Okuti Huku Una Okankhenda?

OITYI TULILONGESILA KOVIPUKA HUKU ATUNGA?

Okankhenda “okulipaka pomphangu yomunthu una otyitateka tyimwe, osoko ngatyina ove ukahi nokulambela motyitateka otyo.” Ondotolo imwe itiwa Dr Rick Hanson wati: “Okankhenda kekahi momankhipa etu.”

NKHELE SOKA: Omokonda yatyi onthue tuapelwa okankhenda, otyituwa tyimwe ovipuka ovikuavo viatungwa vihena? Ombimbiliya ihangununa okuti Huku watunga ovanthu otyifuika tyae. (Gênesis 1:26) Onthue tuatungwa otyifuika tya Huku, ngotyo tupondola okulekesa otyituwa tyae otyo otyiwa iya novikuavo vali oviwa. Moluotyo, tyina okankhenda ketulunda okusuka navakuetu atuvekuatesako, ngotyo tukahi nokulekesa nawa okankhenda ka Jeova Huku, Omutungi wovipuka aviho.—Provérbios 14:31.

OITYI OMBIMBILIYA ITULONGESA KONTHELE YOKANKHENDA KA HUKU?

Huku una okankhenda nonthue iya weete ononkhumbi tumona. Huku wamuene ononkhumbi ova Isilayeli ankho vena, etyi ankho ovapika ko Egitu, netyi vakala omanima 40 moluhandya otyo vakoleleya. Ombimbiliya yati: “Mokueenda kuononkhumbi mbavo, nae ankho tyimuihama unene.” (Isaías 63:9) Tala okuti Huku ankho kamuene vala ononkhumbi ankho vena. Nae tyimuihamene. Huku wati: “Ame ndyii nawa omaluihamo avo.” (Êxodo 3:7) Tupu wati: “Una ukuata kuonue, ukahi nokutoma meiho liange.” (Zacarias 2:8.) Tyina tumoneswa ononkhumbi, Nae tyimuihama ngetyi tyituihama.

Ombimbiliya itupopila okuti namphila tupondola okulitehelela omapita iya nokuti katuatokalele okankhenda ka Huku, mahi “Huku omunene vali tyipona omitima vietu iya wii ovipuka aviho.” (1 João 3:19, 20.) Huku utwii vali nawa tyipona onthue muene. Oe wii nawa onkhalelo tukahi, nomalusoke etu iya no ñgeni tulitehelela. Iya una okankhenda nonthue.

Ombimbiliya itupopila okuti

• “Ove moliayave, iya Jeova mekukumbulula; oe mekukuatesako, iya ati, ‘Ame Uno!’”—ISAÍAS 58:9.

• “‘Tyetyi ame muene ndyii nawa omalusoke ndyina konthele yenyi’, otyo tyapopia Jeova, ‘omalusoke ombembwa, haononkhumbi, opo ndyimuavele ekevelelo no nonthiki mbo komutwe. Onwe mamundyihana, amuya, amulikuambela kuame, iya ame mandyimutehelela.’”—JEREMIAS 29:11, 12.

• “Paka ononkhuka mbange monthenda yove. Kambukahi momukanda wove?”—SALMO 56:8.

HUKU UTUETE, UTWII NAWA IYA WESUKA NONTHUE

Okuti okunoñgonoka okuti Huku una okankhenda tyipondola okutukuatesako tyina tumona ononkhumbi? Tala ongeleka ya Maria:

“Omona wange womukuendye ankho una ouvela utiwa câncer. Etyi anyima ankho una omanima 18. Andyilitehelela okuti omuenyo wepuilisa unene iya kawaviukile.” Andyinumanena unene Jeova, mokonda kelipakele-po opo emuhakule!

“Etyi palamba omanima epandu, ohole iya nokankhenda omapanga ange mewaneno vakala na ame, tyankhalesa nawa iya andyilitehelela okuti Jeova nkhele unthyole.” Konyima akala omuvo omunyingi nokusoka, iya atange o testu ya 1 João 3:19, 20, yati: ‘Huku omunene vali tyipona omitima vietu iya wii ovipuka aviho.’ Maria ati: Jeova wii nawa ononkhumbi mbetu.

“Namphila ankho ndyilitehelela ngotyo, mahi pahe onyengo ankho ndyina yalamba-le! Natanga o testu ya Salmo 94:19, yati: ‘Tyina omalusoke ange okunthyukalalesa, alinga omanyingi momutima wange, eungumaneso liove liahimbika okukalesa nawa omuenyo wange.’ Andyilitehelela okuti o testu ei yahonekelwa ame! Pahe, ndyilitehelela okuti ndyipondola okupopia na Jeova konthele yovitateka viange, mokonda uviete iya uvii nawa.”

Okunoñgonoka okuti Jeova utwii nawa iya wasuka nonthue tyituungumanesa unene! Mahi, omokonda yatyi tumonena unene ononkhumbi? Okuti o Huku utumonesa ononkhumbi mokonda yovipuka ovivi tulinga? Okuti pena etyi Huku malingi opo amaneko ononkhumbi mbatyo ambuho? Ononthele mambulandulako mambukumbulula omapulo oo.