Yumba Onthumbi Mu Jeova Putyina Onthyulilo Ikahi Popepi
“Yumbei onthumbi mu Jeova apeho.”—ISAÍAS 26:4.
1. Oñgeni ovaumbili va Huku velikalela novanthu vouye?
ONTHUE TUKAHI mouye umwe ovanthu ovanyingi vehei vali omulie ine omutyi mavayumbu onthumbi, mokonda yovivi vehole okulingwa ine okulaviswa. Otyo tyelikalela novaumbili va Jeova! Mokonda vahongolelwa nounongo wa Huku, vetyii nawa okuti kavapondola okuyumba onthumbi mouye uno ine ‘omovatumini’ vao. (Salmo 146:3) Anthi, vapakula omienyo viavo nekevelelo liavo pomaoko a Jeova, mokonda vetyii okuti uvehole, nokuti oe apeho ufuisapo Ondaka yae.—Romanos 3:4; 8:38, 39.
2. Oñgeni Josue alekesa okuti Huku omukuatyili?
2 Josue kohale walekesile okuti Huku omukuatyili. Konthyulilo yomuenyo wae, oe wapopilile ova Isilayeli vakuavo okuti: “Onwe mutyii nawa nomutima wenyi auho nomuenyo wenyi auho, okuti onondaka ambuho onongwa Jeova Huku yenyi emupopilile, naike yaponya. Ambuho wembufuisapo.”—Josué 23:14.
3. Enyina lia Huku lilekesa tyi konthele yae?
3 Jeova kafuisapo vala omilao viae mokonda uhole ovaumbili vae, mahi haunene omokonda yenyina liae. (Êxodo 3:14; 1 Samuel 12:22) Konthele yenyina lia Huku, onondaka mbokuhimbika mbo mukanda The Emphasized Bible, wa J. B. Rotherham, mbati: “[Enyina] olio likala omulao omuwa unene, ounongo wa Huku wokufuisapo etyi ahanda mu kese muvo, ine mu kese tyitateka, no momasuka-suka kese apondola okutumbuka. . . . [Enyina olio] omulao, . . . eholololo, ehinangelo, otyinkhuatele. Menyina olio, Huku malekesa apeho oukuatyili, mulio nalumwe makala nohonyi.”
4. (a) Isaías 26:4 itulondola okulinga tyi? (b) Oityi matulilongesa monthele ino?
4 Lipula ove muene: ‘Okuti ndyii umwe nawa Jeova opo ndyiyumbe onthumbi aiho mwe? Ndyitala komutwe nonthumbi, okuimbuka okuti Huku oe utumina atyiho?’ Isaías 26:4 yati: “Yumbei onthumbi mu Jeova apeho, tyetyi Onkhanda yomavonge-vonge omanima ikahi mu Jah Jeova.” Tyotyili hono Jeova kayovola ovanthu vae kehuviso, ngetyi ankho alinga kohale. Mahi, upondola okuyumbwa onthumbi “apeho” mokonda oe “Onkhanda yomavonge-vonge omanima.” Oñgeni Huku yetu wokuayumbua onthumbi akuatesako ovafendi vae vekolelo hono? Tutalei ononkhalelo ononthatu: Huku utupameka tyina tuovola ombatelo yae opo tukoleleye tyina tuyondyua. Oe utukuatesako tyina ovanthu vehesukile netyi tuvepopila ine tyina vetuyele. Tupu oe utupameka tyina tuna omasukalalo omanyingi. Tyina tulilongesa ononthele ombo, sokolola nawa oñgeni upondola okupameka onthumbi yove mu Jeova.
Yumba Onthumbi mu Jeova Tyina Uhongiliyua Okulinga Ovivi
5. Onalupi tyipondola okupuiya okuyumba onthumbi mu Huku?
5 Tyapepuka okuyumba onthumbi mu Jeova konthele yomulao wae Womphangu Yombembwa ine o yetutilo, mokonda ovipuka ovio tuvihanda. Mahi, tyipondola okupuiya okumuyumba onthumbi pokutokola okulandula ovitumino viae konthele yovituwa, nokutavela okuti okulandula onondyila mbae novitumino viae matyituetela ehambu enene. Ohamba Salomau wahoneka elondolo liati: “Yumba onthumbi mu Jeova nomutima wove auho, uhakolele menoñgonoko liove muene Muimbuka monondyila mbove ambuho, opo oe aviukise onomphai mbove.” (Provérbios 3:5, 6) Tala onondaka “onondyila” mbetu no “nomphai” mbapopiwa. Tyotyili, otyo tyilekesa onkhalelo yetu yomuenyo onthue Vakristau, hekevelelo lietu vala, tupu tuesukisa okuyumba onthumbi mu Huku. Oñgeni matulekesa onthumbi oyo tyina tutumbukilwa nomahongaiyo?
