Oñgeni Ovohe Vapondola Okukala Omapanga Ovana Vavo?

“TATE, omokonda yatyi ove wii ovipuka ovinyingi?” Okuti nthiki imwe omona wove wekupulile-ale ngootyo? Tyipondola hamwe wahambukilwe unene okukala he yovana. Mahi pahe ine ukati-ko ñgaa omona wove wetavela ovipuka wemupopila ya otyo atyimwetela ouwa, omutima wove ukala nawa uhambukwa.a — Provérbios 23:15, 24.

Mahi pahe okuti omona wove na hono utwalako okuhuva novipuka omupopila? Ine pahe kahuvu vali? Oityi ove una okulinga opo ukale epanga liomona wove tyina ena nokukula? Nkhele matutale ovitateka ovohe vakala navio.

Ovitateka Vitatu Viakaka

1. OKUHENA OMUVO: Movilongo ovinyingi ovohe vena okuundapa unene opo vatekule ovana vavo. Pamwe mokonda yovilinga vaundapa, vakala nthiki auho kovilinga. Ya movilongo vimwe ovohe kavakala-le omuvo omunyingi novana vavo. Ko França ovanthu vamwe vakala vala onominutu mbehehiki po 12 novana vavo.

SOKA KWEETYI: Omuvo ulifwepi ukala kumwe novana vohe? Ine tyitavela mosimana ei matukwate, honeka omuvo uhole okukala novana vove. Etyi monoñgonoka tyipondola okukuhuvisa.

2. OKWAHALONGESILWE NAWA: Ovanthu vamwe pweetyi ankho ovatutu kavakalele omapanga ovohe. Jean-Marie ukala ko França, wati: “Ame ankho hitomphola-le unene na tate yange.” Oñgeni otyo tyemukalesa? Ngwe wati: “Otyo tyakalesile novitateka ankho nahasoko-ale. Pahe konyima neetyi nakala novana vange, ankho hityivili okutomphola navo. Mahi kuna ovanthu vamwe vei umwe nawa ovotate yavo mahi nii vala kavelivili. Philippe una omanima 43, wati: “Tate ankho ketyivili okupopia okuti unthyole. Pahe naame ndyilinga ononkhono onene opo ndyilekese kovana vange okuti ndyivehole.”

SOKA KWEETYI: Ove usoka okuti otyipuka tate yove ankho okulinga, noove otyo una okulinga ovana? Nthiki imwe wahatile-ale ñgana ukahi nokulinga otyipuka tyimwe ovana vove, ankho tate yove ekulinga? Otyipuka patyi?

3. APA TWEKULILA: Movilongo vimwe otyilinga tyovohe hakulongesa-ko ovana. Luca wekulila kotyilongo tyoko Europa, wapopia okuti: “Ovanthu vapa ame nekulila vasoka okuti una yokulongesa ovana omukai.” Ya ovanthu vamwe, vasoka okuti ovohe yovana tyina vati pokuviyula ovana vavo vena okutyilinga nonya. George wekulila ko Africa, wati: Apa ame nekulila ovohe yovana kapondola okunyana novana vavo mokonda vasoka okuti ovana mavevetombo. Pahe naame etyi nakala novana atyimphwilisa unene okukala novana vange.”

SOKA KWEETYI: Apa ukala ovanthu vati otyilinga tyovohe otyipi? Okuti ovalume vasoka okuti ovana vena vala okulongeswa na mee yavo? Valinga umwe ovipuka vilekesa okuti vehole ovana vavo, ine vasoka okuti okulinga ngootyo ovana mavevetombo?

Ine una ovana, ya pahe una tyimwe tyikahi nokukupona, tala ovipuka vimwe upondola okulinga.

Himbika Okulongesa Ovana Vove Tyina Nkhele Ovatutu

Omona tyina nkhele omututu uhetekela vala ovotate yae. Opo, opo wesukisa okukwatesako omona wove. Motyilingi ñgeni? Ya oityi una okulinga ukale nomuvo wokupopia novana vove?

Ine tyitavela tyina ulinga ovilinga mwiihana amuundapa nae. Ine pena otyilinga tyimwe ukahi nokulinga meumbo mwiita ekukwateseko. Okulinga ngootyo matyimukwatesako ahambukwa unene okuundapa na tate yae! Pamwe mamukala umwe ehimbwe nokuundapa mahi mamukala noupanga ukahi nawa, olongesa umwe omona wove okuundapa. Kohale, Ombimbiliya yaavela ondundo ovohe okuti tyina avaundapa kumwe kovana vavo, otyo vevelongesa. (Deuteronômio 6:6-9) Na hono otyo-ñgo Huku aita kovohe.

Tyehekundapa vala kumwe novana vove, otyiwa okwovola omuwo wokukala kumwe navo otyo munyana. Okunyana novana otyipuka tyimwe tyikahi nawa. Ovanongo vapopia okuti tyina ovana vanyana novohe, otyo tyikwatesako ovana okukala ovanongo.

Okunyana novana otyipuka tyimwe tyesukisa unene. Omunongo umwe utiwa Michel Fize wapopia okuti: “Omona utumphola vali novohe tyina anyana.” Tyina vekahi nokunyana, hee upondola okulekesa okuti ohole ovana vae movipuka apopia neevi alinga. Okulinga ngootyo, matyikwatesako ovana vove okukala ovanthu vovanthu. André una omona ukala ko Alemanha, wati: “Etyi omona wange omututu ankho tunyana unene nae, ame ankho ndyimuhumba-kana, pahe nae uhole unene ovanthu.”

