilivilo liomuenyo. Etyi natala ononkhalelo mbelikalaila mbomuenyo nomaongano omanyingi, andyisoko okuti otyipuka otyiwa ndyina okulinga momuenyo wange, okuovola ovipuka oviwa mohi ei, tainkholo ovanthu veihanye.

Andyitundu ko Alemanha, andyilande omota andyiede noko Afilika. Pakala vala katutu, andyisoko okukondoka ko Europa opo ndyipangiye omota yange. Konyima, nthiki imwe ankho ndyikahi konthele yelunga pana patalamena onombapolo Koputu (Portugal). Andyitokola okusapo omota yange opo ndyilinge oungendi nombapolo.

Andyilipake kumwe novakuendye ankho vekahi nokulifuiika opo vayapuke Elunga Atlantico. Pokati kavo ankho pena umwe makala omukai wange, Laurie. Tete, tuaya pokalongo kekahi pokati komeva ko Caribe. Konyima, etyi tuakala katutu ko Porto Rico, atukondoka noko Europa. Ankho tukevela okuvasa okanowa kekahi nawa ngako tuenda-enda nako. Tuakala onohanyi ononthatu nokuovola, mahi olusoke olo aluhafuiswapo. Ame nakuatua andyikala efualali lio Alemanha.

Andyikala onohanyi 15 moufualali okuundapa melunga. Mokueenda kuomuvo oo, atulinepe na Laurie iya atulifuiika opo tutualeko okulinga omaungendi etu. Etyi ankho nkhele nehenenyingile moufualali, nalandele omutemba wokanowa. Tyina ndyikahi moufualali, natualako okupangiya omutemba oo aukala okanowa kekahi nawa. Atutokola okukalamo nokutuala okunoñgonoka nawa ohi ino. Opomuvo opo, etyi natunda movilinga vioufualali, mahi etyi nehenemane okupangiya okanowa, navahiwa no Nombangi mba Jeova andyihimbika okulilongesa Ombimbiliya.

OÑGENI OMBIMBILIYA YAPILULULA OMUENYO WANGE:

Tete, ankho hityiete nawa okuti nesukisa okupilulula unene omuenyo wange. Andyihonekesa otyinepo tyange nomukai ankho ndyikala nae, iya tupu nayekapo okupuena. (Efésios 5:5) Ndyisoka okuti ononkhono tualinga mokulinga omaungendi mouye, okutala nawa omahuviso ovipuka Huku atunga, mbetuetela ouwa omunene.

Mahi, tyotyili ame ankho nesukisa okulinga omapiluluko omanene movituwa viange. Okukala unene nomalityindailo nokulitumina, ankho otyo tyanyona onkhalelo yomuenyo wange novilinga viange. Ame ankho nahanda vala okulinga etyi nahanda.

Nthiki imwe, natanga Elongomona lia Jesus lio Komphunda. (Mateus, okapitulu 5-7) Potete ankho nkhele tyemphuiya okunoñgonoka ehambu Jesus apopia. Mongeleka, wapopia okuti vena ehambu ovovana vena ondyala nohunga. (Mateus 5:6) Andyilipulu okuti oñgeni omunthu una etyi akamba akala nehambu. Etyi natualako okulilongesa, andyiimbuka okuti ovanthu atuho tuna omasuka-suka okukala noupanga na Huku, mahi tuesukisa okuliola omutima okunoñgonoka omasuka oo tainkholo tuhenesukalale novikuavo. Ongotyo Jesus apopia etyi ati: “Vena ehambu ovovana vaimbuka okuti vesukisa okulongeswa na Huku.”​—Mateus 5:3.

Etyi tuahimbika okulilongesa Ombimbiliya ko Alemanha, naame nomukai wange atuilukila ko França, iya konyima, atuii noko Italia. Kese oku tuaile tuavahile Onombangi mba Jeova. Ame nakalele tyahuva unene noluembia newaneko vena kumwe navakuavo. Andyimono okuti Onombangi ombunga ike mouye auho. (João 13:34, 35) Mokueenda kuomuvo atumbatisalwa atuho nomukai wange, atukala Onombangi mba Jeova.

Konyima etyi tuambatisalwa, andyitualako okulinga omapiluluko momuenyo wange. Ame na Laurie tuatokolele okuenda nokanowa okutunda ko Afrika atutauluka Elunga Atlantico okuenda noko Estados Unidos. Tyina ndyikahi kombanda yelunga​—onthue vala vevali ankho tukahi kokanowa okatutu, andyitale omaande elunga ekelitula-tuala​—etyi natala omaande oo andyiimbuka okuti onthue katusilivila okulieleka Nomutungi omukulami. Mokonda ankho ndyina omuvo omunyingi melunga tyihena etyi ndyilinga, andyilipake mokutanga Ombimbiliya. Ame ankho haunene nahuva nonkhalelo yomuenyo wa Jesus etyi ekahi pano pohi. Jesus ankho utupu onkhali iya ankho una epondolo liokulinga ovipuka ame nehevili okusoka, mahi nalumwe elipakele kounene. Kalingile natyike palae muene, mahi ankho ulinga etyi tyinkhimaneka Tate yae keulu.

Etyi natualako okusokolola kongeleka ya Jesus, ame netyimona okuti nesukisa okupaka Ouhamba wa Huku tete momuenyo wange, tyipona okulinga ovipuka ankho nahanda. (Mateus 6:33) Ame na Laurie etyi tuehika ko Estados Unidos, atutokola okukala oko, tutualeko nefendelo lietu.

OUWA PATYI NAPOLAKO:

Puetyi ankho ndyilitumina omatokolo ndyilinga, hieyumbu onthumbi. Mahi pahe, navasa ondyivi-ndyivi younongo pala okuhongolela omuenyo wange. (Isaías 48:17, 18) Ame tupu pahe ndyina omuenyo una esilivilo ankho nehena​—okufenda Huku nokukuatesako vakuetu okulilongesa konthele yae.

Okuendela monondonga Mbombimbiliya, tyapameka unene otyinepo tyetu. Tupu tuayambwa mokuakala nomona umwe omuwa ukahi nokukula otyo anoñgonoka nokuhumba Jeova.

Haapeho ankho onkhalelo yomuenyo wetu yapepuka. Mahi nombatelo ya Jeova tuatokola okuhemuyekepo ine okuyumba onthumbi mwe.​—Provérbios 3:5, 6.