Oupanga na Huku
Ngetyi tyapopiwa konthyimbi yomukanda ou, ovanthu ovanyingi vatala Ombimbiliya okuti omukanda ukola. Vaimbuka okuti okutanga Ombimbiliya iya nokuendela muetyi ipopia tyivekuatesako okufuena vali ku Huku iya avanoñgonoka esilivilo liomuenyo.
Ombimbiliya yundapesa ondaka “ononkhono mba Huku” opo ipopie onkhalelo imwe yomuenyo. (Sunda 18, 19) Ovanthu vahahande okuhongolelwa na Huku, vayumba onthumbi momalusoke avo, mahi ovanthu vahanda okuhongolelwa na Huku vapanda onondonga mbae. — Ova Efesu 5:1.
EKEVELELO
ONONDONGA MBO MBIMBILIYA: “Inkha momuvo wononkhumbi usoya, ononkhono mbove mambutepuluka.” — Provérbios 24:10, okatoi.
OTYO TYIHANGUNUNA-TYI: Okusoya tyitepulula ononkhano mbetu mbutukuatesako okulambela movitateka viomuenyo. Mahi, ekevelelo litukuatesako okukola omutima opo tutyivile okutualako. Tyitupameka unene okunoñgonoka okuti ovitateka vietu vipondola okukala omuvo uhehi, iya alo umwe vipondola okutuetela ouwa.
OITYI OVE UNA OKULINGA: Tala komutwe wandyila neyumba-nthumbi. Tyihekusukalala vala netyi matyikamoneka ine okukevelela vala ovipuka vikahi nawa, linga tyimwe opo uvase etyi wapanga. Tyotyili pamwe ovitateka “viuhulukila vala.” (Eclesiastes 9:11) Mahi, ovikando vimwe vipondola okupiluluka monkhalelo ankho tuhakevelela. Mongeleka, mokuundapesa onthengele-popia konthele yomulimi, Ombimbiliya yati: “Kuna ombuto yove komuhuka, okuoko kuove kuhapululukwe alo kokangulohi, mokonda kutyii opi maikayela, tyikale apa ine opopo, ine ambuho mambukaavela nawa.” — Eclesiastes 11:6.
OMAKUMBULULO OMAPULO AKOLELA VALI MOMUENYO
ONONDONGA MBO MBIMBILIYA: “Mphevo enoñgonoko . . . Ondaka yove otyili.” — Salmo 119:144, 160.
OTYO TYIHANGUNUNA-TYI: Ombimbiliya ikumbulula omapulo aeho ovanthu velilinga. Mongeleka ikumbulula omapulo ngaa
Opi tuatuka?
Okuti omuenyo una esilivilo?
Oityi tyimoneka-po tyina umwe amankhi?
Okuti omuenyo ou oo vala?
Ombimbiliya yakuatesako ovanthu ovanyingi mouye auho okuvasa omakumbululo omapulo oo nomakuavo vali, iya nokukala nomuenyo ukahi vali nawa.
OITYI OVE UPONDOLA OKULINGA: Ovolola ove muene opo utale etyi Ombimbiliya ilongesa. Ita Kombangi ya Siovaa ekukuatesako okunoñgonoka etyi Ombimbiliya ilongesa. Nyingila mo site yetu jw.org, ine enda komaliongiyo etu, munyingilwa otyali novanthu aveho.
ONONDONGA ONONKHUAVO MBO MBIMBILIYA
Tala o vidiu yati Oityi Wesukisila Okulilongesa Ombimbiliya? Ivasiwa mo jw.org, momalaka alamba po 880
IMBUKA OKUTI APEHO WESUKISA OKUHONGOLELWA NA HUKU.
“Vena ehambu ovo vana vetyii okuti vesukisa okuhongolelwa na Huku.”— MATEUSI 5:3.
LILONGESA VALI KONTHELE YA HUKU MO MBIMBILIYA.
“Opo vaovole Huku . . . iya avemuvasi namphila Huku ehekahi kokule na kese umwe pu onthue.”— OVILINGA 17:27.
TANGA IYA OSOKOLOLA KUETYI OMBIMBILIYA ILONGESA.
“Otyipuka apanda, ovitumino vya Siovaa,a iya usokolola kovitumino viae otyitenya notyinthiki . . . iya atyiho malingi matyiende nawa.”— SALMO 1:2, 3, okatoi.
a Ngetyi Ombimbiliya ipopia, Siovaa enyina lya Huku.