Vakuendye Novahikuena—yawisei Ehando Lienyi Liokuumbila Jeova
“Hinangela Omupakeko wove Omunene meti liove lioukuendye” —ECLESIASTES 12:1.
1. Elondolo patyi liapelwe ovana vo Isilayeli?
MOMANIMA 3.500 okulamba, Moisesi omuuli wa Jeova watumine ovanakwa no vakulu mo Isilayeli okuti: “Ongiya ovanthu, ovalume novakai, novana . . . , opo vatehelele avalongoka. Mokonda vena okukala nonthilo na Jeova Huku yenyi, opo vaendele monondaka ambuho mbovitumino evi.” (Deuteronômio 31:12) Tala okuti vaavelelwe onondonga opo veliongiye pala efendelo: ovalume, novakai, novana. Ovana ovo ovovana vapopiliwe okuti vatehelele, avelilongesa nokulandula ehongolelo lia Jeova.
2. Oñgeni Jeova alekesile esuko liae kovakuendye mewaneno lio Vakristau kohale?
2 Motyita tyotete, Jeova watuaileko okupopia ehando liae konthele yefendelo liovakuendye. Mongeleka, wavatela apostolu Paulu akutikinye momikanda atuma komawaneno onondonga konthele yovakuendye.a (Tanga Efésios 6:1; Colossenses 3:20.) Ovakristau ovakuendye vatualako okuundapesa onondonga ombo, vapandwa na Tate yavo yoluembia wo keulu nokutambula ononkhano onongwa.
3. Oñgeni ovakuendye novahikuena hono valekesa esuko liavo liokuumbila Jeova?
3 Okuti ovakuendye hono momawaneno navo vakongwa opo vafende Jeova? Yoo! Ngotyo, ovanthu va Huku vahambukwa unene tyina vatala ovakuendye ovanyingi mouye auho vaumbila Huku okutavela nomutima auho eviyulo lia Paulu liati: “Tutalei nawa oñgeni matulipameka pokati, nokukala nohole novilinga oviwa. Tuahayekeipo okuenda komaliongiyo, ngetyi vamwe vetyiliya okulinga. Anthi, tuliavelei ondundo kese umue na mukuavo, haunene tyina mutala okuti onthiki ikahi popepi.” (Hebreus 10:24, 25) Tupu, ovana ovanyingi vekahi nokuundapa novohe movilinga viokuivisa Ouhamba wa Huku. (Mateus 24:14) Iya mokulekesa ohole yotyili ku Jeova, ovakuendye ovanyingi kese nima veliava ku Jeova avambatisalwa nokukala nononkhano onongwa mbutundilila kokukala ovalongwa va Kristu.—Mateus 16:24; Marcos 10:29, 30.
Tavela Okukongwa Hono
4. Onalupi ovakuendye novahikuena vapondola okutavela okukongwa na Huku pala okumuumbila?
4 Eclesiastes 12:1 yati: “Hinangela Omupakeko wove Omunene tyina nkhele umukuendye.” Omanima eñgapi ovakuendye vesukisa opo vetavele okukongwa na Jeova pala okufenda nokumuumbila? Ovihonekwa kavipopi omanima. Anthi, uhelikondole okusoka okuti nkhele umututu pala okutehelela Jeova nokumuumbila. Tyilinge umukulu ine umona, ukahi nokuavelwa ondundo opo utavele okukongwa.
5. Oñgeni ovohe vapondola okukuatesako ovana vavo okukula mopaspilitu?
5 Hamwe ukahi nokukuateswako mopaspilitu no voho ine umwe puvo. Inkha ongotyo ukahi nga Timoteo wo kohale. Etyi nkhele omututu, oe walongesilue ovihonekwa vikola na me yae, Eunice, na ina kulu Loide. (2 Timóteo 3:14, 15) Tupu, no votate yove mavekukuatesako mokulilongesa nove Ombimbiliya, nokulikuambela, nokuenda komaliongiyo ewaneno, noko vionge viovanthu va Huku, nokuenda movilinga viokuivisa. Tyotyili, okukulongesa Ondaka ya Huku otyo otyilinga tyakolela vali ovohe vapewa muene na Jeova. Ove ukahi nokupanda ohole nesuko vena noove?—Provérbios 23:22.
6. (a) Ngetyi tyipopia o Salmo 110:3, onkhalelo patyi yokufenda ihambukiswa Jeova? (b) Oityi matulilongesa?