Omuvo omukwavo ovohe valekesa okuti vehole ovana vavo, omo muvo wokulangala-po. Mutangela-po ehipululo limwe, omutehelela umwe nawa tyina apopia ovipuka alinga monthiki oyo, novipuka vimutokotesa omutima. Ine otyo ulinga otyo, matyipepuka vali komona wove okupopia noove tyina ena nokukula.

Tala Ovipuka Muna Vielifwa

Ovakwendye vamwe kavesukile-ale nononkhono ovohe valinga opo vapopie navo. Ine utala okuti omona wove ukukumbulula vala omapita tyina una tyimwe umupula, wahasoke okuti kahande okupopia noove. Tyipondola hamwe mapopi noove ine noove woovola omphitilo ikahi nawa opo upopie nae.

Jacques una ovana ukala ko França, ankho usoka okuti okupopia nomona wae utiwa found it Jérôme, tyipwilisa unene. Mahi ngwe ahakuluminya omona wae opo apopie nae, etyi alinga, okuhipulula nomona wae tyina vayumba ombola. Jacques wati: “Tyina twamayumbo nomona wange, tupumphama opo tupululukwe-po. Katyisukisale okukala omuvo omunyingi, ndyikati vala ñgaa omona wange nae ukahi nokupopia. Okukala vala kumwe nomona wange otyo tyetukwatesako okukala omapanga.”

Ya pahe ine omona wove tyokuyumba ombola ketyihande? André uhinangela omuvo ankho vatala ononthungululu nomona wae. André wati; Ankho tumpumphama pondye tyina kwanthikovela otyo tutala ononthungululu nomona wange, tyina tutehela ñgaa twandwa katutu atunu okasaa. Otyo tupopia olie watunga ononthungululu novipuka viayemba kwoonthwe mwene.” — Isaías 40:25, 26.

Tyipondola hamwe omona ovove ovipuka ehole ove havio-ko uhole. Oityi upondola okulinga? Opo hahe ovipuka uhole uvipake ponthele. (Ova Filipu 2:4) Ian ukala ko África do Sul wapopia okuti: “Ame ankho ndyihole unene okusana ombola, mahi omona wange Vaughan ketyihande. Ina ankho utyihole vali unene tyokunyana nonoaviyau, nonokomputatole. Pahe naame andyihimbika okunyana novipuka ovio omona wange ehole, andyovola omphangu imwe ankho tupondola okunyanena nomona wange, mokonda ankho yokukala omuvo omunyingi nomona wange pahe ankho omona nae katyimupwiya-le okupopia naame.”

Kwatesako Omona Wove Eliyumbe Onthumbi

“Tala tate, tala!” Okuti omona wove wekupopile-ale onondaka ngoombo? Ya ine pahe wekulale okuti no pehepano uya-ñgo kwove tyina pena tyimwe ahanda okulinga? Tyipondola keya-le. Mahi opo omona wove ekule nonondunge una okukwiita umukwateseko.

Tala tyimwe Siovaa alingile opo akwateseko omona wae. Etyi Sesusi ehungi kokuhimbika ovilinga viae pano, Siovaa wapopile tyimwe tyayemba komona wae okuti: “Ou Omona wange ndyihole, una ame napanda.” (Mateusi 3:17; 5:48) Otyili ove una okulonga omona wove. (Ova Efesu 6:4) Mahi okuti uhole okwovola omuwo wokupandula ovipuka omona wove alinga?

Ovanthu vamwe tyivepwiya unene okupopila ovana vavo okuti vevehole. Otyipuka otyo tyipondola tyatuka umwe konkhalelo vatekulwa. Ine noove otyo ukahi opo wesukisa okulinga ononkhono opo okwateseko ovana vove okuliyumba onthumbi. Oityi una okulinga? Luca twapopia-le konyima oku, ankho utyihole tyokuundapa nomona wae una omanima 15 utiwa Manuel movilinga viopeumbo. Luca wati: “Pamwe ankho ndyipopila umwe Manuel, ahimbike okulinga otyilinga tyimwe, andyimupopila okuti ine pena tyimwe wesukisa okukwateswako popia ndyikukwateseko. Pamwe ankho mwene utyivila umwe okulinga otyilinga nemutuma aike. Otyo tyimukwatesako okuliyumba onthumbi. Tyina amalingi nawa otyilinga nemutuma, ndyimupandula. Natyina otyilinga nemutuma ehetyilingile nawa, ndyimupandula ononkhono alinga.”

Tupu mukwatesako omona wove okuliyumba onthumbi tyina omu kwatesako okupanga evi apondola okulinga. Mahi ine kalingi liwa evi apanga, oityi una okulinga? Oityi una okulinga ine ovipuka omona wove apanga ove havioko uhanda alinge? Opo wesukisa umwe okutala nawa etyi molingi. Jacques twapopia-le konyima oku, wati: “Ame ndyikwatese-ko omona wange okupanga ovipuka evila umwe okulinga. Mahi tupu ndyitala umwe nawa opo nehemulingile-ko vala ovipuka. Ame ndyimuyeka alinge aike ovipuka anehemukuluminya.” Ine ove utehelela etyi omona wove apopia, omupandula ovipuka alinga, noku mukwatesako movipuka ehevili okulinga, ngootyo una umwe nokumukwatesako okutyivila okulinga evi apanga.

Pamwe matyikupwiya umwe okupopia novana vove. Mahi katutu-katutu omona wove mafwene kwove. Olie umwe wahahande okukala popepi nomunthu umukwatesako?

[Okatoi]