6. Oñgeni matupameka etokolo lietu liokuyala omalusoke omavi?
6 Okutila ovivi tyihimbika momutima. (Tanga Romanos 8:5; Efésios 2:3.) Oñgeni upondola okupameka etokolo liove liokuanya omalusoke omavi? Tala ononkhalelo ombu ononthano: 1. Likuambela ku Jeova okuita ombatelo. (Mateus 6:9, 13) 2. Soka konongeleka Mbombimbiliya mba vana vatuaileko okutehelela Jeova na vana vayekelepo okumutehelela. Iya otale oityi tyeveetelele.a (1 Coríntios 10:8-11) 3. Sokolola nawa omuihamo ove nombunga yove mupondola okukala nao momutima inkha ulinga onkhali. 4. soka oñgeni Huku elitehelela tyina umwe povaumbili vae alinga onkhali. (Tanga Salmo 78:40, 41.) 5. Soka kehambu Jeova akala nalio momutima, tyina oe atala omufendi wae omukuatyili ulinga oviwa, nokuanya ovivi, tyilinge pounyingi ine tyi ekahi aike. (Salmo 15:1, 2; Provérbios 27:11) Noove upondola okulekesa okuti una onthumbi mu Jeova.
Yumba Onthumbi mu Huku Tyina Ovanthu Vehetavela Nokukuyala
7. Ovitateka patyi Jeremia akalele navio? Atyimukalesa ñgeni?
7 Ovakuatate ovanyingi vaivisa povilongo viepuiya unene. Omuuli Jeremia waundapele potyilongo ngotyo, moutumini wo Judaa, mokueenda kuononthiki mbao mbepuiya mbahulililako. Onthumbi yae mu Jeova ankho ilolwa kese nthiki, mokonda yokuivisa onondaka mbekoyeso lia Huku. Tupu, alo umwe omuhoneki wae omukuatyili Baruke weliyavele okuti wepuila. (Jeremias 45:2, 3) Okuti otyo tyasoyesile Jeremia? Onthiki imwe wasoyele. Oe wati: “Onthiki natyitwa ihinganwe! Ihakanenwe nawa onthiki me yange ankhutula! Oityi natundila meimo, opo ndyiye okumona ovilinga viatena nononkhumbi, iya ononthiki mbange ambuhiki konthyulilo nolukeno?”—Jeremias 20:14, 15, 18.
8, 9. Ngetyi tyipopia Jeremias 17:7, 8 na Salmo 1:1-3, oityi tuesukisa okulinga opo tutualeko okuava ovinyango oviwa?
8 No ngotyo, Jeremia kayekelepo ovilinga viae. Watuaileko okuyumba onthumbi mu Jeova. Moluotyo, omuuli oo wekolelo wamona etyi Jeova afuisapo onondaka mbae mbuvasiwa mu Jeremias 17:7, 8, mbati: “Omunthu wakolela mu Jeova, una uyumba onthumbi yae mu Jeova, apandwe. Iya oe tyotyili makala ngomuti watuikua konthele yomeva, iya oo kamaumono etyi omutenya mauhiki, anthi omafo ao tyotyili maakala atalala nawa. Iya menima liomutenya kausukalala, tupu kauyekepo okuima ovinyango.”
9 Ngomuti watalala nawa “watuikua konthele yomeva,” ine omepia litapelwa nawa, Jeremia nalumwe ‘ayekelepo okuava ovinyango.’ Oe ketavelele okuhongiliyua nonondingavivi vomukuele votyilongo otyo. Anthi, wakakatelele Mondyivi-ndyivi ‘yomeva’ omuenyo, nokupaka momutima atyiho Jeova emupopila. (Tanga Salmo 1:1-3; Jeremias 20:9.) Ongeleka ya Jeremia ongwa unene pala onthue, haunene ku vana vaumbila Huku movilongo viepuiya unene! Inkha nove ukahi monkhalelo ngoyo, tualako okuyumba onthumbi yove aiho mu Jeova, una ukulaa okukupameka putyina ‘wivisa kounyingi enyina liae.’—Hebreus 13:15.
10. Ouwa patyi tuna? Oityi tuesukisa okulipula onthue muene?
10 Jeova utuavela ovipuka ovinyingi opo etukuateseko okutetulula ovitateka tulwa navio mononthiki mbuno mbahulililako. Povipuka etuavela, tyimwe Ondaka ya Huku aiho, ikahi nokutualako okupitiyua momalaka omanyingi. Menyina liomupika wekolelo no kualunguka oe ukahi nokuava okulia okunyingi kuopamphepo momuvo wanakua. Tupu, utuavela omapanga etukuatesako tufenda navo momaliongiyo no movionge. Kuovio okuti ove upolako ombatelo? Aveho vetyilinga “mavakuwilila nehambu mokonda yonkhalelo yavo ongwa yomutima.” Anthi, vana vehetavela ku Huku, “mavekeliyavela mokonda yonongembia komutima . . . nokulila mokonda yomutima waihamenua.”—Isaías 65:13, 14.
