Ankho Ndyihole Vali o Beise bol Tyipona Ovipuka Aviho!

OMUENYO WANGE KOHALE

Ame nekulila mo Porto Limão, epunda-umbo limwe likala koutundilo wo Costa Rica. Ovo tate ankho vena ovana etyinana, pokulikuai kuetu ame ndyiwapandu-vali. Tate wanyima etyi ankho ndyina omanima etyinana. Konyima yotyo me etutekula vala aike.

Beisebol ankho ilinga onthele yomuenyo wange. Tunde etyi ndyimututu ankho ndyiihole. Puetyi ndyihungi kokutuukisa omanima 20, andyii motyikundyi tyimwe tyovana tyokuyumba o Beisebol. Puetyi ankho ndyina omanima 20 ankho ndyiyumba ombola motyikundyi otyo. Iya una ankho utulongesa okuyumba, ankhongo opo ndyikayumbe motyikundyi tyavilapo vali tyokuyumba o Beisebol ko Nicaragua. Mahi, mokonda ankho me uvela iya ankho ndyina okumukuatesako, ankho hihande okukakala ko Nicaragua. Ame anehetavela. Konyima, omukuavo ankho utulongesa okuyumba, ankhongo opo ndyikayumbe motyikundyi otyinene vali tyo Costa Rica. Pahe, andyitavela. Ngamo ndyiyumba o Beisebol okuhimbikila menima 1949 alo menima 1952, andyikayumba ko Cuba no ko Mexico no ko Nicaragua. Ame, ame ankho wokukelela ombola, alo umwe ankho ndyipondola okuyumba movikando 17 anahapengesa. Ankho ndyityiohole unene tyina ndyiyumba otyo ovanthu vatumbula enyina liange!

Ame, ankho natyinda omuenyo umwe wasila. Namphila ankho ndyinale omuhikuena, mahi ankho ndyikataindya vali ovahikuena ovakuavo. Tupu ankho ndyinwa unene. Nthiki imwe andyinu unene-nene etyi kuatya anahahinangela oñgeni nehika meumbo! Tupu ankho ndyityihole tyokulilolela.

Puetyi ankho ndyityinda omuenyo oo wasila, me yange akala Ombangi ya Jeova. Me ahande okundongesa Ombimbiliya, mahi ehetyivili, mokonda ankho ndyityihole tyokuyumba o Beisebol. Inkha ankho ndyikahi nokuyumba o Beisebol po ola yokulia, ankho hiliwa nondyala! Ankho ndyisoka vala kokuyumba. Ankho ndyihole vali o beisebol tyipona ovipuka aviho!

Mahi, etyi natuukisa omanima 29, andyitunguka puetyi ankho ndyikahi nokuyumba. Etyi nakala nawa, anahayumbu vali motyikundyi tyina ankho ndyiyumbila. Mahi no ngotyo, andyikala omuonganeki wotyikundyi tyovana ovatutu tyokuyumba o Beisebol.

OÑGENI OMBIMBILIYA YAPILULULA OMUENYO WANGE

Menima 1957, andyitavela omukanda wokukonga ovanthu vende kotyonge tyo Nombangi mba Jeova. Ankho matyilingilwa motyipembe omu ankho ndyihole okuyumbila o Beisebol. Namphila ankho ndyipumphi vala iya ankho hipondola okukuatesako, mahi natala okuti Onombangi vena ovituwa vikahi nawa iya vena onthilo, tyelikalela natyina ankho ndyimona tyina ankho tukayumbila-mo ombola mokonda ankho muviela vala unene. Etyi namona motyionge omo tyandyavela ondundo opo ndyililongese Ombimbiliya Nonombangi mba Jeova iya nokuenda komaliongiyo.