6 Ngotyo, tyina onue vakuendye mukahi nokukula, Jeova uhanda “mutale onue muene okuti ehando lia Huku eewa liafuapo nokuaviuka,” ngetyi tyalingile Timoteo. (Romanos 12:2) Inkha mulinga ngotyo, mamulingi ovilinga via Huku mewaneno hamokonda vala ovoho otyo vahanda, mahi omokonda ove wahanda okulinga ehando lia Huku. Inkha muumbila Jeova nehando liokomutima, otyo matyihambukiswa Jeova. (Salmo 110:3) Oñgeni mamulekesa okuti muhanda okuyawisa ehando lienyi liokuumbila Jeova nokulandula ehongolelo liae? Matutale ononkhalelo ononthatu mbakolela oñgeni tuna okutyilinga. Matupopi konthele yokulilongesa, nelikuambelo, novituwa. Tutalei tyike-tyike.
Noñgonoka Jeova Ngatyina Omunthu
7. Oñgeni Jesus aava ongeleka ongwa konthele yokulilongesa Ovihonekwa, iya oityi tyemukuatesileko?
7 Onkhalelo yotete ove ulekesa okuti uhanda okuyawisa ehando liove liokuumbila Jeova, okutanga Ombimbiliya ononthiki ambuho. Ove upondola okufuisapo etyi wesukisa mopaspilitu nokukala nenoñgonoko liakolela Liombimbiliya mokutanga apeho ondaka ya Huku. (Mateus 5:3) Jesus waavela ongeleka. Nthiki imwe etyi oe ankho ena omanima 12, ovohe vemuvasa mondyuo ya Huku, “ankho wapumphama pokati kovalongesi, ukahi nokuvetehelela nokuvelinga omapulo.” (Lucas 2:44-46) Etyi nkhele omona, Jesus ankho una ehando enene liokunoñgonoka Ovihonekwa. Oityi tyemukuatesileko okulinga ngotyo? Tyotyili, walongesilue nawa na Me yae maliya, na Jose he koutekuli. Ovo ankho ovaumbili va Huku valongesile Jesus konthele ya Huku tunde pouna.—Mateus 1:18-20; Lucas 2:41, 51.
8. (a) Onalupi ovohe vena okuhimbika okulongesa ovana vavo okukala nohole Nondaka ya Jeova? (b) Popia ongeleka imwe ilekesa okuti okulongesa ovana tunde poututu tyakolela.
8 Tupu, ovohe vokufenda Huku, vaimbuka okuti tyakolela okupaka momitima viovana vavo ehando liokulilongesa Ombimbiliya tunde poututu. (Deuteronômio 6:6-9) Otyo tyalinga Rubi, omphange umwe Omukristau etyi akutula Jose omona wae wotyiveli. Kese nthiki oe utangela omona wae Omukanda Womahipululo Ombimbiliya. Etyi ekula, oe wemukuatesako okupaka momutwe onotestu ononyingi. Okuti otyo tyakuatesako Jose? Etyi ahimbika okupopia, oe ankho upopia omahipululo omanyingi Ombimbiliya monondaka mbae muene. Iya etyi atuukisa omanima etano, walinga onthele yae yotete Mosikola Yovilinga Via Huku.
9. Omokonda yatyi tyakolela okutanga Ombimbiliya nokusokolola kuetyi watanga?
9 Opo muyawise enoñgonoko lienyi konthele ya Huku, vakuendye muesukisa okutualako okutanga Ombimbiliya kese nthiki alo mukala ovakulu. (Salmo 71:17) Omokonda yatyi okutanga Ombimbiliya matyikukuatesako okuenda nokomutue? Tala etyi Jesus apopile etyi elikuambela ku Tate: “Omuenyo wahapu oyou, okunoñgonoka ove awike Huku yotyotyili. (João 17:3) Tyotyili, tyina uyawisa enoñgonoko liove konthele ya Jeova, mo munoñgonoka vali nawa ngatyina omunthu nokuyawisa ohole yove kwe. (Hebreus 11:27) Ngotyo, apeho tyina utanga Ombimbiliya, linga ononkhono pala okulilongesa vali unene konthele ya Jeova. Lipula: ‘Ehipululo eli lindongesa tyi konthele ya Jeova? Oñgeni onthele ei Yombimbiliya ilekesa ohole ya Jeova nesuko liae kuame?’ Okutaindya omuwo wokusokolola komapulo oo tyikukuatesako okunoñgonoka oñgeni Jeova asoka no ñgeni elitehelela netyi ahanda kuove. (Tanga Provérbios 2:1-5.) Ngo mukuendye Timoteo, ove upondola “okukuatesuako okutavela” etyi ulilongesa Movihonekwa, atyikuavela ondundo yokuumbila nokufenda nehando lio komutima.—2 Timóteo 3:14.