Yumba Onthumbi mu Huku Tyina Una Etyi Tyikusukalalesa
11, 12. Mokonda yovitateka viouye, oityi matyilekesa okuti tyili umunongo?
11 Ngetyi tyaulilwe, ovanthu vekahi nokumona ononkhumbi ononyingi. (Mateus 24:6-8; Revelação 12:12) Tyina ovanthu vavasiwa nefindya, haunene vahatekela pofika palonda ine valonda kombanda yonondyuo, kese pamwe palonda. Tupu, tyina ovitateka viouye viliyawisa, ovanthu ovanyingi vaovola okuholama mo nombongo, no mopulitika, no monongeleya, no mounongo. Mahi, ovipuka ovio kaviave epamo liotyotyili. (Jeremias 17:5, 6) Anthi, ovaumbili va Jeova vena eholamo liotyotyili “Onkhanda yomavonge-vonge omanima.” (Isaías 26:4) Omuhoneki wo salmu wati: “[Jeova] onkhanda yange neyovo liange, omuameni wange.” (Tanga Salmo 62:6-9.) Okuti nonthue matuholama Monkhanda oyo?
12 Onthue tukakatela mu Jeova tyina tutavela Ondaka yae, yelikalela apeho nounongo wovanthu. (Salmo 73:23, 24) Mongeleka, ovanyingi vahongiliyua nounongo wovanthu, hamwe vati: ‘Omuenyo wove wike vala, uhapumbwe.’ ‘Lilongesa unene.’ ‘Ovola onombongo ononyingi.’ ‘Landa etyi, landa tyina.’ ‘Linga omaungendi, liako kouye.’ Anthi, ounongo wa Huku, welikuata nelondolo eli: “[Yeka] vana vaundapesa ouye uno, [vakale] nga vana veheuundapesa unene. Mokonda onkhalelo youye uno, ikahi nokupiluluka.” (1 Coríntios 7:31) Tupu, Jesus wetulondola opo tupake komutwe ovilinga Viouhamba wa Huku, okupaka ngotyo “omalumono keulu,” kuna maakala tyapakwa nawa.—Mateus 6:19, 20.
13. Okusoka ku 1 João 2:15-17, oityi tuesukisa okulipula onthue muene?
13 Okuti onkhalelo yove konthele “youye” ‘novipuka viouye,’ ilekesa okuti wayumba onthumbi yove aiho mu Huku? (1 João 2:15-17) Okuti olumono luopamphepo nelao movilinga Viouhamba wa Huku, viakolela vali kuove tyipona ovipuka ouye ukahi nokuava? (Filipenses 3:8) Ove ulinga ononkhono mbokutualako ‘neiho liayela’? (Mateus 6:22) Otyili, Huku kahande uyekepo okutekula haunene ombunga yove. (1 Timóteo 5:8) Mahi oe ukevelela ovaumbili vae vayumbe onthumbi aiho mwe, hamouye wa Satanasi ukahi nokunkhia.—Hebreus 13:5.
14-16. Oñgeni vamwe vavasa ouwa mokukala neiho liayela nokupaka komutwe ovilinga Viouhamba wa Huku?
14 Tala ongeleka ya Ricardo na Rute, vokuna ovana vetatu ovatutu. Ricardo wati: “Omutima wange ankho umphopila okuti ndyipondola okuundapela vali Jeova. Onkhalelo yomuenyo wange ankho ikahi nawa, mahi ankho ndyilitehelela okuti ndyikahi nokuavela Huku ovihupe. Etyi nelikuambela konthele yotyo nokusoka etyi tyakutikinyamo, Rute na Ame tuelipakelamo ndyikaite kuuna ukahi komutwe opo ndyiundape vala ononthiki ononkhuana mosimano, namphila otyilongo otyo ankho tyikahi movitateka konthele yonombongo. Etyi naita netavelwa, andyihimbika okuundapa ngotyo mohanyi ike.” Pahe Ricardo akala ñgeni?
15 Oe wati: “Avamthepulula konombongo mbange, mahi ndyikala ononthiki 50 tyihaundapa menima, nokukala nombunga yange nokulonga ovana. Pahe ndyina omuwo omunyingi wokuenda movilinga viokuivisa, nokuayawisa kovanthu ndyilongesa Ombimbiliya, nokuundapa unene newaneno. Iya mokonda ndyina omuwo wokukuatesako ovana, Rute uundapa movilinga vioukokoli-ndyila pamwe-pamwe. Ame natokola okutualako okuundapa ngotyo apeho.”