Andyihuvu unene netyi nelilongesa Mombimbiliya. Mongeleka, Jesus wapopile konthele yononthiki mbahulilila okuti, ovalongwa vae mavakaivisa onondaka onongwa Mbouhamba wa Huku mouye auho. (Mateus 24:14) Tupu nelilongesa okuti Ovakristau votyotyili kamavakaovola ovilinga vivekalesa ovahona. Jesus wati: “Muetyipewa otyali, nonwe tyavei otyali.”—Mateus 10:8.

Nelilongesa Ombimbiliya, andyitale nawa etyi ipopia iya konyima andyikala Ombangi ya Jeova. Andyilingi ononkhono opo ndyilinge onthele yovo kuyandyanesa onondaka onongwa Mbouhamba wa Huku mouye auho. Netyimona okuti vekahi nokufuisapo otyitumino tya Jesus tyati Ovakristau vena okukala notyali. Ngotyo, etyi natanga Marcos 10:21 andyiimbuka etyi Jesus akonga okuti, “Endyu ukale omulanduli wange,” andyinoñgonoka okuti ndyina okukala Ombangi.

Namphila pakala omuvo omunyingi, konyima andyitokola umwe okulingila Huku. Mongeleka, mokueenda koumanima omanyingi ankho ndyina ombalulo yange yokulinga okalolela inkhalesa “nelao” kese simanu. Mahi, nelilongesa nawa etyi Ombimbiliya ipopia okuti Huku uyele ova fendeli va “huku Yelao Ewa,” novanthu vokuna elungavi. (Isaías 65:11; Colossenses 3:5) Ngotyo andyitokola okuyekapo tyokulinga okalolela. O tyalumingu tyalandulako etyi nayekapo okulilolela, ombalulo ina ankho inkhalesa “nelao” ngayo itumbulua-po! Ovanthu avahimbika okundeva mokonda ankho hihande vali okulilolela, iya avamphe ondundo opo ndyikondoke vali kokuyumba, mahi ame anehatavela. Okutuka opo anahalinga-linga vali okalolela.

Monthiki nambatisalwa motyonge tyo Nombangi mba Jeova, andyikala vali notyitateka otyikuavo tyalola ‘omunthu omupe nakala.’ (Efésios 4:24) Ankho okongulohi puetyi ankho ndyili nokukondoka kondyuo yokuhikila ovaenda oku nehikila. Andyivasi omuhikuena una wali omuhikuena wange uli pombundi yomu ankho ndyilala. Ngwe ati: “Samy omako. Endyu tunyanepo katutu!” Liwa-liwa andyimukumbulula okuti “Au!” Andyimupopila okuti, pahe ndyikahi nokuendela movitumino vio Mbimbiliya. (1 Coríntios 6:18) Ngwe apopi okuti, “wati-wii?” Ahimbika okupopia okuti, Ombimbiliya kaipopi otyili tyina ipopia konthele yomaundalelapo, iya otyo ankhengelela opo tuliwane. Mahi, ame andyinyingila vala mondyuo nehikila, andyiikipo. Tunde apa nakala Ombangi menima 1958, ndyikakatela momapiluluko nalinga momuenyo wange.

OUWA PATYI NAPOLA-KO

Ame ndyilitehelela ngoti ndyikahi nokuhoneka omukanda upopia ouwa napola kokuhongolelwa Nombimbiliya! Vimwe povipuka ovio, omapanga otyotyili ndyina, nomuenyo umwe ukahi nawa, nehambu liotyotyili.

Na hono nkhele ndyityihole tyokuyumba o Beisebol, mahi hiihole vali ngo kohale. O Beisebol yankhalesa nomunkhima nomalumono, mahi ovipuka ovio kavitualako. Mahi, oupanga wange na Huku novakuatate vange ouye auho, mautualako aloo-loo. Ombimbiliya yati: “Ouye ukahi nokulamba, kumue nepeleyo liao, mahi una ulinga etyi Huku ahanda makalako apeho.” (1 João 2:17) Pahe ame ndyihole vali Jeova Huku novanthu vae tyipona ovipuka viatyo aviho!