Oñgeni Okulikuambela Tyiyawisa Ohole Yove ku Jeova
10, 11. Oñgeni elikuambelo likukuatesako okupameka ehando liove liokuumbila Huku?
10 Onkhalelo yavali molekesa okuti ukahi nokulinga ononkhono mbokuumbila Jeova omokulinga omalikuambelo oukuatyili. Mu Salmo 65:2, tutangamo okuti: “Ove Muteheleli womalikuambelo, ovanthu aveho mavehiki kuove.” Momuwo etyi ova Isilayeli vekahi momphango ya Huku, onongendi ankho veya mondyuo ya Jeova okulikuambela kwe. (1 Reis 8:41, 42) Huku utupu okapungulula. Vana vetavela ovitumino viae vakala nonthumbi yokuti oe mevetehelela. (Provérbios 15:8) Tyotyili, “ovanthu vomalongo aeho,” muakutikinya ovakuendye.
11 Onwe mutyii okuti pala okulinga oupanga omuwa tyesukisa etompho ewa. Tupu, hamwe uhanda okumupopila omalusoke ove, nomahando ove, no ñgeni ulitehelela ngepanga liotyotyili. Tupu, mokulinga omalikuambelo atunda komutima, ove utomphola Nomupakeko wove Omunene. (Filipenses 4:6, 7) Popila Jeova omahando omutima wove ngatyina upopia na tate yove ine epanga liove uhole unene. Tyotyili, onkhalelo ulikuambela no ñgeni ulitehelela konthele ya Jeova vielikuata. Motale okuti putyina oupanga wove na Jeova upama, molingi omalikuambelo akolela vali.
12. (a) Omokonda yatyi omalikuambelo okuakolela akutikinya vali tyipona onondaka vala? (b) Oityi matyikukuatesako okunoñgonoka okuti Jeova ukahi popepi yove?
12 Noñgonoka okuti omalikuambelo otyotyili akutikinya vali tyipona onondaka vala. Otyo tyakutikinya okupopia etyi tyikahi momutima. Momalikuambelo ove, lekesa ohole, nonthilo onene nonthumbi yove mu Jeova. Putyina utala oñgeni Jeova akumbulula omalikuambelo ove, monoñgonoka nawa okuti “Jeova ukahi popepi novanthu aveho vemuihana.” (Salmo 145:18) Tyotyili Jeova mafuene kuove, ekukuatesako okuliyakulila Keliapu nokulinga omaholovono aviuka momuenyo.—Tanga Tiago 4:7, 8.
13. (a) Oñgeni oupanga na Jeova wakuatesako omphange umwe? (b) Oñgeni oupanga na Huku ukukuatesako okulinga omatokolo omawa?
13 Tala oñgeni Cherie akala noupanga wapama na Jeova. Mosikola yapola pokati, wayambelue mokonda ankho omunongo mosikola nomovinyano. Etyi amana osikola oyo, apewa omukanda ulekesa okuti wafuapo pala okukalongeswa mosikola yavilapo. “Cherie wati: Okuanya ondyambi oyo ankho katyapepukile, mokonda ovalongesi na vana ndyilongeswa navo ankho vankhuluminya opo ndyitavele.” Cherie waimbukile okuti okulipaka mosikola oyo onene matyisukisa omuwo omunyingi wokulilongesa nokulipongiya pala okulilola—akala vala nomuvo uhehi pala okuumbila Jeova. Oityi Cherie alinga? Oe wati: “Etyi nelikuambela ku Jeova, naanya ondyambi oyo andyihimbika okuundapa movilinga vioukokoli-ndyila.” Pahe utualako nokuundapa movilinga ovio momanima etano. Oe wati: “Ame helivelele na katutu. Ndyityii okuti nalinga etokolo Jeova apanda iya otyo tyimpha ehambu. Tyotyili, inkha upaka Ouhamba wa Huku tete momuenyo wove, ovipuka aviho ovikuavo moviyawiswa.”—Mateus 6:33.
Ovituwa Oviwa Vilekesa Okuti “Wasukuka Momutima”
14. Omokonda yatyi ovituwa oviwa viakolela komaiho a Jeova?
14 Onkhalelo yatatu yokulekesa okuti uumbila Jeova nomutima auho italelwa kovituwa viove. Jeova uyamba ovakuendye vatualako okukala novituwa viasukuka. (Tanga Salmo 24:3-5.) Omukuendye Samuel waanyene okuhetekela ovituwa ovivi viovana Vomunene-nakwa Eli. Ovituwa oviwa via Samuele ankho viiwe nawa. Ombimbiliya yati: “Omukuendye Samuel watualako okukula nokuholwe na Jeova novanthu.”—1 Samuel 2:25, 26.