16 Toy na Petina, ankho vena ovana meumbo, vatokolele okuteta komuwo wovilinga viavo opo vakale vali nomuvo wokuundapa movilinga viomuwo auho. Toy wati; “Ame ankho ndyiundapa ononthiki ononthatu mosimano,” iya “Petina uundapa ononthiki onombali mosimano. Tupu, tuatunda mondyuo ononene atukala mondyuo onthutu, tupondola okuyunga nawa. Tuahimbika okuundapa movilinga vioukokoli-ndyila etyi nkhele ovana vetu vevali vehenetyitwe, iya nkhele ovilinga ovio tuvihole. Ngotyo, etyi ovana vetu vekula, atukondoka movilinga viomuvo auho. Kutupu onombongo mbupondola okuelekwa noviwa tuna.”
Yekei “Ombembwa ya Huku” Ilunde Omitima Vienyi
17. Mokonda yovitateka vihole okututumbukila, oñgeni Ovihonekwa vihole okukupameka?
17 Nawike puonthue utyii oityi matyimoneka muhuka, mokonda “omuvo novitateka viuhulukila vala” atuho. (Eclesiastes 9:11) Mahi, okusukalala netyi matyikamoneka muhuka, katyipondola okutupola ombembwa hono, otyo tyipita navana vehena oupanga omuwa na Huku. (Mateus 6:34) Apostolu Paulu wahoneka okuti: “Muhakalei notyiho notyipuka natyike, mahi, muaviho, itei unene ku Huku nomalikuambelo kumwe nolupandu. Iya ombembwa ya Huku, ipona onondunge nomalusoke aeho, maiyungu omitima vienyi nomalusoke enyi.”—Filipenses 4:6, 7.
18, 19. Omononkhalelo patyi Huku etuungumanesa? Popia ongeleka.
18 Ovakuatate ovanyingi no nomphange tyina vavasiwa novitateka vakala nombembwa momutima itunda ku Jeova. Omphange umwe wati: “Ondotolo yapopia naame ovikando ovinyingi okunthyonga opo ndyitavele okupakwa ohonde. Otyipuka tyotete ankho amphopila vala, okuti, ‘okuanya okupakwa ohonde owova.’ Otyikando otyo novikuavo, andyilikuambela ku Jeova momutima, iya amphe ombembwa yae. Andyilitehelela okuti napamekwa. Namphila ankho nehena omafa mokonda yohonde yange yatepuluka, mahi ankho nafuapo pala okuhangununa Novihonekwa omokonda yatyi nehetavelela okupakwa ohonde.”
19 Huku pamwe wava ombatelo tuesukisa okuundapesa ovakuatate ine okuava okulia kuopaspilitu momuvo wanakua. Ove hamwe weiviliale omukuatate ine omphange wati: “Ame ankho nesukisa umwe onthele ei. Ame yahonekelwa!” Tyotyili, kese tyitateka tuna ine etyi tuesukisa, Jeova malekesa ohole yae kuonthue inkha tuyumba onthumbi mwe. Haunene, onthue “tunongi” mbae, iya oe wetuavela enyina liae kuonthue.—Salmo 100:3; João 10:16; Atos 15:14, 17.
20. Omokonda yatyi ovaumbili va Jeova mavakakala nepamo tyina ouye wa Satanasi wamehiki konthyulilo?
20 Mokueenda kuonthiki “yonyengo ya Jeova,” ikahi popepi unene, ovipuka aviho ouye wa Satanasi wayumba onthumbi mavinyimuako. Oolu, nopalata, novipuka ovikuavo viakolela, kamavikaava eameno nalike. (Sofonias 1:18; Provérbios 11:4) “Onkhanda yomavonge-vonge omanima” oe vala makakala ondyakulilo yotyotyili. (Isaías 26:4) Moluotyo, tutualeiko okuyumba onthumbi yetu aiho mu Jeova, mokutavela okuendela monondyila mbae mbouviuki, okuivisa onondaka Mbouhamba namphila ovanthu vehesukile ine vetuyele, nokumupopila omasukalalo etu aeho. Putyina tulinga ovipuka ovio, tyotyili ‘tukala netuliyo, iya kamatukasukalala nowoma wotyiponga.’—Provérbios 1:33.
[Onondaka Poutoi]
a Tala omukanda “Mantenha-se no Amor de Deus” pomafo 102-106.
[Ehangununo liolutalatu pefo 15]
Okukakatela movitumino via Jeova tyieta ehambu
[Ehangununo liolutalatu pefo 17]
“Jeova Onkhanda yomavonge-vonge omanima”
Okuti Ove Upondola Okuhangununa?
Oñgeni tupondola okuyumba onthumbi mu Huku
• tyina tuhongiliyua okulinga ovivi?
• tyina ovanthu vehesukile netyi tuvepopila ine vetuyele?
• tyina tuna etyi tyetusukalalesa?