15. Omahunga patyi una opo utualeko novituwa oviwa?
15 Tukahi mouye ovanthu velihole ovo muene, vokulipanda, vomalityindailo, vehetavela kovohe, vahapandula, ononkhembi, ovakalavi, vehena oluembia, vokuna omphata, vehole vali ovitalukiso tyipona Huku—ovio ovituwa vimwe Paulu ahoneka. (2 Timóteo 3:1-5) Ngotyo kuonue tyipondola okupuiya unene okutualako novituwa oviwa okukala pokati kovanthu vo vituwa ovivi. Anthi, kese tyikando ove ulinga etyi tyaviuka iya oanye ovituwa ovivi, ukahi nokulekesa okuti wayemba ku Jeova konthele youtumini wae wavilapo ouye auho. (Jó 2:3, 4) Ove tupu una ehambu liokunoñgonoka okuti wetavela elondolo eli lia Jeova: “Kala no nondunge mona wange, hambukiswa omutima wange, opo ndyikumbulule una undinga omukuele.” (Provérbios 27:11) Tupu okunoñgonoka okuti ove wapandua na Jeova matyipameka ehando liove liokumuumbila.
16. Oñgeni omphange umwe ahambukiswa omutima wa Jeova?
16 Omphange umwe Omukristau utiwa o Carol, puetyi omukainthu ankho ulandula ovitumino Viombimbiliya kosikola, iya ovituwa viae oviwa ankho viiwe. Oityi tyapitilepo? Carol wapenyenue na vana ankho alongeswa navo mokonda yokulandula ovitumino Viombimbiliya nokuhakala navo povipito viouye. Pamwe oe ankho ukala nomphitilo yokuhangununa omatavelo ae kuvakuavo. Omanima omanyingi konyima, Carol atambula omukanda watunda ku umwe ankho valongeswa nae, wahonekua okuti: “Ame apeho ndyikevelela ndyikuvase adyikupandula. Ovituwa viove oviwa nongeleka yove ongwa ngo muhikuena Omukristau, nomutima wakola okuhetavela okulipaka movipito viomouye, ankho viiwe nawa. Ove Umbangi ya Jeova nanoñgonoka tete.” Ovituwa oviwa via Carol viakuatesileko umwe ankho valongeswa nae iya konyima ahimbika okulilongesa Ombimbiliya. Momukanda ahonekela Carol wati pahe ndyimbangi wambatisalua momanima 40! Nga Carol, onwe vakuendye hono muavelwa ondundo opo muendele movitumino Viombimbiliya hamwe mupondola okukuatesako vana vena omitima viaviuka okunoñgonoka Jeova.
Vakuendye Hambukiswei Jeova
17, 18. (a) Oñgeni ove ulitehelela konthele yovakuendye mewaneno liove? (b) Oityi ovakuendye va Jeova vakevelela komutwe wandyila?
17 Atuho meongano lia Jeova ouye auho tuhambukwa unene okutala ovakuendye ovanyingi vena ombili mefendelo liotyotyili! Ovakuendye ovo vayawisa ehando liavo liokuumbila Jeova mokutanga Ombimbiliya kese nthiki, nokulikuambela, nokutyinda omuenyo welikuata nehando lia Huku. Ovakuendye vokuna ovituwa oviwa vahambukiswa ovohe novanthu aveho va Jeova.—Provérbios 23:24, 25.
18 Komutwe wandyila, ovakuendye vekolelo mavakakala pokati kavana mavakahupa pala okunyingila mouye omupe Huku alaa. (Revelação 7:9, 14) Ovo mavakakala nononkhano ononyingi onongwa putyina vatualako okulilongesa konthele ya Jeova, nokumuhivilika apeho.—Salmo 148:12, 13.
[Onondaka Poutoi]
a Monthele ei matupopi vala ondaka ovakuendye, mahi tupu opala ovahikuena.
Okuti Ove Upondola Okuhangununa?
• Oñgeni ovakuendye hono vapondola okukala mefendelo liotyotyili?
• Opo upole esilivilo kokutanga Ombimbiliya, omokonda yatyi okusokolola tyakolela?
• Oñgeni omalikuambelo ekukuatesako okukala noupanga omuwa na Jeova?
• Okukala novituwa oviwa Vioukristau tyeta ouwa patyi?
[Olutalatu pefo 17]
Okuti ove ukahi nokutanga Ombimbiliya kese nthiki?